Read Buku Loyera - Chichewa Yos. 5 Bible Online

Yos. 5 - Buku Loyera - Chichewa bible

Yos. 5

¹Mafumu onse a Aamori amene ankakhala kuzambwe kwa Yordani, pamodzi ndi mafumu a Akanani okhala m'mphepete mwa nyanja, adamva kuti Chauta adaumitsa Yordani pamene Aisraele ankaoloka. Choncho adachita mantha, ndi kutayiratu mtima chifukwa cha Aisraelewo.

²Tsono Chauta adauza Yoswa kuti, “Sema miyala ngati mipeni, kuti uumbalire Aisraeleŵa.”

³Yoswa adasemadi mipeni yamiyalayo, naŵaumbala onsewo ku phiri lotchedwa “Koumbalira.”

⁴Adachita zimenezi chifukwa amuna amene anali oyenera kuponya nkhondo onse adaatha nkufa m'chipululu atatuluka ku Ejipito kuja.

⁵Anthu onse amene adaatuluka ku Ejipito anali ataumbalidwa kale, koma onse obadwira m'chipululu pa nthaŵi ya ulendo wofuma ku Ejipito anali osaumbalidwa.

⁶Aisraele adakhala akuyenda m'chipululu zaka makumi anai, mpaka adafa amuna onse amene potuluka ku Ejipito anali a msinkhu woyenera pa nkhondo. Adatha nkufa, popeza kuti sadamvere Chauta. Iye adaachita kuŵalumbirira kuti sadzaloŵamo m'dziko lamwanaalirenji lija limene adaalonjeza kwa makolo ao kuti adzaŵapatsa.

⁷Koma ana ao amene adaloŵa m'malo mwao, sadaumbalidwe pamene anali paulendo m'chipululumo, ndipo ndiwo amene Yoswa adalamula kuti aumbalidwe.

⁸Kuumbalako kutatha, Aisraele onse ankangokhala m'zithandomo kudikira kuti zilonda zipole.

⁹Tsono Chauta adauza Yoswa kuti, “Lero ndakuchotserani manyazi a ukapolo wanu uja umene munali nawo ku Ejipito.” Nchifukwa chake malowo adaŵatcha Giligala,[1] ndipo mpaka lero lino malo ameneŵa akudziŵika ndi dzina limeneli.

¹⁰ Pamene Aisraele anali m'zithando ku Giligala m'chigwa cha ku Yeriko, adachita Paska madzulo pa tsiku la 14 la mwezi woyamba womwewo.

¹¹M'maŵa mwake mpamene anthu aja adayamba kudya chakudya cha ku Kanani. Adakazinga tirigu, naphikanso buledi wosatupitsa tsiku limenelo.

¹² Zitangotero, mana uja adaleka kugwa, ndipo sadapezekenso pakati pa Aisraele. Kuyambira nthaŵi imeneyo adayamba kudya chakudya cha ku Kanani.

¹³Tsiku lina pamene Yoswa anali pafupi ndi Yeriko, mwadzidzidzi adaona munthu ataimirira kutsogolo kwake, lupanga losolola lili m'manja. Tsono Yoswa adapita pomwe panali munthupo, namufunsa kuti, “Kodi iwe ndiwe mmodzi wa ankhondo athu kapena ndiwe mdani wathu?”

¹⁴Munthu uja adayankha kuti, “Sindine mmodzi mwa ankhondo anu kapenanso mdani wanu. Ndine mtsogoleri wa gulu lankhondo la Chauta pano.” Choncho Yoswa adadzigwetsa pansi chafufumimba naati, “Ine ndine wantchito wanu, mbuyanga. Nanga mufuna kuti ndichite chiyani?”

¹⁵Wolamula gulu lankhondo la Chauta uja adamuyankha kuti, “Vula nsapato zako. Malo amene ukuimirirapoŵa ngoyera.” Yoswa adachitadi zimene adamuuzazo.