Read Buku Loyera - Chichewa Yos. 16 Bible Online

Yos. 16 - Buku Loyera - Chichewa bible

Yos. 16

¹Dziko limene lidapatsidwa kwa zidzukulu za Yosefe lidayambira ku mtsinje wa Yordani pafupi ndi Yeriko, cha kuvuma kwa akasupe a Yeriko, kukaloŵa m'chipululu. Lidayambiranso ku Yeriko, ndi kukaloŵa m'dziko lamapiri chakuzambwe, mpaka kukafika ku chipululu cha Betele.

²Kuchokera ku Betele malire ake adakafika ku Luzi, nabzola ku Ataroti kumene kunkakhala Aaraki.

³Tsono lidapitirira ndithu kuzambwe, kudera la Ayafaleti, mpaka kufika kunsi kwa Betehoroni. Kuchokera kumeneko malire ake adalunjika ku Gezere, nakalekeza mpaka ku nyanja.

⁴Choncho ana a Yosefe, Manase ndi Efuremu adalandira choloŵa chao.

⁵Dziko la mabanja a Efuremu ndi ili: malire ake akuvuma anali Ataroti-Adara mpaka kukafika kumtunda kwake kwa Betehoroni.

⁶Kuchokera kumeneko malirewo adatsikira mpaka ku nyanja. Mikimetati anali kumpoto kwake. Kuvuma malirewo adakhotera cha ku Taanatisilo, napitirira malo amenewo chakuvuma, mpaka kukafika ku Yanowa.

⁷Tsono kuchokera ku Yanowa, adatsikira ku Ataroti ndi ku Naara. Adakafika ku Yeriko ndi kukathera m'Yordani.

⁸Malirewo adaloŵera kuzambwe kuchokera ku Tapuwa mpaka ku mtsinje wa Kana, ndi kutsikira mpaka ku nyanja. Dziko limenelo ndilo lidapatsidwa kwa mabanja a Aefuremu kuti likhale choloŵa chao,

⁹kuphatikizapo mizinda ndi midzi yopatsidwa kwa Aefuremu, koma yokhala m'kati mwa dziko la anthu a fuko la Manase.

¹⁰ Komatu Akanani amene ankakhala ku Gezere, Aefuremu sadaŵapirikitse, kotero kuti Akanani ameneŵa alipobe pakati pa Aefuremu mpaka lero lino. Komabe Akananiwo ankakakamizidwa kugwira ntchito yathangata.