Read Buku Loyera - Chichewa Yos. 8 Bible Online

Yos. 8 - Buku Loyera - Chichewa bible

Yos. 8

¹Pambuyo pake Chauta adauza Yoswa kuti, “Usachite mantha kapena kutaya mtima. Tenga ankhondo onse, ndipo upite nawo ku Ai. Ndidzapereka m'manja mwanu mfumu ya ku Ai pamodzi ndi anthu ake onse. Mzindawo pamodzi ndi dzikolo, zonsezo zidzakhala zanu.

²Mzinda wa Ai ndi mfumu yake yomwe, muuchite zomwe mudachita Yeriko ndi mfumu yake. Koma katundu wamumzindamo ndi zoŵeta, musunge zikhale zanu. Muulalire mzindawo, ndipo muuthire nkhondo cha kumbuyo kwake.”

³Motero Yoswa adakonzeka ndi ankhondo ake kupita ku Ai. Adasankhula ankhondo ena olimba mtima zikwi makumi atatu, ndipo adaŵatuma usiku.

⁴Adaŵapatsa malamulo akuti, “Kabisaleni kumbuyo kwa mzindawo. Musakapite patali ndi mzindawo, koma kakhaleni okonzekera kuuthira nkhondo.

⁵Anthu anga pamodzi ndi ine ndiye tidzayambe kuuputa mzindawo cha kumaso kwake. Tsono akadzangotuluka kuti alimbane nafe, ife tidzabwerera m'mbuyo, monga momwe tidachitira tsiku lina lija.

⁶Adzatithamangitsa motero, mpaka ife titaona kuti ali kutali ndi mzindawo, chifukwa iwowo azidzati, ‘Akutithaŵa monga kale lija.’

⁷Pamenepo tsono mudzatuluke kuja mudzakhale mutabisalaku, ndipo mudzalanda mzindawo. Chauta, Mulungu wanu, adzakupatsani mzinda umenewo.

⁸Mutaulanda, dzauyatseni moto, monga Chauta walamulira. Ameneŵa ndiwo malamulo amene ndakupatsani.”

⁹Motero Yoswa adaŵatuma, ndipo iwo adapita ku malo obisalakowo kukaulalira mzindawo. Malowo anali cha kuzambwe kwa Ai, pakati pa Ai ndi Betele. Koma Yoswa ndi gulu lake lankhondo adakhala m'zithando usiku wonse.

¹⁰M'mamaŵa, Yoswa adadzuka naitana ankhondo ake onse. Tsono iyeyo ndi atsogoleri a Aisraele, adapita ku Ai.

¹¹Ankhondo omwe anali ndi iyeyo adatsogolako, nakamanga zithando chakumpoto kupenyana ndi chipata cha mzindawo. Pakati pa iwowo ndi mzinda wa Aiwo panali chigwa.

¹²Yoswa adapatula anthu zikwi zisanu, naŵabisa cha kuzambwe kwa mzindawo, pakati pa Ai ndi Betele.

¹³Adakhazika ankhondo mokonzekera nkhondo, ndipo gulu lalikulu la ankhondowo lidamanga zithando cha kumpoto kwa mzinda, m'chigwamo, koma gulu lina lija lidakamanga chakuzambwe.

¹⁴Mfumu ya ku Ai itaona anthu a Yoswawo, idachita zinthu mofulumira. Pamodzi ndi anthu ake idapita ku malo otsika oyang'anana ndi Araba, kuti ikamenyane ndi Aisraele kumeneko ngati kale lija. Iyo sinkadziŵa kuti aithira nkhondo cha kumbuyo kwake.

¹⁵Yoswa pamodzi ndi anthu akewo adachita ngati akuthaŵa, kumaloŵera chakuthengo ndithu.

¹⁶Anthu onse amumzindamo adauzidwa kuti aŵatsate pambuyo, ndipo pamene ankapirikitsa Yoswa, iyeyo ankathaŵira kutsogolo ndithu, kutalikirana ndi mzinda wao uja.

¹⁷Choncho mwamuna aliyense wamumzindamo anali atatulukamo kuthamangitsa Aisraele. Mzindawo udangotsala wokha, popanda woti angautchinjirize.

¹⁸Tsono Chauta adauza Yoswa kuti, “Loza mkondo wako ku Ai. Mzindawu ndikukupatsa iwe.” Yoswa adachitadi monga adamuuzira.

¹⁹Tsono atangokweza dzanja lake, anthu amene adabisala aja, adavumbuluka msangamsanga, adathamangira mu mzindawo naugonjetsa, ndipo adautentha pomwepo.

²⁰Anthu a ku Ai aja atacheukira m'mbuyo adangoona utsi uli tolotolo! Malo oti iwowo athaŵireko panalibe, chifukwa choti Aisraele aja adaathaŵira kuthengoŵa adabwerera kudzalimbana nawo.

²¹Yoswa ndi anthu anali nawo aja, ataona kuti anzao aja alanda mzindawo, ndipo kuti utsi uli tolotolo, adatembenuka nayamba kupha anthu a ku Ai aja.

²²Nawonso Aisraele amene anali mumzindamo adabwera kudzalimbana ndi anthu a ku Ai. Choncho onsewo anali atazingidwa ndi Aisraele, ndipo onsewo adaphedwa.

²³Palibe ndi mmodzi yemwe amene adapulumuka kapena kutulukamo wamoyo, koma mfumu ya ku Ai yokha. Mfumuyo adaigwira, napita nayo kwa Yoswa.

²⁴Motero Aisraele adapha adani ao m'chigwa ndi m'thengo m'mene adaŵapirikitsira. Ndipo adabwereranso ku Ai, naphanso otsala amene anali kumeneko.

²⁵Chiŵerengero chonse cha anthu a ku Ai amene adaphedwa pa tsikulo chinali zikwi khumi ndi ziŵiri, amuna ndi akazi omwe pamodzi.

²⁶Yoswa ankalozabe mkondo wake uja ku Ai, osatsitsa dzanja lake mpaka munthu aliyense mumzindamo ataphedwa.

²⁷Ndipo Aisraele adatenga zoŵeta ndi katundu yense wamumzindawo, monga momwe Chauta adauzira Yoswa.

²⁸Pomwepo Yoswa adautentha mzinda wa Ai, nausiya bwinja monga uliri leromu.

²⁹Mfumu ya mzindawo adaipachika pa mtengo ndi kuisiya pompo mpaka madzulo. Madzulo ndi kachisisira, Yoswa adalamula kuti akatsitse mtembowo, ndipo atatero adautaya pansi ku chipata cha mzindawo. Pamwamba pa mtembowo adaunjikapo mulu wa miyala. Muluwo uli pomwepo mpaka lero lino.

³⁰ Tsono Yoswa adamangira Chauta guwa pa phiri la Ebala.

³¹ Adalimanga potsata malangizo amene Mose mtumiki wa Chauta adaapatsa Aisraele, ndi potsata mau a m'buku la malamulo a Mose onena kuti, “Guwa likhale la miyala yosasema ndi zipangizo zachitsulo.” Pa guwa limenelo adaperekapo nsembe zopsereza kwa Chauta, ndipo adaperekanso zopereka zamtendere.

³²Kumeneko, Aisraele onse akupenya, Yoswa adalemba pa miyala chitsanzo cha malamulo aja amene Mose adaalemba.

³³ Aisraele onse, pamodzi ndi atsogoleri ao, akuluakulu ao, aweruzi ao ndiponso alendo omwe amene anali pakati pao, adaimirira pa mbali ziŵiri za Bokosi lachipangano lija, ena uku ena uku, moyang'anana ndi ansembe Achilevi amene anali kunyamula Bokosilo. Theka lina la anthu lidaimirira kuyang'anana ndi phiri la Gerizimu, ndipo theka lina kuyang'anana ndi phiri la Ebala. Pachiyambi penipeni, Mose mtumiki wa Chauta adaaŵalamula iwowo kuti azichita zimenezi pofuna kulandira madalitso.

³⁴Tsono Yoswa adaŵerenga mau onse a malamulo momveka bwino, pamodzi ndi madalitso ndiponso matemberero, monga momwe zidalembedwera m'buku la malamulo a Mose.

³⁵Yoswayo adaŵerenga lililonse mwa malamulo a Mose, kuŵerengera anthu onse amene adasonkhana. Akazi ndi ana, pamodzi ndi alendo omwe okhala pakati pao, anali pomwepo.