Read Buku Loyera - Chichewa Owe. 10 Bible Online

Owe. 10 - Buku Loyera - Chichewa bible

Owe. 10

¹Atafa Abimeleki, padabwera winanso wodzapulumutsa Aisraele. Iyeyu anali Tola, mwana wa Puwa, mdzukulu wa Dodo, wa fuko la Isakara. Ankakhala ku Samiri, m'dziko lamapiri la Efuremu.

²Adaweruza Aisraele zaka 23. Pambuyo pake adamwalira, naikidwa ku Samiri.

³Atafa Tola padabwera Yairo Mgiliyadi amene adaweruza Aisraele zaka 22.

⁴Iyeyu anali nawo ana makumi atatu amene ankakwera pa abulu makumi atatu. Anawo anali nayonso mizinda makumi atatu imene mpaka pano ikutchedwa Havoti-Yairo m'dziko la Giliyadi.

⁵Pambuyo pake Yairo adamwalira, naikidwa ku Kamoni.

⁶Aisraele adachitanso zoipira Chauta potumikira Abaala ndi Aasitaroti, milungu ya ku Siriya, milungu ya ku Sidoni, milungu ya ku Mowabu, milungu ya Aamoni ndiponso milungu ya Afilisti. Aisraelewo adasiyadi Chauta osamamtumikiranso ai.

⁷Tsono Chauta adaŵapsera mtima Aisraele, ndipo adalola kuti Afilisti ndi Aamoni aŵagonjetse.

⁸Chaka chimenecho anthuwo adagonjetseratu Aisraele nayamba kuŵasautsa. Pa zaka 18, adakhala akuŵasautsa Aisraele onse amene anali patsidya pa mtsinje wa Yordani m'dziko la Aamori, ku Giliyadi.

⁹Ndipo Aamoni adaoloka mtsinje wa Yordani kukamenyana nkhondo ndi fuko la Yuda, la Benjamini ndiponso la Efuremu, kotero kuti Aisraele adazunzika kwambiri.

¹⁰Tsono Aisraele adalira kwa Chauta nati, “Takuchimwirani popeza kuti tasiya Inu Mulungu wathu ndipo tatumikira Abaala.”

¹¹Chauta adafunsa Aisraele kuti, “Kodi suja Ine ndidakupulumutsani kwa Aejipito, Aamori, Aamoni ndi Afilisti?

¹²Pamene Asidoni, Aamaleke ndi Amaoni, adaakusautsani, inu nkundilirira kuti ndikuthandizeni, suja Ine ndidakupulumutsani kwa anthu amene aja?

¹³Komabe Ine mwandisiya, mukutumikira milungu ina. Nchifukwa chake sindidzakupulumutsaninso.

¹⁴Pitani mukalirire milungu imene mwaisankhulayo. Ikupulumutseni milungu imeneyo pa nthaŵi ya kuzunzika kwanu.”

¹⁵Apo Aisraele adayankha Chauta kuti, “Ai, tachimwadi ife, tichiteni zimene zikukomereni. Tapota nanu, mungotipulumutsako lero lokha.”

¹⁶Choncho adachotsa milungu yachilendo pakati pao nayamba kutumikira Chauta, ndipo Chauta adamva chisoni poona Aisraele akuzunzika.

¹⁷Nthaŵi imeneyo Aamoni adasonkhana kuti adzamenye nkhondo, ndipo adakamanga zithando zankhondo ku Giliyadi. Aisraele nawonso adasonkhana nakamanga zithando zao ku Mizipa.

¹⁸Tsono anthuwo ndi atsogoleri a Agiliyadi adayamba kufunsana kuti, “Kodi munthu woti ayambe kumenyana ndi Aamoniŵa ndani? Iyeyo ndiye amene akhale mtsogoleri wolamulira anthu onse a ku Giliyadi.”