Read Buku Loyera - Chichewa Ntc. 25 Bible Online

Ntc. 25 - Buku Loyera - Chichewa bible

Ntc. 25

¹Fesito adayamba ntchito yoweruza m'chigawo chake, ndipo patapita masiku atatu, adapita ku Yerusalemu kuchokera ku Kesareya.

²Kumeneko akulu a ansembe ndiponso atsogoleri a Ayuda adamufotokozera za mlandu wa Paulo. Iwo adapempha Fesito

³kuti aŵakomere mtima pakumtumiza Paulo ku Yerusalemu. Adaatero chifukwa anali atapangana zomulalira Paulo kuti amuphe pa njira.

⁴Fesito adaŵauza kuti, “Paulo akusungidwa m'ndende ku Kesareya, ndipo ine ndipita komweko posachedwa.

⁵Tsono atsogoleri anu apite nane pamodzi kumeneko, kuti akamneneze munthuyo ngatidi iye adachitapo cholakwa.”

⁶Fesito atakhala pakati pao ku Yerusalemu kuja masiku osapitirira asanu ndi atatu kapena khumi, adapita ku Kesareya. M'maŵa mwake adakhala pa mpando woweruzira milandu, naitanitsa Paulo kuti abwere pamaso pake.

⁷Paulo atafika, Ayuda amene adaabwera kuchokera ku Yerusalemu aja adamzinga, nayamba kumneneza zinthu zoopsa zambiri, zimene iwo sadathe kuzitsimikiza.

⁸Paulo poyankha zomnenezazo adati, “Ine sindidalakwirepo Malamulo a Ayuda, kapena Nyumba ya Mulungu, kapenanso Mfumu ya ku Roma.”

⁹Fesito pofuna kuchita mkomya kwa Ayuda, adafunsa Paulo kuti, “Kodi ungakonde kupita ku Yerusalemu kuti mlandu wakowu ukazengedwere kumeneko pamaso panga?”

¹⁰Koma Paulo adati, “Ine ndaima pa bwalo lamilandu la Mfumu ya ku Roma, ndiko kumene ayenera kundiweruza. Ayudaŵa ine sindidaŵalakwire chilichonse, monga inu mukudziŵa bwino.

¹¹Ngati ndili wolakwa, ndipo ngati ndachita kanthu koyenera kuti ndiphedwe, sindikukana kuphedwa ai. Koma ngati zimene aŵa akundinenezazi si zoona, palibe munthu angathe kundipereka kwa iwo. Ine ndikupempha kuti mlandu wangawu ndikagwade kwa Mfumu ya ku Roma.”

¹²Tsono Fesito atakambirana ndi abwalo ake, adati, “Wachita apilo kwa Mfumu ya ku Roma. Chabwino, udzapitadi ku Romako kwa Mfumu yaikulu.”

¹³Patapita masiku, mfumu Agripa pamodzi ndi mkazi wake Berenise adadza ku Kesareya kudzalonjera Fesito.

¹⁴Atakhala kumeneko masiku angapo, Fesitoyo adafotokozera mfumoyo za mlandu wa Paulo. Adati, “Kuli munthu wina kuno amene Felikisi adamsiya m'ndende.

¹⁵Pamene ndinali ku Yerusalemu, akulu a ansembe pamodzi ndi atsogoleri a Ayuda adandifotokozera za iye, nandipempha kuti ndizenge mlandu wake ndi kugamula kuti ngwolakwa.

¹⁶Ine ndidaŵayankha kuti si mwambo wa Aroma kungompereka munthu ai. Munthu wonenezedwayo amayamba wakumana nawo omnenezawo, kuti iyeyo akhale ndi mwai woyankhapo pa zimene akumnenezazo.

¹⁷Tsono iwo atadzasonkhana kuno, ineyo mosataya nthaŵi, m'maŵa mwake ndidakakhala pa mpando woweruzira milandu, nkumuitanitsa munthuyo kuti abwere pamaso panga.

¹⁸Omneneza aja ataimirira, sadamneneze choipa nchimodzi chomwe pa zimene ndinkaganiza ine.

¹⁹Ankangokangana naye za chipembedzo chao, ndiponso ati za munthu wina dzina lake Yesu, amene adafa, koma Paulo amatsimikiza kuti ali moyo.

²⁰Ine ndidaathedwa nzeru, osadziŵa kuti ndiifufuze bwanji nkhani imeneyi. Choncho ndidamufunsa Pauloyo ngati akadakonda kupita ku Yerusalemu kuti mlandu wakewo ukazengedwere kumeneko.

²¹Koma Paulo adapempha kuti abasungidwa m'ndende mpaka Mfumu ya ku Roma itatsimikiza za mlandu wake. Pamenepo ndidalamula kuti amsunge m'ndende kufikira nditamtumiza kwa Mfumuyo.”

²²Apo Agripa adauza Fesito kuti, “Inenso nkadakonda kuti ndidzimvere ndekha zimene munthuyu anene.” Fesito adati, “Mumumva maŵa.”

²³M'maŵa mwake Agripa ndi Berenise adabwera ndi ulemu waukulu wachifumu. Adaloŵa m'bwalo la milandu pamodzi ndi akulu a asilikali ndiponso akuluakulu a mumzindamo. Fesito adaitanitsa Paulo kuti abwere, iye nkubweradi.

²⁴Tsono Fesito adati, “Mfumu Agripa, ndi inu nonse amene muli nafe muno, mukumuwona munthu uyu. Ayuda onse adandipempha ku Yerusalemu ndi kuno komwe mofuula kuti ameneyu sayenera kukhalanso moyo.

²⁵Koma ine sindidapeze konse kuti iye adachita kanthu koyenera kumuphera. Ndiye popeza kuti mwiniwakeyu adapempha kuti mlandu wake ukazengedwe ndi Mfumu ya ku Roma, ndidatsimikiza zomtumiza.

²⁶Komabe ndilibe kanthu kenikeni koti ndilembere mfumuyo za iyeyu. Motero ndabwera naye kwa inu, makamaka kwa inuinuyo mfumu Agripa, kuti mutamufunsitsa, ndikhale nkanthu koti ndilembe.

²⁷Ine ndiye ndikuwona kuti ndi chinthu chopusa kutumiza mkaidi popanda kutchula zifukwa za mlandu wake.”