Read Buku Loyera - Chichewa 1 Ate. 5 Bible Online

1 Ate. 5 - Buku Loyera - Chichewa bible

1 Ate. 5

¹Komatu abale, za nthaŵi ndi nyengo yake yodzachitika zimenezi, nkosafunikira kuti ndichite kukulemberani.

²Inu nomwe mukudziŵa bwino kuti tsiku la Ambuye likadzafika ngati mbala yausiku.

³Pamene anthu azikati, “Pali mtendere, tili pabwino”, pamenepo chiwonongeko chidzaŵagwera modzidzimutsa. Chidzaŵadzidzimutsa monga momwe zoŵaŵa zimamchitira mkazi pa nthaŵi yoti achire; ndipo sadzatha konse kuchizemba.

⁴Koma inu abale, simuli m'chimbulimbuli kuti tsikulo nkukudzidzimutsani ngati mbala.

⁵Paja nonsenu zanu zonse ndi zam'kuŵala, ndiye kuti zausana. Ife zathu si zausiku kapena zamumdima ai.

⁶Nchifukwa chake tsono tisagone tulo monga momwe amachitira anthu ena, ife tikhale maso, tikhale osaledzera.

⁷Anthu ogona tulo, amagona usiku, anthu oledzera amaledzera usiku.

⁸Koma ife, popeza kuti zathu nzausana, tisamaledzera. Tikhale titavala chikhulupiriro ndi chikondi ngati chovala chachitsulo chapachifuwa. Ndipo ngati chisoti choteteza kumutu tivale chiyembekezo chakuti tidzapulumuka.

⁹Paja Mulungu sadatisankhe kuti tidzaone mkwiyo wake, koma kuti tidzalandire chipulumutso kwa Ambuye athu Yesu Khristu.

¹⁰Iwo adatifera kuti tikakhale ndi moyo pamodzi naye, ngakhale pamene tili amoyo kapena titafa kale.

¹¹Nchifukwa chake muzilimbitsana mtima ndi kumathandizana, monga momwe mukuchitiramu.

¹²Abale, tikukupemphani kuti muziŵalemekeza amene akugwira ntchito pakati panu, amene Ambuye adaŵaika kuti azikutsogolerani ndi kumakulangizani.

¹³Mwa chikondi muziŵachitira ulemu kwambiri chifukwa cha ntchito yao. Muzikhalitsana ndi mtendere pakati panu.

¹⁴Abale, tikukupemphani kuti anthu amene amangokhala osafuna kugwira ntchito muziŵadzudzula, anthu otaya mtima muziŵalimbikitsa. Anthu ofooka muziŵathandiza, anthu onsewo muziŵalezera mtima.

¹⁵Onetsetsani kuti wina aliyense mnzake akamchita choipa, asabwezere choipacho. Koma nthaŵi zonse muziyesetsa kuchitira zabwino anzanu ndi anthu ena onse.

¹⁶Khalani okondwa nthaŵi zonse.

¹⁷Muzipemphera kosalekeza.

¹⁸Muzithokoza Mulungu pa zonse. Paja zimene Mulungu amafuna kuti muzichita mwa Khristu Yesu nzimenezi.

¹⁹Musayese kuletsa ntchito ya Mzimu Woyera.

²⁰Musanyoze mau olalikidwa m'dzina la Mulungu,

²¹koma zonse muziziyesa bwino, kuti muwonetsetse ngati nzoona. Musunge zimene zili zabwino,

²²ndipo mupewe choipa cha mtundu uliwonse.

²³Mulungu mwini, amene amatipatsa mtendere, akusandutseni angwiro pa zonse. Akusungeni athunthu m'nzeru, mumtima ndi m'thupi, kuti mudzakhale opanda chilema pobwera Ambuye athu Yesu Khristu.

²⁴Iye amene akukuitanani ngwokhulupirika, ndipo adzakuchitirani zimenezi.

²⁵Abale, muzitipempherera.

²⁶Abale onse muŵapatseko moni mwachikondi.

²⁷M'dzina la Ambuye ndikukulamulani kuti kalatayi muŵaŵerengere abale onse.

²⁸Ambuye athu Yesu Khristu akukomereni mtima.