Read Buku Loyera - Chichewa Aro. 10 Bible Online

Aro. 10 - Buku Loyera - Chichewa bible

Aro. 10

¹Abale, chimene ndimakhumbitsa ndi mtima wanga wonse, ndipo chimene ndimapempha Mulungu, ndi chakuti Aisraele apulumuke.

²Ndikuŵachitira umboni kuti ndi achangudi pa zinthu za Mulungu, koma changu chake sadachimvetse bwino m'mene chiyenera kukhalira.

³Sadziŵa chilungamo chochokera kwa Mulungu, koma adayesa kupezeka kuti ngolungama pamaso pake mwa njira yaoyao, osagonjera chilungamo chochokera kwa Mulungu.

⁴Khristu adafikitsa Malamulo a Mose ku mapherezero, kotero kuti aliyense wokhulupirira, amapezeka kuti ngwolungama pamaso pa Mulungu.

⁵ Kunena za chilungamo chimene chimapezeka pakumvera Malamulo, Mose adalemba kuti, “Munthu wochita zimene Malamulo amanena, adzakhala ndi moyo pakuzichita.”

⁶ Koma kunena za chilungamo chimene chimapezeka pakukhulupirira, akuti, “Mumtima mwako usanene kuti, ‘Ndani adzakwera Kumwamba?’ ” (Ndiye kuti kukamuuza Khristu kuti atitsikire ife.)

⁷“Usanenenso kuti, ‘Ndani adzatsikira ku dziko la anthu akufa?’ ” (Ndiye kuti kukamubwezera Khristu kuchokera ku dziko la anthu akufa.)

⁸Koma nanga akuti chiyani? Akuti, “Mau sali nawe kutali, ali pakamwa pako, ndiponso mumtima mwako.” (Ameneŵa ndiwo mau a chikhulupiriro amene timaŵalalika.)

⁹Ngati uvomereza ndi pakamwa pako kuti Yesu ndi Ambuye, ndipo ukhulupirira mumtima mwako kuti Mulungu adamuukitsa kwa akufa, udzapulumuka.

¹⁰Chifukwa munthu amati akakhulupirira ndi mtima wake, amapezeka wolungama pamaso pa Mulungu, ndipo amati akavomereza chikhulupiriro chakecho ndi pakamwa pake, amapulumuka.

¹¹ Paja Malembo akuti, “Munthu aliyense wokhulupirira Iye, sadzachita manyazi.”

¹²Choncho palibe kusiyana pakati pa Ayuda ndi anthu a mitundu ina, pakuti Mulungu ndiye Ambuye a onse, ndipo amadalitsa mooloŵa manja onse otama dzina lake mopemba.

¹³ Ndi monga momwe mau a Mulungu anenera kuti, “Aliyense amene adzatama dzina la Ambuye mopemba adzapulumuka.”

¹⁴Kodi anthu angatame Mulungu bwanji mopemba ngati sadamkhulupirire? Ndipo angamkhulupirire bwanji ngati sadamve za Iye? Ndipo angamve za Iye bwanji ngati palibe wina wolalika?

¹⁵ Ndipo anthu angalalike bwanji ngati palibe oŵatuma? Paja mau a Mulungu akuti, “Nchokondweretsa zedi kuwona olalika Uthenga Wabwino akufika.”

¹⁶ Koma si onse amene adalandira Uthenga Wabwinowo. Ndi monga mneneri Yesaya anenera kuti, “Ambuye, ndani adakhulupirira zimene tidalalika?”

¹⁷Motero munthu amakhulupirira chifukwa cha zimene wamva, ndipo zimene wamvazo zimachokera ku zolalika za Khristu.

¹⁸ Koma ntafunsa: kodi ndiye kuti Aisraele sadaŵamve mauwo? Iyai, kumva adamva ndithu. Ndi monga mau a Mulungu anenera kuti, “Liwu lao lidamveka pa dziko lonse lapansi, mau ao adafika mpaka ku malekezero a dziko.”

¹⁹ Ntafunsanso: monga nkuti Aisraele sadaŵamvetse mauwo? Mose ndiye woyamba kuyankhapo. Iye adati, “Ndidzakuchititsani kaduka ndi mtundu umene suli mtundu weniweni, ndidzakukwiyitsani ndi mtundu wa anthu opusa.”

²⁰ Ndipo Yesaya adaanena molimba mtima kuti, “Adandipeza anthu amene sanali kundifunafuna. Ndidaŵaonekera anthu amene sankafunsa za Ine.”

²¹ Koma za Aisraele adati, “Tsiku lonse ndidatambalitsa manja anga kwa mtundu wa anthu osandimvera ndi ondiwukira Ine.”