Read Buku Loyera - Chichewa Owe. 12 Bible Online

Owe. 12 - Buku Loyera - Chichewa bible

Owe. 12

¹Aefuremu adakonzeka kuti akamenye nkhondo, ndipo adaolokera ku Zafoni nakafunsa Yefita kuti, “Chifukwa chiyani udaaoloka kukamenya nkhondo ndi Aamoni, ife osatiitana kuti tipite nao? Tikutenthera m'nyumba mwakomu.”

²Yefita adaŵauza kuti, “Ine ndi anthu anga tidaakangana kwambiri ndi Aamoni. Ndidakuitanani, koma inu simudadzandipulumutse kwa iwowo.

³Ndipo nditaona kuti simunkafuna kundipulumutsa, ndidangochita utotomoyo nkuwoloka Yordani kukalimbana nawo Aamoni. Chauta adatithandiza kuŵagonjetsa. Chifukwa chiyani tsono mwabwera kwa ine lero lino kuti mudzachite nane nkhondo?”

⁴Tsono Yefita adasonkhanitsa anthu onse a ku Giliyadi namenyana nkhondo ndi Aefuremu. Ndipo Agiliyadi adagonjetsa Aefuremu chifukwa chakuti Aefuremuwo ankati, “Inu Agiliyadi ndinu othaŵa ku Efuremu, ochokera pakati pa Aefuremu ndi Amanase.”

⁵Ndipo Agiliyadi adalanda Aefuremu madooko a mtsinje wa Yordani. Pamene aliyense wothaŵa ku Efuremu ankati, “Ndiloleni ndiwoloke,” Agiliyadi ankamufunsa kuti, “Kodi ndiwe Mwefuremu?” Iye akayankha kuti, “Ai”,

⁶iwo ankamuuza kuti, “Chabwino, nena kuti, ‘Shiboleti.’ ” Munthuyo ankati, “Siboleti,” pakuti sankatha kutchula bwino mauwo. Ankamugwira ndi kumupha pompo pa madooko a mtsinje wa Yordani. Nthaŵi imeneyo adaphedwa Aefuremu 42,000.

⁷Yefita adaweruza Aisraele zaka zisanu ndi chimodzi. Pambuyo pake Yefita, amene anali Mgiliyadi, adamwalira, ndipo adaikidwa mu mzinda wake wa Giliyadi.

⁸Atafa Yefita, Ibizani wa ku Betelehemu adaweruza Aisraele.

⁹Iyeyu anali ndi ana aamuna makumi atatu ndiponso ana aakazi makumi atatu. Adakwatitsa ana aakazi makumi atatuwo kwa anthu osakhala a fuko lake, ndipo adakatengera ana ake aamuna aja ana aakazi makumi atatu a fuko lachilendo. Ibizaniyo anali mtsogoleri wa Aisraele zaka zisanu ndi ziŵiri.

¹⁰Pambuyo pake adamwalira, ndipo adaikidwa ku Betelehemu.

¹¹Ibizani atafa, Eloni Mzebuloni adasanduka mtsogoleri wa Aisraele. Iyeyu adatsogolera Aisraele zaka khumi.

¹²Pambuyo pake adamwalira, naikidwa ku Ayaloni m'dziko la Zebuloni.

¹³Atafa iyeyo, Abidoni mwana wa Hilele Mpiratoni, adatsogolera Aisraele.

¹⁴Iye anali ndi ana aamuna makumi anai ndi adzukulu makumi atatu amene ankakwera pa abulu makumi asanu ndi aŵiri. Iye adatsogolera Aisraele zaka zisanu ndi zitatu.

¹⁵Ndipo Abidoniyo adamwalira, naikidwa ku Piratoni m'dziko la Efuremu, ku mapiri a Aamaleke.