Read Buku Loyera - Chichewa Owe. 13 Bible Online

Owe. 13 - Buku Loyera - Chichewa bible

Owe. 13

¹Aisraele adachimwiranso Chauta. Ndipo Chauta adaŵapereka m'manja mwa Afilisti pa zaka makumi anai.

²Ku Zora kunali munthu wina, wa fuko la Dani, dzina lake Manowa. Mkazi wake analibe ana, anali wosabereka.

³Mngelo wa Chauta adamuwonekera mkaziyo namuuza kuti, “Inu mai, ngakhale mpaka pano muli opanda ana, komabe mudzakhala ndi pathupi ndipo mudzabala mwana wamwamuna.

⁴Ndiye inu mudzisamale bwino, musamamwe vinyo kapena chakumwa china choledzeretsa, ndipo musamadye chakudya chilichonse chosaloledwa.

⁵ Pakuti ndithu mudzakhala ndi pathupi ndipo mudzabala mwana wamwamuna. Mwanayo akadzabadwa, kumutu kwake kusadzapite lumo, pakuti mnyamatayo adzakhala Mnaziri, ndiye kuti wopatulikira Mulungu kuyambira tsiku la kubadwa kwake. Ndipo adzayambapo ntchito yopulumutsa Aisraele kwa Afilisti.”

⁶Tsono mkaziyo adadzauza mwamuna wake kuti, “Munthu wa Mulungu anabwera kuno, ndipo nkhope yake inali yoopsa kwambiri ngati nkhope ya mngelo wa Mulungu. Sindidamufunse kumene akuchokera, iyenso sadandiwuze dzina lake.

⁷Koma anandiwuza kuti, ‘Mudzakhala ndi pathupi ndipo mudzabala mwana wamwamuna. Ndiye musamamwe vinyo kapena chakumwa china choledzeretsa, ndipo musamadye chakudya chosaloledwa chilichonse, chifukwa mnyamatayo adzakhala Mnaziri, wopatulikira Mulungu, kuyambira tsiku la kubadwa kwake mpaka tsiku la kufa kwake.’ ”

⁸Tsono Manowa adapemphera kwa Chauta kuti, “Inu Chauta, ndapota nanu, mulole kuti munthu amene mudaamtuma uja abwerenso, adzatiphunzitse zimene tiyenera kuchita naye mnyamata amene adzabadweyo.”

⁹Mulungu adamvera pemphero la Manowa, ndipo mngelo wa Mulungu uja adabweranso kwa mkaziyo nampeza atakhala pansi m'munda. Koma mwamuna wake Manowa sanali nao.

¹⁰Mkazi uja adathamanga nakauza mwamuna wake kuti, “Munthu uja adaabwera kuno tsiku lijaliyu wandiwonekeranso.”

¹¹Apo Manowa adanyamuka natsata mkazi wake, ndipo adakafika kumene kunali munthuyo nakamufunsa kuti, “Kodi inu ndinu amene mudaalankhula ndi amaiŵa?” Iye adayankha kuti, “Inde ndinedi.”

¹²Manowa adamufunsa kuti, “Tsono zimene mudanenazi zikadzachitikadi, kodi mnyamatayo azidzakhala bwanji, ndipo azidzachita chiyani?”

¹³Mngelo wa Chauta uja adauza Manowa kuti, “Zonse zimene ndidaŵauza amaiŵa asamale kuti azichitadi.

¹⁴Asati adye chilichonse chochokera ku mphesa, ndipo asati amwe vinyo kapena chakumwa china choledzeretsa kapenanso kudya chinthu chosaloledwa chilichonse. Asunge zonse zimene ndidaŵalamula.”

¹⁵Manowa adauza mngelo wa Chauta kuti, “Pepani, tayambani mwaima, tikuti tikuwotchereni kamwanakambuzi.”

¹⁶Koma mngelo wa Chauta adauza Manowa kuti, “Ngakhaletu mukundidikiritsa chakudyacho, ine sindidya ai. Koma ngati mukonze nsembe yopsereza, muipereke kwa Chauta.” (Monsemo nkuti Manowa ali wosazindikira kuti mlendoyo ndi mngelo wa Chauta.)

¹⁷Apo Manowa adauza mngeloyo kuti, “Timati mutiwuze dzina lanu kuti tidzakulemekezeni, zikadzachitikadi zimene mwanenazi.”

¹⁸Mngelo wa Chautayo adafunsa Manowa kuti, “Chifukwa chiyani mukufuna kudziŵa dzina langa? Dzina laketu nlodabwitsa.”

¹⁹Pamenepo Manowa adatenga kamwanakambuzi pamodzi ndi chopereka cha chakudya, nakapereka nsembe pa thanthwe kwa Chauta, Iye amene amachita zodabwitsa.

²⁰Pamene malaŵi a moto ankakwera kumwamba kuchokera paguwapo, mngelo wa Chauta uja adakwera m'malaŵi a motowo, Manowa ndi mkazi wake akuyang'ana. Apo iwo adadzigwetsa pansi, naŵeramitsa mitu pansi.

²¹Mngelo wa Chauta uja sadaŵaonekerenso Manowa ndi mkazi wake. Choncho Manowa adazindikira kuti anali mngelo wa Chauta.

²²Tsono adauza mkazi wake kuti, “Ife ndiye tifatu basi, nanga sitaona Mulungu!”

²³Koma mkazi wake adati, “Akadakhala kuti Chauta akufuna kutipha, sakadailandira nsembe yathu yopsereza ndi chopereka chathu cha chakudya chija. Ndiponso sakadatiwonetsa zinthu zonsezi kapenanso kutiwuza tsopano zinthu zonga ngati zimenezi.”

²⁴Motero mkaziyo adabala mwana wamwamuna, namutcha dzina lake Samisoni. Mnyamatayo adakula ndipo Chauta adamdalitsa.

²⁵Ndipo Mzimu wa Chauta udayamba kumlimbitsa pamene anali ku zithando za anthu a fuko la Dani, pakati pa Zora ndi Esitaoli.