Read Buku Loyera - Chichewa Owe. 3 Bible Online

Owe. 3 - Buku Loyera - Chichewa bible

Owe. 3

¹Tsono Chauta adasiya mitundu ina ya anthu, kuti ayese nayo Aisraele, ndiye kuti Aisraele onse amene sadamenye nao nkhondo ku Kanani.

²Chauta ankangofuna kuti mibadwo yonse ya Aisraele idziŵe kumenya nkhondo, ndiponso kuti aphunzitse makamaka amene sadaidziŵe nkhondo nkale lonse.

³Mitunduyo ndi iyi: mafumu asanu a Afilisti, Akanani onse, Asidoni onse ndi Ahivi amene ankakhala ku mapiri a Lebanoni, kuyambira ku phiri la Baala-Heremoni mpaka ku mpata wa Hamati.

⁴Adaŵasiya kuti aziyesa nawo Aisraele, kuti aone ngati Aisraele adzamvera malamulo amene Chauta adaapatsa makolo ao kudzera mwa Mose.

⁵Choncho Aisraele adakhala pakati pa Akanani, Ahiti, Aamori, Aperizi, Ahivi ndi Ayebusi.

⁶Aisraelewo adayamba kukwatirana ndi anthu a mitundu imeneyo, ndiponso kukwatitsa ana ao kwa amuna a mitundu inayo. Kenaka adayamba kupembedza milungu yao.

⁷Aisraele adachita zinthu zoipira Chauta. Adaiŵala Chauta, Mulungu wao, namatumikira mafano a Abaala ndi Asitaroti.

⁸Nchifukwa chake Chauta adaŵapsera mtima Aisraelewo, naŵagulitsa kwa Kusani-Risataimu mfumu ya ku Mesopotamiya. Choncho Aisraele adatumikira Kusani-Risataimu zaka zisanu ndi zitatu.

⁹Koma pamene Aisraele adalira kwa Chauta, Chautayo adaŵautsira munthu woŵapulumutsa; amene adaŵapulumutsayo ndi Otiniyele, mwana wa Kenazi, mng'ono wake wa Kalebe.

¹⁰Mzimu wa Chauta udatsika pa iye, ndipo adasanduka mtsogoleri wa Aisraele. Adapita kukamenya nkhondo, ndipo Chauta adapereka Kusani-Risataimu, mfumu ya ku Mesopotamiya, m'manja mwake, namgonjetsa.

¹¹Motero dziko lidakhala pa mtendere zaka makumi anai. Pambuyo pake Otiniyele, mwana wa Kenazi, adamwalira.

¹²Aisraele adachitanso zinthu zoipira Chauta. Ndiye Chauta adapatsa mphamvu Egiloni, mfumu ya ku Mowabu, kuti alimbane ndi Aisraele, chifukwa chakuti iwowo adaachita zinthu zoipira Chauta.

¹³Egiloniyo adamemeza Aamoni ndiponso Aamaleke, napita kukagonjetsa Aisraele. Ndipo adalanda Yeriko, mzinda wamigwalangwa.

¹⁴Tsono Aisraele adakhala akapolo a Egiloni, mfumu ya ku Mowabu, zaka 18.

¹⁵Koma pamene Aisraele adalira kwa Chauta, Chautayo adaŵautsira munthu woŵapulumutsa. Iyeyu anali Ehudi, mwana wa Gera, wa fuko la Benjamini, munthu wamanzere. Aisraele ankatumiza msonkho kwa Egiloni, mfumu ya ku Mowabu, kudzera kwa Ehudi.

¹⁶Tsono Ehudi adasula lupanga lake lakuthwa kuŵiri, kutalika kwake masentimita 50. Ndipo adamangirira lupangalo pa ntchafu yake yakumanja m'kati mwa zovala zake.

¹⁷Adapita kukapereka msonkho kwa Egiloni, mfumu ya ku Mowabu, amene anali wonenepa kwambiri.

¹⁸Ehudi atamaliza kupereka msonkhowo, adauza anthu onyamula msonkhowo kuti azipita.

¹⁹Koma iyeyo adabwerera pa malo a miyala yozokotedwa ku Giligala, ndipo atafika kwa mfumu adati, “Zikomo amfumu, ndimati ndikuuzeni mau achinsinsi.” Pamenepo mfumuyo idalamula atumiki ake kuti akhale chete, niŵatulutsa onsewo.

²⁰Tsono Ehudi adasendera pafupi ndi mfumuyo, iyoyo itakhala yokhayokha m'chipinda cham'mwamba chozizira bwino. Ndipo adati, “Ndili ndi mau ochokera kwa Mulungu oti ndikuuzeni.” Mfumuyo idadzuka pa mpando wake.

²¹Apo Ehudi ndi dzanja lake lamanzere, adasolola lupanga pa ntchafu yake yakumanja ndi kubaya nalo mfumuyo pa mimba.

²²Lupangalo lidaloŵa ndi chigumbu chomwe, ndipo mafuta adaphimba lupangalo pakuti sadalitulutsenso m'mimbamo, adalisiya litatulukira kumbuyo.

²³Ehudi adatulukira m'khonde, atatseka ndi kukhoma zitseko za chipinda cham'mwambacho.

²⁴Ehudi atachoka, atumiki a mfumu adabwera. Ataona kuti zitseko za chipinda cham'mwamba nzokhoma, adaganiza kuti, “Kapena mfumu ikudzithandiza m'katimo.”

²⁵Iwo adadikira nthaŵi yaitali, kotero kuti sadaone konse chochita. Koma ataona kuti mfumuyo sidatsekulebe zitseko zija, adatenga kii natsekula zitsekozo, ndipo adangoona mfumu yao ili thasa pansi, itafa.

²⁶Ehudi adathaŵa pamene iwo ankachedwa nkudikira. Adapitirira malo a miyala yozokota ija, nathaŵira ku Seira.

²⁷Atangofika adaimba lipenga m'dziko lamapiri la ku Efuremu. Aisraele onse adatsika pamodzi naye kuchokera ku dziko lamapirilo, iyeyo akuŵatsogolera.

²⁸Adauza anthuwo kuti, “Tiyeni kuno, Chauta wapereka Amowabu, adani anu, m'manja mwanu.” Choncho anthuwo adamtsata nakalanda madooko a Yordani natsekereza Amowabuwo, osalola kuti munthu ndi mmodzi yemwe aoloke.

²⁹Nthaŵi imeneyo adapha Amowabu pafupi 10,000. Anthu onse ophedwawo anali amphamvu ndiponso odziŵa kumenya nkhondo, koma sadapulumukepo ndi mmodzi yemwe.

³⁰Choncho Amowabu adagonjetsedwa ndi Aisraele pa tsiku limenelo. Ndipo dzikolo lidakhala pa mtendere zaka makumi asanu ndi atatu.

³¹Atamwalira Ehudi, padabwera Samigara, mwana wa Anati, amene adapha Afilisti 600 ndi ndodo yomenyera ng'ombe. Motero iyeyunso adapulumutsa Aisraele.