Read Buku Loyera - Chichewa Yos. 1 Bible Online

Yos. 1 - Buku Loyera - Chichewa bible

Yos. 1

¹Mose, mtumiki wa Chauta, atamwalira, Chauta adalankhula ndi mthandizi wake wa Moseyo, dzina lake Yoswa, mwana wa Nuni, kuti,

²“Mose, mtumiki wanga, wafa. Tsono iwe, konzeka tsopano pamodzi ndi Aisraele onseŵa, muwoloke mtsinje wa Yordaniwu, ndipo muloŵe m'dziko limene ndikuŵapatsalo.

³ Paliponse pamene muponde phazi lanu, ndakupatsani inu, monga momwe ndidalonjezera Mose.

⁴Kuyambira ku chipululu kumwera, mpaka ku mapiri a Lebanoni kumpoto, kuchokeranso ku mtsinje waukulu wa Yufurate kuvuma, mpaka dziko lonse la Ahiti, kukafika ku Nyanja Yaikulu kuzambwe, lonseli lidzakhala dziko lanu.

⁵ Palibe ndi mmodzi yemwe amene adzathe kukugonjetsa iwe Yoswa, nthaŵi yonse ya moyo wako. Ine ndidzakhala nawe monga momwe ndidakhalira ndi Mose, sindidzakusiya konse.

⁶ Ukhale wamphamvu ndipo ulimbe mtima, chifukwa udzatsogolera anthu ameneŵa pokalandira dziko limene ndidalonjeza kwa makolo ao.

⁷Komatu ukhale wamphamvu ndipo ulimbe mtima kwambiri. Usamale ndithu kuti usunge malamulo onse amene Mose mtumiki wanga adakupatsa. Usatayepo ndi kagawo kamodzi komwe, ndipo kulikonse kumene udzapite, udzapambana.

⁸Uziŵerenga buku lamalamuloli, ndipo usana ndi usiku uzisinkhasinkha zolembedwa m'menemo, kuti uzisunge zonse. Tsono ukamatero, udzapeza bwino ndipo udzapambana.

⁹Paja ndidakulamula kuti ukhale wamphamvu. Usamaopa kapena kutaya mtima, poti Ine, Chauta, Mulungu wako, ndidzakhala nawe kulikonse kumene udzapite.”

¹⁰Pamenepo Yoswa adalamula atsogoleri a Aisraele naŵauza kuti,

¹¹“Pitani ku zithando zonse, mukauze anthu kuti, ‘Konzekani, mangani katundu, chifukwa atapita masiku atatu, mudzaoloka Yordani ndi kulandira dziko limene Chauta, Mulungu wanu, akukupatsani.’ ”

¹² Ndipo Yoswa adauza fuko la Rubeni ndi la Gadi ndi theka la fuko la Manase kuti,

¹³“Kumbukirani zija zimene Mose, mtumiki wa Chauta, adakuuzani, kuti, ‘Chauta, Mulungu wanu, adzakupatsani dziko limeneli kuti likhale lanu.’

¹⁴Tsono akazi anu pamodzi ndi ana anu atsalire m'dziko lino la kuvuma kwa Yordani limene Mose adakupatsani. Ng'ombe zanu zitsalenso, koma ankhondo okha pakati panupa ndiwo aoloke atatenga zida, apite kutsogolo kwa Aisraele anzanu kuti akaŵathandize.

¹⁵Ndipo iwowo akadzalandira dzikolo ndi kukhazikikamo, pamenepo ndiye inu mudzabwerere ndi kudzakhala m'dziko lanu limene adakupatsani Mose, mtumiki wa Chauta, konkuno kuvuma kwa Yordani.”

¹⁶Onsewo adayankha Yoswa kuti, “Zonse zimene mwatilamulazi tidzachita, ndipo kulikonse kumene mudzatitume, tidzapita.

¹⁷Tidzakumverani monga momwe tidamverera Mose. Chauta, Mulungu wanu, akhale nanu, monga momwe adakhalira ndi Mose!

¹⁸Aliyense wokangana ndi inu kapena wosamvera malamulo anu, adzaphedwa. Inu mukhale amphamvu, ndipo mulimbe mtima kwambiri.”