Read Buku Loyera - Chichewa Yos. 21 Bible Online

Yos. 21 - Buku Loyera - Chichewa bible

Yos. 21

¹Tsiku lina atsogoleri a mabanja a fuko la Levi adabwera kwa wansembe Eleazara, kwa Yoswa, mwana wa Nuni, ndi kwa atsogoleri a mabanja a mafuko onse a Aisraele.

² Aleviwo adafika ku Silo m'dziko la Kanani, nanena kuti, “Chauta adalamula kudzera mwa Mose kuti ife atipatse mizinda yokhalamo, ndiponso atipatse mabusa pozungulira mizindayo, kuti tizidyetsapo zoŵeta zathu.”

³Motero Aisraele adapatsa Aleviwo mizindayo pochita maere, pamodzi ndi mabusa a zoŵeta, kuchokera pa magawo ao omwewo, potsata zomwe Chauta adalamula.

⁴Mabanja a Kohati ndiwo anali oyambirira kupatsidwa mizinda. Alevi amene anali zidzukulu za wansembe Aroni adapatsidwa mizinda 13, kuchokera m'mafuko a Yuda, Simeoni ndi Benjamini.

⁵Ndipo Akohati otsalawo adapatsidwa mizinda khumi kuchokera m'mafuko a Efuremu ndi Dani ndiponso theka la fuko la Manase lokhala kuzambwe kwa Yordani.

⁶Ageresoni adapatsidwa mizinda 13, kuchokera m'mafuko a Isakara, Asere, Nafutali ndi theka la fuko la Manase lokhala ku Basani.

⁷Mabanja a Merari adapatsidwa mizinda 12, kuchokera m'mafuko a Rubeni, Gadi ndi Zebuloni.

⁸Aisraele onse pamodzi adapereka mizinda imeneyi kwa Alevi mwamaere, pamodzinso ndi mabusa odyetsapo zoŵeta, potsata zomwe Chauta adaalamula kudzera mwa Mose.

⁹Mizinda ya Yuda ndi Simeoni imene idapatsidwa

¹⁰kwa zidzukulu za Aroni, ku banja lina limodzi la Akohati amene anali Alevi, maina ake ndi aŵa:

¹¹adaŵapatsa mzinda wa Kiriyati-Ariba. (Araba anali bambo wa Anaki), dzina lake linanso ndi Hebroni. Mzindawo unali m'dziko la Yuda lamapiri lija, pamodzinso ndi mabusa a zoŵeta kuzungulira mzindawo.

¹²Komabe minda ya mzindawo pamodzi ndi midzi yake yomwe, adaipatsa Kalebe mwana wa Yefune, kuti ikhale choloŵa chake.

¹³Choncho midzi yonse imene ili m'munsimuyi, adaipatsa zidzukulu za Aroni wansembe. Poyamba Hebroni, umene unali mzinda wopulumukiramo aliyense woimbidwa mlandu wa kupha mnzake mwangozi, pamodzi ndi mabusa odyetsapo zoŵeta, ndiponso Libina,

¹⁴Yatiri, Esitemowa,

¹⁵Holoni, Debiri,

¹⁶Aini, Yuta ndi Betesemesi. Yonse pamodzi inalipo mizinda isanu ndi inai kuchokera m'mafuko aŵiri aja a Yuda ndi Simeoni, kuphatikizapo mabusa a zoŵeta.

¹⁷A fuko la Benjamini adapereka Gibiyoni, Geba,

¹⁸Anatoti ndi Alimoni. Yonse pamodzi inalipo mizinda inai, kuphatikizapo mabusa a zoŵeta.

¹⁹Ansembe, zidzukulu za Aroni, adapatsidwa mizinda 13, kuphatikizapo mabusa a zoŵeta.

²⁰Mabanja ena a Kohati, a fuko la Levi, adapatsidwa mizinda ina kuchokera ku fuko la Efuremu.

²¹Adapatsidwa Sekemu pamodzi ndi mabusa a zoŵeta. Mzindawo unali m'dziko lamapiri la Efuremu. Unalinso mzinda wopulumukiramo munthu aliyense wopha mnzake mwangozi. Adalandiranso Gezere,

²²Kibizaimu ndi Betehoroni. Yonse pamodzi inalipo mizinda inai, kuphatikizapo mabusa a zoŵeta.

²³Kuchokera ku fuko la Dani adalandirako Elitele, Gibetoni,

²⁴Ayaloni ndi Gatirimoni. Yonse pamodzi inalipo mizinda inai, kuphatikizapo mabusa a zoŵeta.

²⁵Kuchokera ku theka la Manase wakuzambwe adalandira mizinda iŵiri, Taanaki ndi Ibleamu, kuphatikizapo mabusa a zoŵeta.

²⁶Mabanja a Akohati ameneŵa adalandira mizinda khumi yonse pamodzi, kuphatikizapo mabusa a zoŵeta.

²⁷Ageresoni, gulu lina la fuko la Levi, adalandira mizinda iŵiri kuchokera ku theka la Manase wakuvuma: Golani ku Basani, mzinda wopulumukirapo munthu wopha mnzake mwangozi, ndi Besetera, pamodzi ndi mabusa a zoŵeta.

²⁸Kuchokera ku fuko la Isakara, adalandira Kisiyoni, Daberati,

²⁹Yaramuti ndi Enganimu. Yonse pamodzi inalipo mizinda inai kuphatikizapo mabusa a zoŵeta.

³⁰Kuchokera ku fuko la Asere adalandira Misalu, Abidoni,

³¹Helekati ndi Rehobu. Yonse pamodzi inalipo mizinda inai, kuphatikizapo mabusa a zoŵeta.

³²Kuchokera ku fuko la Nafutali, adalandira Kedesi wa ku Galilea, mzinda wopulumukiramo aliyense wopha mnzake mwangozi, ndiponso Hamotidori ndi Karitani. Yonse pamodzi inalipo mizinda itatu, kuphatikizapo mabusa a zoŵeta.

³³Mabanja osiyanasiyana a Ageresoni adalandira mizinda khumi ndi itatu, kuphatikizapo mabusa a zoŵeta.

³⁴Onse otsala a fuko la Levi amene anali a m'banja la Merari, adalandira mizinda iyi kuchokera ku fuko la Zebuloni: Yokoneamu, Karita,

³⁵Dimina ndi Mahalala. Yonse pamodzi inalipo mizinda inai, kuphatikizapo mabusa a zoŵeta.

³⁶Kuchokera ku fuko la Rubeni adalandira Bezeri, Yahazi,

³⁷Kedemoti ndi Mefaati. Yonse pamodzi inalipo mizinda inai, kuphatikizapo mabusa a zoŵeta.

³⁸Kuchokera ku fuko la Gadi adalandira Ramoti ku Giliyadi, mzinda wopulumukiramo munthu wopha mnzake mwangozi, ndiponso Mahanaimu,

³⁹Hesiboni ndi Yazere. Yonse pamodzi inalipo mizinda inai kuphatikizapo mabusa a zoŵeta.

⁴⁰Motero mabanja a Merari, adapatsidwa mizinda khumi ndi iŵiri mwamaere.

⁴¹Mizinda 48 ya m'dziko limene Aisraele adalandira idapatsidwa kwa Alevi, pamodzi ndi mabusa a zoŵeta.

⁴²Mzinda uliwonse unali ndi mabusa a zoŵeta.

⁴³Motero Chauta adapatsa Aisraele dziko limene Iye yemwe adaalonjeza molumbira kuti adzapatsa makolo ao. Aisraele adalandira dzikolo, nakhazikika komweko.

⁴⁴Chauta adaŵapatsa mtendere pakati pa anthu ena onse oŵazungulira, potsata zomwe Iye adaalonjeza makolo ao. Panalibe ndi mmodzi yemwe mwa adani ao amene adatha kugonjetsa Aisraele, chifukwa choti Chauta adaŵapatsa mphamvu zopambanira adani ao.

⁴⁵Zoonadi Chauta adasunga malonjezo onse amene adaachita ndi Aisraele.