Read Buku Loyera - Chichewa 2 Ate. 2 Bible Online

2 Ate. 2 - Buku Loyera - Chichewa bible

2 Ate. 2

¹Pa za kubweranso kwa Ambuye athu Yesu Khristu, ndiponso za kusonkhana kwathu kuti tikakumane naye, tifuna kukupemphani kanthu, abale.

²Maganizo anu asasokonezeke msanga, ndipo musaopsedwe ndi mau akuti, “Tsiku la Ambuye lafika,” ngakhale anene kuti mauwo ngochokera kwa Mzimu Woyera, kapena kuti taŵanena ndife, kapena tachita kuŵalemba m'kalata.

³Musalole kuti wina akupusitseni mwa njira iliyonse. Pajatu lisanafike tsikulo, kudzayamba kwachitika zoti anthu ochuluka akupandukira Mulungu, ndipo kudzaoneka Munthu Woipitsitsa uja, woyenera kutayikayu.

⁴ Ameneyu ndi mdani, ndipo adzadziika pamwamba pa chilichonse chimene anthu amachitcha mulungu kapena amachipembedza, kotero kuti mwiniwakeyo adzadzikhazika m'Nyumba ya Mulungu ndi kudzitcha Mulungu.

⁵Kodi simukukumbukira kuti ndinkakuuzani zimenezi muja ndinali kwanuko?

⁶Mukudziŵanso chimene chikumletsa kuwoneka tsopano, koma adzaululuka ndithu pa nthaŵi yake.

⁷Ngakhale tsopano lomwe lino uchimo wayamba kugwira ntchito mobisika. Koma zoyenera kuchitikazo sizidzachitika mpaka amene akuletsa uchimowo tsopano atayamba wachotsedwa.

⁸ Tsono pamenepo Munthu Woipitsitsa uja adzaululuka. Ndipo Ambuye Yesu adzamthetsa ndi mpweya wa m'kamwa mwake, nkumuwonongeratu ndi maonekedwe ake aulemerero a kubwera kwake.

⁹ Munthu Woipitsitsa uja adzabwera ndi mphamvu za Satana. Adzachita zamphamvu zosiyanasiyana, ndiponso zizindikiro ndi zozizwitsa zonyenga.

¹⁰Mwa njira iliyonse adzanyenga anthu amene adzaonongedwa chifukwa chokana kukonda choona chimene chikadaŵapulumutsa.

¹¹Nchifukwa chake Mulungu adzatumiza mphamvu zoŵasokoneza, kuti akhulupirire zonama.

¹²Motero adzalangidwa onse amene sadakhulupirire choona, koma adakondwerera kusalungama.

¹³Koma ife tikuyenera kumathokoza Mulungu nthaŵi zonse chifukwa cha inu, abale, amene Ambuye amakukondani. Paja Mulungu adakusankhani pachiyambi pomwe kuti mupulumuke. Mudapulumuka chifukwa Mzimu Woyera adakusandutsani anthu akeake a Mulungu, ndipo mudakhulupirira choona.

¹⁴Mulungu adakuitanirani zimenezi kudzera mwa Uthenga Wabwino umene tidakulalikirani. Adakuitanani kuti mulandire nao ulemerero wa Ambuye athu Yesu Khristu.

¹⁵Tsono abale, khalani olimbika, ndipo mugwiritse miyambo imene tidakuphunzitsani ndi mau apakamwa kapena am'makalata.

¹⁶Mulungu Atate athu adatikonda, ndipo mwa kukoma mtima kwake adatipatsa kulimba mtima kosatha ndi chiyembekezo chokoma.

¹⁷Iye pamodzi ndi Yesu Khristu Ambuye athu athuzitse mitima yanu ndi kukupatsani mphamvu za kuchita ndi kulankhula zabwino zilizonse.