Read Buku Loyera - Chichewa Yos. 20 Bible Online

Yos. 20 - Buku Loyera - Chichewa bible

Yos. 20

¹ Chauta adauza Yoswa kuti,

²“Uza Aisraele kuti, ‘Sankhulani mizinda yopulumukiramo, imene Ine ndidakuuzani kudzera mwa Mose.

³Munthu aliyense wopha mnzake mwangozi, osati mwadala, angathe kuthaŵira kumeneko. Motero angathe kupulumuka kwa wofuna kumlipsira.

⁴Angathe kuthaŵira ku umodzi mwa mizinda imeneyo, nakafika pa malo achiweruzo amene ali pa chipata cha mzindawo. Atafika, asimbire atsogoleri mlandu wakewo. Apo atsogoleriwo adzamlola kuloŵa mumzindamo, nadzampatsa malo oti azikhalako.

⁵Munthu wofuna kulipsirayo akamlondola komweko, anthu amumzindamo asampereke munthu wopha mnzakeyo. Koma amtchinjirize chifukwa adachita zimenezo mwangozi, pakupha Mwisraele mnzake. Sadachite zimenezo mwachiwembu.

⁶Munthuyo adzakhala mumzindamo mpaka ataweruzidwa pamaso pa anthu onse, ndiponso mpaka mkulu wa ansembe wa nthaŵi imeneyo atafa. Pamenepo munthuyo angathe kubwereranso kwao, kumudzi kumene adachoka mothaŵa kuja.’ ”

⁷Motero cha kuzambwe kwa mtsinje wa Yordani adapatula Kedesi m'dera la Galilea, m'dziko lamapiri la Nafutali. M'dziko lamapiri la Efuremu adapatula Sekemu, ndipo m'dziko lamapiri la Yuda adapatula Kiriyati-Ariba (ndiye kuti Hebroni).

⁸Kuvuma kwa Yordani, m'mapiri aja a kuvuma kwa Yeriko m'chipululu muja, adapatula Bezeri pakati pa mizinda ya fuko la Rubeni. Pakati pa mizinda ya fuko la Gadi ku Giliyadi adapatula Ramoti. Ndipo pakati pa mizinda ya fuko la Manase ku Basani adapatula Golani.

⁹Imeneyi ndiyo inali mizinda yopulumukiramo ya Aisraele onse, ngakhalenso alendo amene ankakhala pakati pao. Aliyense wopha munthu mwangozi, osati mwadala, ankatchinjirizidwa kumeneko. Womlondola kuti amlipsire sankaloledwa kumupha munthu wothaŵayo, mlandu wake usanazengedwe pamaso pa mpingo wonse.