Read Buku Loyera - Chichewa Yos. 23 Bible Online

Yos. 23 - Buku Loyera - Chichewa bible

Yos. 23

¹Padapita nthaŵi yaikulu chiyambire pamene Chauta adakhazikitsa mtendere pakati pa Aisraele ndi adani ao oŵazungulira. Pamenepo nkuti Yoswa atatheratu nkukalamba.

²Tsono Yoswayo adaitana Aisraele onse, pamodzi ndi akuluakulu, atsogoleri, aweruzi ndi akapitao a anthuwo, naŵauza kuti “Tsopano ine ndakalamba.

³Zonse zimene Chauta wachitira mitundu ina yonseyi chifukwa cha inu, mwazipenya. Chauta, Mulungu wanu, ndiye amene wakumenyerani nkhondo.

⁴Tamvani tsono, mitundu imene simudaipambanebe, ndaipereka kwa mafuko anu, chimodzimodzi mitundu inayo imene ndidaiwononga pakati pa Yordani ndi Nyanja Yaikulu kuzambweko.

⁵Chauta, Mulungu wanu, ndiye amene adzaŵathaŵitse pamaso panu. Inuyo mudzatenga maiko ao monga momwe Chauta, Mulungu wanu, wakulonjezerani.

⁶Motero, muchenjere kuti mumvere ndi kumachitadi zonse zomwe zidalembedwa m'buku la malamulo a Mose. Musanyozere gawo lina lililonse la malamulowo,

⁷ndipo musagwirizane ndi anthu aŵa amene atsala pakati panu. Musamatchula maina a milungu yao kapena kulumbira poitchula, kapena kumaitumikira, kapenanso kumaigwadira.

⁸Mukamakhulupirira Chauta, monga momwe mwachitira mpaka tsopano lino,

⁹Chauta adzakupirikitsirani mitundu yaikuluikulu ndi yamphamvu. Mpaka pano, palibe ndi mmodzi yemwe wotha kulimbana nanu.

¹⁰ Aliyense mwa inu angathe kuthamangitsa anthu chikwi chimodzi, chifukwa Chauta ndiye akukumenyerani nkhondo monga adalonjezera.

¹¹Musamale kwambiri tsono kuti mukonde Chauta, Mulungu wanu.

¹²Mukabwerera m'mbuyo ndi kuphatikizana ndi mitundu yotsalira ili pakati panuyi, ndi kumakwatirana nayo,

¹³pamenepo mudziŵe kuti Chauta, Mulungu wanu, sadzapirikitsa mitundu imeneyi pamaso panu. Koma anthuwo adzakhala ngati msampha kwa inu, kapenanso ngati khwekhwe. Adzakhalanso ngati chikoti choŵaŵa pamsana panu, kapena ngati minga zokulasani m'maso mwanu. Zimenezi zidzachitikabe mpaka inuyo mutatha m'dziko labwinoli limene Chauta, Mulungu wanu, wakupatsani.

¹⁴“Ine ndi ulendo uno tsopano. Aliyense mwa inu akudziŵa bwino lomwe mumtima mwake ndi mumzimu mwake kuti Chauta, Mulungu wanu, wakupatsani zinthu zonse zabwino zimene adaalonjeza. Zonse zimene adaalonjeza, zachitika. Palibe lonjezo ndi limodzi lomwe limene silidachitike.

¹⁵Monga momwe Chauta, Mulungu wanu, wakuchitirani zabwino zonse zimene adaanena kuti adzachita, choncho angathe kukuchitani zoipa, mpaka kukuchotsani m'dziko lokomali limene Iye adakupatsani.

¹⁶Ngati simusunga chipangano chomwe Chauta adakulamulani, mukamapita kukatumikira milungu ina ndi kumakaigwadira, Chauta adzakupserani mtima, ndipo sipadzatsala ndi mmodzi yense m'dziko labwino limene adakupatsanilo.”