Read Buku Loyera - Chichewa Yos. 3 Bible Online

Yos. 3 - Buku Loyera - Chichewa bible

Yos. 3

¹M'mamaŵa kutacha Yoswa adanyamuka. Iye, pamodzi ndi Aisraele onse, adatuluka ku Sitimu kuja, napita ku Yordani, ndipo adagona kumeneko.

²Patapita masiku atatu, atsogoleri adakayendera zithando zonse,

³namauza anthu kuti, “Mukadzaona ansembe Achilevi aja atanyamula Bokosi lachipangano la Chauta, Mulungu wanu, mudzanyamuke pamalo panu ndi kuŵatsata.

⁴Potero mudzaidziŵa njira yoyenera kutsata, popeza kuti nkale lomwe kumeneko simudadzereko. Komatu tsono Bokosi lachipanganolo musaliyandikire. Pakati pa inu ndi Bokosilo pazikhala mtunda wosachepera kilomita imodzi.”

⁵Motero Yoswa adauza anthu onse kuti, “Mudzisungetu tsono, chifukwa maŵa Chauta adzachita zodabwitsa zazikulu pakati panu.”

⁶M'maŵa mwake Yoswa adauza ansembe kuti, “Nyamulani Bokosi lachipangano la Chauta, muwoloke, mutsogolere anthuwo.” Iwowo adachitadi monga momwe Yoswa adanenera.

⁷Apo Chauta adauza Yoswa kuti, “Zimene ndikuchita lerozi, ndizo zidzapatse Aisraele onse mtima wokulemekeza iwe, kuti ndiwe munthu wamkulu. Ndipo adzadziŵa kuti Ine ndili nawe monga momwe ndidakhalira ndi Mose.

⁸Ansembe amene akunyamula Bokosi lachipangano la Chauta, uŵalamule kuti, ‘Mukafika ku mtsinje wa Yordani, muloŵe m'madzimo ndi kuima m'mphepete.’ ”

⁹Tsono Yoswa adaŵauza anthuwo kuti, “Bwerani kuno, mudzamve zimene Chauta, Mulungu wanu, akukuuzani.

¹⁰Motero mudzadziŵa kuti Mulungu wamoyo ali pakati panu. Inu mukamapita patsogolo, Iye adzapirikitsa Akanani onse, pamodzi ndi Ahiti, Ahivi, Aperizi, Agirigasi, Aamori ndi Ayebusi.

¹¹Pamenepo Bokosi lachipangano la Chauta wa dziko lonse lapansi liwoloke Yordani patsogolo panu.

¹²Tsopano musankhe amuna khumi ndi aŵiri kuchokera ku fuko lililonse la Aisraele.

¹³Ansembe onyamula Bokosi lachipangano la Chauta, Ambuye a dziko lonse lapansi, akangoponda madziwo, madzi onse a Yordani ochokera kumtunda adzaleka kuyenda, ndipo adzaima ngati chipupa.”

¹⁴Nyengo imeneyo inali ya kholola, ndipo mtsinje unali wodzaza kwambiri. Anthu onse adachoka ku zithando kukaoloka mtsinje wa Yordani uja. Ansembe ndiwo anali patsogolo, atanyamula Bokosi lachipangano la Chauta lija.

¹⁵Pamene ansembewo adafika pa chibumi cha Yordani, natsikira m'madzimo ndi kuponda madziwo,

¹⁶madzi onse adaima osayendanso. Madzi akumtunda adaundana ngati khoma lalitali, kuchokera ku Adama mpaka ku mzinda wa Zaretani. Madzi othamangira ku nyanja ya Araba, ndiye kuti Nyanja Yakufa, adatheratu pamalopo, ndipo anthu adaolokera tsidya lina, pafupi ndi Yeriko.

¹⁷Chonsecho nkuti ansembe onyamula Bokosi lachipangano la Chauta aja ataima pakatimpakati pa mtsinje wa Yordani uja, mpaka anthu onse adatha kuwoloka.