Read Buku Loyera - Chichewa Owe. 8 Bible Online

Owe. 8 - Buku Loyera - Chichewa bible

Owe. 8

¹Tsiku lina Aefuremu adamufunsa Gideoni kuti, “Kodi udalekeranji kutiitana ife pamene unkakamenyana ndi Amidiyani?” Ndipo adamkalipira kwambiri.

²Iye adaŵayankha kuti, “Ndachita chiyani ine kuyerekeza ndi zimene mwachita inu? Kodi zimene mwachita inu Aefuremu si zazikulu koposa zimene fuko langa la Abiyezere lachita?

³ Mulungu wapereka m'manja mwanu mafumu a Midiyani, Orebu ndi Zebu. Ndachita chiyani kuyerekeza ndi zimene mwachita inu?” Gideoni atanena mau amenewo, anthuwo mitima yao idatsika.

⁴Gideoni adafika ku Yordani naoloka mtsinjewo, iye pamodzi ndi anthu 300 aja amene nali nawo, atatopa kwambiri, koma akupirikitsabe adani ao.

⁵Tsono atafika ku mudzi wa Sukoti, Gideoni adapempha eni mudziwo kuti, “Chonde, apatseniko buledi anthu ali ndi ineŵa, pakuti atopa kwambiri. Tikupirikitsa Zeba ndi Zalimuna, mafumu a Midiyani.”

⁶Koma atsogoleri a ku Sukoti adayankha kuti, “Kodi Zeba ndi Zalimuna waŵagonjetsa kale, m'mene ukuti tiŵapatse buledi ankhondo akoŵa?”

⁷Gideoni adayankha kuti, “Ai, chabwino! Chauta akapereka Zeba ndi Zalimuna m'manja mwanga, ndidzakukwapulani ndi matsatsa a minga yam'chipululu.”

⁸Kuchokera kumeneko adapita ku Penuwele kukapemphanso buledi. Koma anthu a ku Penuwele adamuyankha monga momwe adamuyankhira anthu a ku Sukoti.

⁹Apo Gideoni adauza anthu a ku Penuwele kuti, “Pamene ndizikabwerera nditagonjetsa, ndidzagwetsa nsanja ili apayi.”

¹⁰Nthaŵiyo nkuti Zeba ndi Zalimuna ali ku Karikori pamodzi ndi ankhondo ao, anthu pafupi 15,000. Iwoŵa ndiwo amene adatsalako mwa ankhondo a anthu akuvuma, pakuti ankhondo adaafapo 120,000.

¹¹Gideoni adadzera njira ya anthu okhala m'mahema kuvuma kwa Noba ndi Yogobeha, ndipo adaŵathira nkhondo ankhondowo, pakuti anali osakonzekera.

¹²Zeba ndi Zalimuna adathaŵa. Gideoni adaŵapirikitsa nagwira mafumu aŵiri a Midiyaniwo, ndipo ankhondo ao onse adathaŵa ndi mantha.

¹³Tsono Gideoni mwana wa Yoasi adabwerako ku nkhondo kudzera ku chikweza cha Heresi.

¹⁴Kumeneko adagwira mnyamata wa ku Sukoti, nayamba kumfunsa mafunso. Mnyamatayo adalembera Gideoni maina a atsogoleri ndi a akuluakulu ena a ku Sukoti, okwanira makumi asanu ndi aŵiri.

¹⁵Apo Gideoni adabwera kwa anthu a ku Sukoti naŵauza kuti, “Naŵa anthu aja, Zeba ndi Zalimuna, aja munkandinena nawoŵa kuti, ‘Kodi Zeba ndi Zalimuna waŵagonjetsa kale, m'mene ukuti tiŵapatse buledi anthu ako otopa kwambiriŵa?’ ”

¹⁶Pamenepo Gideoni adagwira akuluakulu amumzindamo, ndipo adatenga matsatsa a minga yam'chipululu, naŵakwapula anthu a ku Sukotiwo.

¹⁷Ndipo adagwetsa nsanja ya ku Penuwele ija, napha anthu onse amumzindawo.

¹⁸Tsono Gideoni adafunsa Zeba ndi Zalimuna kuti, “Kodi anthu amene mudaŵapha ku Tabori aja ankaoneka bwanji?” Iwo adayankha kuti, “Aliyense ankaoneka monga momwe ukuwonekera iwemu. Ankaoneka ngati ana a mfumu.”

¹⁹Gideoni adaŵauza kuti, “Amene aja anali abale anga, ana a mai wanga. Ndikulumbira pamaso pa Chauta kuti, ‘Mukadapanda kuŵapha, inenso sindikadakuphani.’ ”

²⁰Apo adauza Yetere, mwana wake wachisamba, kuti, “Tiye, ipha anthuŵa.” Koma mnyamatayo sadasolole lupanga lake pakuti ankaopa, chifukwa anali akali mnyamata.

²¹Tsono Zeba ndi Zalimuna adauza Gideoni kuti, “Mutiphe ndinu, pakuti inuyo ndiye muli ndi mphamvu za munthu wamkulu.” Pamenepo Gideoni adapha Zeba ndi Zalimuna. Ndipo adachotsa mphande zimene zinali m'khosi mwa ngamira zao.

²²Tsono Aisraele adamuuza Gideoni kuti, “Muzitilamulira inuyo, mwana wanu ndi zidzukulu zanu, pakuti ndinu amene mwatipulumutsa kwa Amidiyani.”

²³Koma Gideoni adaŵayankha kuti, “Ine sindidzakulamulirani, mwana wanganso sadzakulamulirani. Chauta ndiye amene adzakulamulirani.”

²⁴Gideoni adaŵauzanso kuti, “Ndikupempheni kanthu kamodzi. Aliyense mwa inu andipatse ndolo zimene adafunkha.” (Adani aja anali ndi ndolo zagolide chifukwa chakuti anali Aismaele).

²⁵Iwo adayankha kuti, “Tikuvomera kukupatsani zimenezi.” Apo adayala chovala, ndipo munthu aliyense adaponyapo ndolo zofunkhazo.

²⁶Kulemera kwake kwa ndolo zagolide zimene anthu adaperekazo kunali makilogramu 20, osaŵerengera kulemera kwa mphande, ukufu wam'khosi, zovala zofiira za mafumu a Midiyani, ndiponso malamba am'khosi a ngamira.

²⁷Ndi golideyo adapanga efodi naikhazika mu mzinda wake ku Ofura. Tsono Aisraele onse adasiya Mulungu nayamba kupembedza efodiyo kumeneko, ndipo idasanduka msampha kwa Gideoniyo ndi kwa banja lake.

²⁸Choncho Amidiyani adagonjetsedwa ndi Aisraele ndipo sadayesenso zoŵaukira. Motero dziko lidakhala pa mtendere zaka makumi anai pa nthaŵi ya Gideoni.

²⁹Gideoni mwana wa Yoasi adapita kukakhala kwao.

³⁰Tsono anali nawo ana 70, akeake ndithu, pakuti anali ndi akazi ambiri.

³¹Mzikazi wake wina amene anali ku Sekemu, adamubaliranso mwana dzina lake Abimeleki.

³²Gideoni, mwana wa Yoasi, adafa ndi ukalamba, naikidwa m'manda a Yoasi bambo wake ku Ofura, mzinda wa Abiyezere.

³³Atangomwalira Gideoni, Aisraele adayambanso kupembedza Abaala, nasandutsa Baala wa Chipangano mulungu wao.

³⁴Aisraelewo sadakumbukirenso Chauta, Mulungu wao, amene adaŵapulumutsa kwa adani ao onse a mbali ndi mbali.

³⁵Ndipo sadaonetse mtima wothokoza kwa banja la Yerubaala (ndiye kuti Gideoni), chifukwa cha zabwino zonse zimene iye adaŵachitira.