Read Buku Loyera - Chichewa Yos. 7 Bible Online

Yos. 7 - Buku Loyera - Chichewa bible

Yos. 7

¹Koma Aisraele ena sadamvere lamulo la Chauta loti asatenge kanthu kena kalikonse koyenera kuwonongedwa. Tsono amene adaagwinyako zinthuzo, anali Akani. Iyeyu anali mwana wa Karimi, mwana wa Zabidi, mwana wa Zera, wa fuko la Yuda. Choncho Chauta adakwiyira Aisraele onse kwambiri.

²Atagonjetsa Yeriko, Yoswa adatuma anthu ena kuti akazonde mzinda wa Ai. Mzinda umenewu unali kuvuma kwa Betele, pafupi ndi Betaveni. Ataŵatuma kuti akazonde mzindawo, anthu aja adapitadi nazonda mzinda wa Ai.

³Atabwerera kwa Yoswa, anthuwo adamuuza kuti, “Sikofunikira kuti tipite tonse kumeneko. Ingotumani anthu zikwi ziŵiri kapena zitatu kuti akathire nkhondo mzinda wa Ai. Musatume anthu onse kumeneko poti si mzinda waukulu.”

⁴Motero Yoswa adangotuma anthu ngati zikwi zitatu. Koma tsono anthu a ku Ai adapirikitsa Aisraelewo.

⁵Anthu a ku Ai adathamangitsa Aisraele kuchokera ku chipata cha mzindawo mpaka ku ngwenya. Aisraele okwanira ngati 36 adaphedwa, makamaka pamene ankatsika phiri. Motero Aisraele onse adataya mtima, ndipo adachita mantha kwambiri.

⁶Yoswa atamva zimenezi, adamva chisoni kwambiri, ndipo adang'amba zovala zake, nagwada patsogolo pa Bokosi lachipangano la Chauta lija. Atsogoleri onse a Aisraele nawonso adadzigwetsa pansi pa malo omwewo mpaka madzulo, atadzola fumbi kumutu, kusonyeza chisoni chaocho.

⁷Tsono Yoswa adati, “Kalanga ine Chauta! Chifukwa chiyani mudatiwolotsa Yordani? Kani mudatipereka m'manja mwa Aamori kuti atiwononge chotere? Bwanji osangotileka kuti tikhale tsidya ilo la Yordani?

⁸Nanga ndinene chiyani tsopano, Chauta, poona kuti Aisraele athamangitsidwa ndi adani ao chotero?

⁹Akanani ndi anthu ena onse okhala m'dziko muno adzamva zimenezi, ndipo adzatizinga ndi kutipha tonse. Kodi pamenepa inu mudzachitapo chiyani kuti ulemu wanu usaonongeke?”

¹⁰Chauta adamuuza Yoswa kuti, “Dzuka, chifukwa chiyani wagwada pansi chotere?

¹¹Aisraele ena adachimwa. Chipangano chija ndidapangana nawochi sadasunge. Zinthu zija ndidaŵauza kuti aonongezi, adagwinyako. Adabako, ndi kunenanso bodza, namaika zinthu zakubazo pakati pa zinthu zao.

¹²Nchifukwa chake Aisraele sangathe kulimbana ndi adani ao. Athaŵa pamaso pa adani ao chifukwa choti iwowo ngoyenera kuwonongedwa. Sindidzakhala nawonso mpaka utaononga zinthu zimene ndidakulamula kuti usatenge.

¹³Nyamuka, ukalamule anthu kuti adzipatule, kuti akonzekere kuwonana ndi Ine maŵa, chifukwa Ine Mulungu wa Aisraele ndidzaŵauza kuti, ‘Inu Aisraele, zinthu zija ndidaakuuzani kuti muwonongezi, zili pakati panu. Inu simungalimbe polimbana ndi adani anu, mpaka zinthu zimenezi mutachotsa.’

¹⁴Motero maŵa m'maŵa, mutulukire poyera nonsenu, fuko limodzilimodzi. Fuko limene Ine Chauta ndidzaliloze lidzabwera patsogolo, mbumba imodziimodzi. Mbumba imene ndidzailoze idzabwera patsogolo, banja limodzilimodzi. Banja limene ndidzaliloze lidzabwera patsogolo, munthu mmodzimmodzi

¹⁵Yemwe adzapezeke ndi zinthu zimenezo, adzatenthedwa pamodzi ndi banja lake lonse ndi zonse zomwe ali nazo. Chinthu chimene wachitacho nchoopsa, chifukwa waphwanya pangano lomwe anthu anga adachita ndi Ine.”

¹⁶M'maŵa mwake Yoswa adadzuka m'mamaŵa, natulutsa Aisraele onse fuko limodzilimodzi. Fuko la Yuda lidalozedwa.

¹⁷Mbumba zonse za fuko la Yuda adazitulutsira poyera, ndipo mbumba ya Zera idagwidwa. Tsono mabanja a Zera adaŵatulutsira poyera, ndipo banja la Zabidi lidagwidwa.

¹⁸Pompo Yoswa adatulutsa anthu onse a banja la Zabidi, ndipo Akani adagwidwa. Iyeyo anali mwana wa Karimi, mwana wa Zabidi, mwana wa Zera, wa fuko la Yuda.

¹⁹Tsono Yoswa adauza Akani kuti, “Iwe mwana wanga, lemekeza Chauta, Mulungu wa Aisraele, ndipo umtamande. Uze tsopano lino zimene wachita. Usati undibisire.”

²⁰Akani adayankha kuti, “Indedi, ine ndidachimwa, ndidachimwira Chauta, Mulungu wa Aisraele, ndipo zimene ndidachita ndi izi:

²¹pakati pa chuma chija, ndidaonapo mwinjiro wokongola wa ku Babiloni, ndi makilogramu aŵiri a siliva ndiponso munsi wa golide wolemera theka la kilogramu. Zonsezi ndidaazikhumba kwambiri, kotero kuti ndidatenga ndithu. Mungathe kuzipeza m'chithando changa m'mene ndidazibisa. Mukapezanso silivayo pansi pa zinthu zinazo.”

²²Motero Yoswa adatuma anthu ena kuti apite kuchithandoko, ndipo adakapezadi kuti zonsezo adazibisa kumeneko, ndipo kuti silivayo adamubisadi pansi.

²³Adazitulutsa zonsezo m'chithandomo, napita nazo kwa Yoswa ndi kwa Aisraele onse. Ndipo adaziika pamaso pa Chauta.

²⁴Yoswa ndi Aisraele onse adamtenga Akani ndi zinthu zimene adapezeka nazo zija monga silivayo, mwinjiro ndi munsi wa golide uja. Adatenganso ana ake aamuna ndi aakazi omwe, ndi zoŵeta zake, ng'ombe, abulu, nkhosa, ndi hema lake ndi zonse zomwe anali nazo. Zonsezo adapita nazo ku chigwa chotchedwa Akori.

²⁵Tsono Yoswa adati, “Chifukwa chiyani watiputira mavuto otereŵa? Tsopano Chauta ndiye amene adzetse mavuto ameneŵa pa iwe!” Pompo anthu onsewo adamponya miyala Akani, namupha. Adaponya miyala banja lake lonse, mpakanso kulitentha pamodzi ndi zake zonse.

²⁶Adaunjika mulu waukulu wamiyala pa iyeyo, ndipo muluwo ulipo mpaka lero lino. Nchifukwa chake mpaka lero chigwa chimenechi amachitchula kuti “Chigwa cha Mavuto.” Motero mtima wa Chauta udatsika.