Read Buku Loyera - Chichewa Owe. 20 Bible Online

Owe. 20 - Buku Loyera - Chichewa bible

Owe. 20

¹Aisraele onse adanyamuka kuyambira ku Dani mpaka ku Beereseba, kudzanso dziko la Giliyadi, ndipo adasonkhana pamaso pa Chauta ku Mizipa.

²Atsogoleri a anthu onse ndi a mafuko onse a Aisraele adabwera ku msonkhano wa anthu a Mulungu. Onse pamodzi analipo 400,000 oyenda pansi omenya nkhondo ndi lupanga.

³M'menemo nkuti anthu a fuko la Benjamini atamva kuti Aisraele apita ku Mizipa. Tsono Aisraele adati, “Tiwuze, kodi zoipa zoterezi zachitika bwanji?”

⁴Apo Mlevi uja, mwamuna wa mkazi wophedwayo, adati, “Ndidafika ku Gibea, mzinda wa Abenjamini, ineyo ndi mzikazi wanga, kuti tigone kumeneko.

⁵Anthu a ku Gibea adandiwukira nazinga nyumba imene munali ine nthaŵi ya usiku. Ankafuna kundipha ndipo adamchita zoipa mzikazi wangayo mwakhakhamizo mpaka iye adafa.

⁶Ndidamtenga mzikaziyo ndi kumduladula nthulinthuli, nkuzitumiza kwa fuko lililonse la Aisraele. Ndithudi anthu amene aja achita zinthu zonyansa ndi zoipa kwabasi m'dziko lino la Israele.

⁷Nzimenezotu, inu Aisraele, ndikuuza nonsenu, mupereke malangizo anu ndipo mupangane pompano.”

⁸Anthu onse adadzuka pamodzi nati, “Palibe munthu ndi mmodzi yemwe mwa ife amene apite ku hema lake, palibe amene abwerere kunyumba kwake.

⁹Koma tsono zimene tiŵachite anthu a ku Gibea ndi izi: tipita kukalimbana nawo mzindawo potsata zimene maere atiwuze.

¹⁰M'mafuko onse a Aisraele tisankhula anthu khumi pa anthu 100 aliwonse. Ameneŵa adzasonkhanitsa zakudya za ankhondo, ndipo ankhondowo adzapita kukalipsira anthu a ku Gibea, mzinda wa ku Benjamini, chifukwa cha tchimo lao lonyansa zedi limene adachita m'dziko la Israele.”

¹¹Motero Aisraele onse adasonkhana atagwirizana chimodzi pofuna kulimbana nawo mzindawo.

¹²Mafuko a Aisraele adatuma anthu kwa fuko lonse la Benjamini, kuti akafunse kuti, “Kodi zoipa zimene mwachita pakati panupazi nzotani?

¹³Ndiye ife tsopano tikuti mubwere nawo anthuwo, anthu achabechabe aja a ku Gibea, kuti tiŵaphe, kuti potero tichotse kulaulaku m'dziko la Israele.” Koma Abenjamini sadafune kumva mau a Aisraele, abale ao.

¹⁴Choncho Abenjamini onse adatuluka m'mizinda yao ku Gibea kukamenyana nkhondo ndi Aisraele.

¹⁵Tsiku limenelo Abenjamini adasonkhanitsa ankhondo 26,000, osaŵerenga anthu ena a ku Gibea 700 osankhidwa.

¹⁶Mwa anthu onseŵa panali anthu 700 amanzere, amene ankatha kulasa ndi mwala ngakhale tsitsi limodzi, osaphonya konse.

¹⁷Aisraele onse, kupatula Abenjamini, adasonkhanitsa anthu amalupanga 400,000, anthu ake odziŵa bwino nkhondo.

¹⁸Aisraele adanyamuka napita ku Betele kukafunsa kwa Mulungu kuti, “Ndani mwa ife amene ayambe kukamenyana nkhondo ndi Abenjamini?” Chauta adayankha kuti, “Fuko la Yuda ndilo limene liyambe.”

¹⁹Tsono Aisraele adadzuka m'maŵa nakamanga zithando zao moyang'anana ndi Gibea.

²⁰Aisraele adapita kukamenyana nkhondo ndi Abenjamini, nakhazika ankhondo ao kuyang'ana mzinda wa Gibea.

²¹Nawonso Abenjamini adatuluka ku Gibea ndipo tsiku limenelo adapha Aisraele 22,000.

²²Koma Aisraelewo adalimbitsana mtima ndipo adakhazika ankhondo ao kachiŵiri pa malo omwe aja pamene adaaŵakhazika tsiku loyamba lija.

²³Tsono Aisraelewo adapita kukalira pamaso pa Chauta mpaka madzulo. Adakafunsa Chauta kuti, “Kodi tipitenso kachiŵiri kukamenyana nawo nkhondo Abenjamini, abale athu?” Chauta adayankha kuti, “Inde pitani mukamenyane nawo.”

²⁴Choncho Aisraele adafika pafupi, kuti akalimbane ndi Abenjamini tsiku lachiŵiri lake.

²⁵Abenjamini adatulukanso mu mzinda wa Gibea, kukalimbana nawo tsiku lachiŵirilo, ndipo adapha ankhondo a Aisraele 18,000.

²⁶Tsono Aisraele onse, ndiye kuti gulu lonse la ankhondo, adapita ku Betele ndi kukalira kumeneko. Adakhala pansi pamaso pa Chauta, nasala chakudya tsiku limenelo mpaka madzulo, ndipo adapereka nsembe zopsereza ndi zamtendere pamaso pa Chauta.

²⁷Bokosi lachipangano la Chauta linali kumeneko masiku amenewo.

²⁸Finehasi mwana wa Eleazara, mwana wa Aroni, ndiye ankayang'anira bokosilo masiku amenewo. Choncho Aisraele adafunsa Chauta kuti, “Kodi tipitenso kukamenyana nawo nkhondo Abenjamini, abale athu, kapena tingoleka?” Chauta adayankha kuti, “Pitaninso, pakuti maŵa ndidzaŵapereka m'manja mwanu.”

²⁹Choncho Aisraele adaika anthu obisalira mozungulira mzinda wa Gibea.

³⁰Adapita kukamenyana ndi Abenjamini tsiku lachitatu lake, nakhazika ankhondo ao kuti athire nkhondo mzinda wa Gibea monga masiku ena aja.

³¹Abenjamini nawonso adatuluka kukamenyana nawo anthuwo, napita chapatali ndithu ndi mzindawo. Ndipo monga mwa masiku onse, adayamba kuŵamenya koopsa ndi kupha Aisraele makumi atatu amene anali m'miseu yaikulu, ena mu mseu waukulu wa ku Betele, ena mu mseu waukulu wa ku Gibea ndiponso ena kwina koyera.

³²Ndipo adati, “Taŵapirikitsa monga poyamba paja.” Koma Aisraele adati, “Tiyeni tithaŵe kuti apite ku miseu chapatali ndithu ndi mzinda wao.”

³³Choncho Aisraelewo adanyamuka m'malo ao, nakandanda ku Baala-Tamara. Pamenepo Aisraele amene adaabisalira aja adatuluka m'malo ao kuzambwe kwa Geba.

³⁴Aisraele osankhidwa amene adabwera kudzalimbana ndi mzinda wa Gibea analipo 10,000, ndipo nkhondo idalimba kumeneko. Koma Abenjamini sankadziŵa kuti zoopsa zili pafupi kuŵagwera.

³⁵Tsono Chauta adagonjetsa Abenjamini pamaso pa Aisraele, ndipo Aisraelewo adaononga ankhondo a Abenjamini okwanira 25,100 tsiku limenelo.

³⁶Motero Abenjamini adaona kuti agonjetsedwa. Paja gulu lalikulu la Aisraele lidaathaŵa Abenjamini chifukwa linkadalira anthu aja amene lidaaŵaika kuti abisalire mzinda wa Gibea.

³⁷Apo anthu obisalira aja adafulumira kuuthira nkhondo mzinda wa Gibeawo. Adapha anthu onse amumzindamo ndi lupanga.

³⁸Tsono chizindikiro chimene adaapangana Aisraele a gulu lalikulu ndi anthu obisalira aja chinali chakuti, akafukiza utsi wambiri ngati mtambo mumzindamo,

³⁹Aisraele ambiriwo abwerere kudzamenya nkhondo. M'menemo nkuti Abenjamini atayamba kuŵamenya Aisraelewo koopsa ndi kupha anthu makumi atatu. Iwo ankati, “Ndithu, taŵapha monga poyamba paja.”

⁴⁰Koma pamene utsi wachizindikiro uja udayamba kuti tolotolo kukwera kumwamba mumzindamo, Abenjamini adayang'ana kumbuyo, nkuwona mu mzinda wonsewo utsi uli tolotolo kukwera kumwamba.

⁴¹Pomwepo Aisraele adabwerera ndipo Abenjamini adayamba kuwopa ndi kutaya mtima, pakuti adaaona kuti zoopsa zili pafupi kuŵagwera.

⁴²Nchifukwa chake Abenjamini adayamba kuthaŵa Aisraelewo, naloŵa njira ya ku dondo. Koma nkhondo idaŵapeza, ndipo adaphedwa ndi Aisraele amene ankatuluka mu mzinda.

⁴³Adaŵazinga Abenjaminiwo naŵapirikitsa ndi kuŵaonongeratu osaŵachitira chifundo mpaka ku dera la Gibea kuvuma kwake.

⁴⁴Abenjamini amene adaphedwa analipo 18,000. Onsewo anali anthu olimba mtima kwambiri.

⁴⁵Anthu amene adatsalira, adatembenuka nathaŵira ku dondo ku thanthwe la Rimoni. Mwa iwowo anthu 5,000 adaphedwa m'miseu yaikulu. Adaŵapirikitsabe Abenjaminiwo mkaka ku Gidomu, naphanso enanso 2,000.

⁴⁶Choncho Abenjamini onse amene adafa tsiku limenelo adakwanira ankhondo 25,000. Onsewo anali anthu olimba mtima kwambiri.

⁴⁷Koma anthu 600 okha adakafika ku dondo ku thanthwe la Rimoni, nakakhala ku thanthwe la Rimoniko miyezi inai.

⁴⁸Tsono Aisraele adabwerera m'mbuyo kukamenyana ndi Abenjamini otsala, naŵapha ndi lupanga, anthu ndi nyama zomwe, pamodzi ndi zonse zimene adakumana nazo. Ndipo adatentha mizinda yonse imene adaipeza.