Read Buku Loyera - Chichewa 1 Ako. 16 Bible Online

1 Ako. 16 - Buku Loyera - Chichewa bible

1 Ako. 16

¹Kunena za zopereka zothandizira akhristu a ku Yerusalemu, inunso muchite monga momwe ndidalongosolera m'mipingo ya ku Galatiya.

²Pa tsiku loyamba la sabata, aliyense mwa inu azipatulapo kanthu, potsata momwe wapezera. Zimene wapatulazo azisunge kunyumba, kuti pasakakhalenso kusonkhasonkha ine ndikabwera.

³Tsono ndikadzafika, ndidzaŵapatsa makalata anthu amene mungaŵasankhe, ndipo ndidzaŵatuma kuti akapereke mphatso yanuyo ku Yerusalemu.

⁴Koma ngati nkofunika kuti inenso ndipite, tidzapitira limodzi.

⁵ Ndidzafika kwanuko nditadutsa dziko la Masedoniya, pakuti ndingodzerako ku Masedoniyako.

⁶Koma kapena kwanuko ndidzakhala kanthaŵi, kapenanso nyengo yonse yachisanu. Ndifuna kuti pambuyo pake mudzandithandize kupitiriza ulendo wanga kulikonse kumene ndingapite.

⁷Ulendo umenewo sindifuna kungokuwonani chidule modutsa chabe, koma ndikuyembekeza kukhala nanu kanthaŵi ndithu, Ambuye akalola.

⁸ Koma ndikhala ku Efeso kuno mpaka chikondwerero cha Pentekoste.[10]

⁹Pakuti pano mwai ulipo woti nkuchita zazikulu, ndiponsotu adani alipo ambiri.

¹⁰Ngati Timoteo afika kwanuko, samalani kuti pasakhale kanthu komdetsa nkhaŵa pakati panu, pakuti iyenso akugwira ntchito ya Ambuye, monga ine.

¹¹Tsono wina aliyense asamnyoze, koma mumthandize kupitiriza ulendo wake mwamtendere kubwerera kuli ine kuno. Paja ndikumuyembekeza pamodzi ndi abale ena.

¹²Kunena za mbale wathu, Apolo, ndamuumiriza kolimba kuti pamodzi ndi abale ena abwere kwanuko kudzakuwonani, koma iye sadafune kupita tsopano. Akadzapeza mpata wabwino, adzabwera.

¹³Khalani maso, khalani okhazikika m'chikhulupiriro chanu, chitani chamuna, khalani amphamvu.

¹⁴Zonse zimene muchita, muzichite mwachikondi.

¹⁵Abale, mukudziŵa kuti Stefanasi ndi a m'banja mwake ndiwo adayambirira kuloŵa chikhristu m'dziko la Akaiya. Ndipo akhala akudzipereka kutumikira anthu a Mulungu.

¹⁶Tsono ndikukupemphani kuti inunso muziŵamvera anthu otere, ndiponso aliyense wogwira ntchito ndi kutumikira modzipereka pamodzi nawo.

¹⁷Ndakondwa kuti Stefanasi, Fortunato ndi Akaiko afika, pakuti ngakhale inu simuli nane, iwo achita ngati kuloŵa m'malo wanu.

¹⁸Adandisangulutsa ine monga adasangulutsanso inu. Anthu otere muziŵalemekeza.

¹⁹Mipingo ya ku dziko la Asiya ikuti moni. Akwila ndi Prisika,[11] pamodzi ndi mpingo umene umasonkhana m'nyumba mwao, akuti moni kwa inu nonse, akhristu anzao.

²⁰Abale onse akuti moni. Mupatsane moni mwa chikondi chenicheni.

²¹Ineyo Paulo, ndikuchita kulemba ndekha mau aŵa akuti “Moni.”

²²Ngati munthu sakonda Ambuye, akhale wotembereredwa. Maranatha![12] Ambuye athu, bwerani!

²³Ambuye Yesu akudalitseni.

²⁴Chikondi changa chikhale pa inu nonse, mwa Khristu Yesu.