Read Buku Loyera - Chichewa Ntc. 24 Bible Online

Ntc. 24 - Buku Loyera - Chichewa bible

Ntc. 24

¹Patapita masiku asanu, Ananiya, mkulu wa ansembe onse, adadza pamodzi ndi akuluakulu ena a Ayuda, ndi katswiri wina wolankhulira anthu pa milandu, dzina lake Tertulo. Iwo adafika pamaso pa bwanamkubwa uja, nayamba kuneneza Paulo.

²Tsono Pauloyo atamuitana, Tertulo uja adayambapo zomunenezazo. Adati, “Inu a Felikisi olemekezeka, ife tikukhala pa mtendere weniweni chifukwa cha inu, ndipo zinthu zambiri zakhala zikukonzeka m'dziko mwathu chifukwa cha utsogoleri wanu wanzeru.

³Zonsezi timazilandira moyamika kwambiri ponseponse mwa njira iliyonse.

⁴Pepani sindikufuna kukutayitsani nthaŵi, komabe ndimapempha kuti mundikomere mtima, mungomvapo mau athuŵa mwachidule.

⁵Ndiye kuti munthu uyu ife tampeza kuti ngwovutitsa kwabasi. Wakhala akuutsa chipolowe pakati pa Ayuda pa dziko lonse lapansi, ndiponso ndi mtsogoleri wa gulu lopatulika la Anazarete.[54]

⁶Adaayesanso ngakhale kuipitsa Nyumba ya Mulungu yathu. Ndiye ife tidamgwira.” [“Tidafuna kumuweruza potsata Malamulo athu.

⁷Koma Lisiasi, mkulu wa asilikali, adadzamtsomphola kumanja kwathu mwankhondo,

⁸kenaka nkulamula kuti omneneza adzaonekere kwa inu.”] “Mukamufunsa ameneyu, mutha kudziŵa nokha zonse zimene tikumnenezera.”

⁹Ayudanso adavomereza, nanenetsa kuti zonsezo nzoona.

¹⁰Bwanamkubwa uja adakodola Paulo kuti alankhule, ndipo Paulo adati, “Ndikudziŵa kuti inu mwakhala mukuweruza mtundu uwu zaka zambiri tsopano, nchifukwa chake ndakondwa kuti ndiyankhe pamaso panu zimene akundinenezazi.

¹¹Inu nomwe mutha kupeza umboni wake, sipadapite masiku opitirira khumi ndi aŵiri chipitire changa ku Yerusalemu kukapembedza.

¹²Ayuda sadandipezepo ndikukangana ndi munthu aliyense m'Nyumba ya Mulungu, kapena kuutsa chipolowe pakati pa anthu m'nyumba zamapemphero, kaya pena paliponse mumzindamo.

¹³Iwoŵa sangakutsimikizireni zimene akundinenezazi.

¹⁴Koma ichi chokha ndikuvomera pamaso panu, kuti ndimapembedza Mulungu wa makolo athu potsata Njira imene iwoŵa amati ndi gulu lopatulika. Ndimakhulupirira zonse zolembedwa m'Malamulo a Mose ndiponso m'mabuku a aneneri.

¹⁵Popeza kuti ndimakhulupirira Mulungu, ndimakhulupirira, monga iwonso amakhulupirira, kuti anthu onse, olungama ndi osalungama omwe, adzauka kwa akufa.

¹⁶Nchifukwa chake inenso ndimayesetsa nthaŵi zonse kukhala ndi mtima wangwiro pamaso pa Mulungu, ndi pamaso pa anthu.

¹⁷“Tsono nditakhala kwina zaka zingapo, ndidabwera kudzatula zopereka zachifundo kwa anthu a mtundu wanga, ndiponso kudzapereka nsembe.

¹⁸Pamene ndinkachita zimenezi, iwo adandipeza m'Nyumba ya Mulungu nditachita mwambo wakudziyeretsa. Panalibe konse khamu la anthu kapena chipolowe ai.

¹⁹Koma kunali Ayuda ena a ku Asiya. Iwowo akadayenera kukhala pano pamaso panu kudzandineneza okha ngati ali nane nkanthu.

²⁰Kapena omwe ali panoŵa anene ngati adandipeza cholakwa pamene ndinali m'Bwalo lao Lalikulu lamilandu.

²¹Koma cholakwa changa chingathe kukhala chokhachi chakuti, pamene ndidaaimirira pamaso pao, ndidaafuula kuti, ‘Mukundizenga mlandu ine lero chifukwa ndimakhulupirira kuti anthu akufa adzauka.’ ”

²²Felikisi ankadziŵa bwino za Njira ya Ambuye, choncho adatseka bwalolo ndi mau akuti, “Ndidzagamula mlandu wako akabwera Lisiasi, mkulu wa asilikali.”

²³Tsono adalamula mtsogoleri wa gulu la asilikali kuti azimlonda, koma azimpatsakonso ufulu, osaletsa abwenzi ake kumamsamala.

²⁴Patapita masiku angapo Felikisi adabwera ndi mkazi wake Durusila, amene anali Myuda. Adaitana Paulo, nayamba kumvetsera zimene iye ankalankhula za kukhulupirira Khristu Yesu.

²⁵Koma pamene Paulo adakamba za chilungamo, za kudziletsa, ndi zakuti Mulungu adzaweruza anthu, Felikisi adachita mantha namuuza kuti, “Pakali pano bapita, ndikapeza nthaŵi, ndichita kukuitananso.”

²⁶Koma ankaganiza kuti Paulo adzampatsa ndalama, nchifukwa chake ankamuitana kaŵirikaŵiri namacheza naye.

²⁷Patapita zaka ziŵiri, Porkio Fesito adaloŵa m'malo mwa Felikisi. Tsono Felikisiyo pofuna kuchita mkomya kwa Ayuda, adamsiya m'ndende Paulo uja.