Read Buku Loyera - Chichewa 1 Ate. 2 Bible Online

1 Ate. 2 - Buku Loyera - Chichewa bible

1 Ate. 2

¹Abale, inu nomwe mukudziŵa kuti kucheza kuja tidadzacheza kwanuku, kunali kwaphindu.

² Monga mukudziŵa, paja nthaŵi imene ija nkuti anthu a ku Filipi atatizunza kale ndi kutichita chipongwe. Komabe Mulungu wathu adatilimbitsa mtima mpaka tidakulalikirani ndithu Uthenga wake Wabwino, ngakhale ambiri ankatsutsana nafe.

³Pakuti zimene timalalika sitizilalika chifukwa chofuna kuphunzitsa zonama, kapena kuganiza zoipa, kapena kufuna kunyenga anthu ai.

⁴Koma timalalika chifukwa Mulungu adativomereza natisungiza Uthenga Wabwino kuti tiulalike. Choncho tikamaphunzitsa sitifuna kukondweretsa anthu, koma timafuna kukondweretsa Mulungu, amene amapenyetsetsa mitima yathu.

⁵Monga mukudziŵa, sitidabwere kwanuko ndi mau oshashalika kapena ndi mtima womangofuna phindu. Apo Mulungu angathe kutichitira umboni.

⁶Sitinkafunanso ulemu wochokera kwa anthu, kapena kwa inu, kapena kwa ena, ngakhale kunali kotheka kukulamulani kuti mutithandize, popeza kuti ndife atumwi a Khristu.

⁷Koma tidakhala ofatsa pakati panu ngati mai wosamalira ana ake.

⁸Tinkakukondani, ndipo chifukwa cha kukulakalakani kwambiri, tidatsimikiza zogaŵana nanu osati Uthenga Wabwino wa Mulungu wokha, komanso ngakhale moyo wathu womwe.

⁹Abale, simukumbukira nanga kuti tinkagwira ntchito kwambiri mpaka kutopa? Monse muja tinkakulalikirani Uthenga Wabwino wa Mulungu, tinkagwira ntchito zamanja usana ndi usiku, kuwopa kuti tingavutitse wina aliyense mwa inu.

¹⁰Inu ndinu mboni, Mulungu yemwe ndi mboninso, kuti mkhalidwe wathu pakati pa inu okhulupirira unali wangwiro, wolungama, ndi wopanda cholakwa.

¹¹Paja mukudziŵa kuti, tinkasamala aliyense mwa inu monga momwe amachitira bambo ndi ana ake.

¹²Tinkakulimbitsani mtima, kukuthuzitsani mtima ndi kukupemphani kuti mayendedwe anu akhale okomera Mulungu, amene amakuitanani kuti mukaloŵe mu Ufumu wake waulemerero.

¹³Pa mbali yathu, timathokoza Mulungu kosalekeza. Timatero chifukwa chakuti pamene mudamva mau a Mulungu amene tidakulalikirani, mudaŵalandira osati ngati mau a anthu chabe, koma monga momwe aliri ndithu, mau a Mulungu. Mauwo ndi omwe akugwira ntchito mwa inu okhulupirira.

¹⁴ Abale, zimene zidakugwerani inu ndi zomwe zidagweranso mipingo ya Mulungu ya mwa Khristu Yesu imene ili ku Yudeya. Paja inunso anthu akwanu adakuzunzani monga momwe Ayuda adazunzira akhristu a ku Yudeya.

¹⁵Ayudawo ndi amene adapha Ambuye Yesu ndi aneneri akale, ndipo adatizunza ifenso kwambiri. Ameneŵa sakondweretsa Mulungu konse, ndipo amadana ndi anthu onse.

¹⁶Iwowotu amatiletsa kulalika Uthenga Wabwino kwa anthu a mitundu ina woŵathandiza kuti apulumuke. Motero nthaŵi zonse amanka nawonjezerawonjezera machimo ao, mwakuti tsopano mkwiyo wa Mulungu waŵagwera.

¹⁷Abale, pamene tidasiyana nanu ngakhale kanthaŵi pang'ono, tinkalakalaka kwambiri kuwonana nanunso maso ndi maso. Ngakhale tinkachoka, mtima wathu unali nanube.

¹⁸Nchifukwa chake tidaayesetsa kubweranso kwanuko. Ineyo Paulo, ndidaayesa kangapo, koma Satana adaatilepheretsa.

¹⁹Kodi pamaso pa Ambuye athu Yesu, nchiyani chidzakhale chiyembekezo chathu, chimwemwe chathu, ndi mphotho yoti ife tidzanyadire, Iye akadzabweranso? Si ndinu nomwe nanga?

²⁰Pajatu ulemu wathu ndi chimwemwe chathu ndinu amene.