Read Nyishi BEGGAR 11 Bible Online

BEGGAR 11 - Nyishi bible

BEGGAR 11

¹Otuqho swcw mwlw si agam luukin go hoo gomcwr luukinv doonum.

²‍Hoo nyiilungv dou-caga daiyab nyiogy ginum, ho bulv Sinar gvdag haapa ho nvmcw doonum.

³‍Hoo bulv akwn-akwn bemin sunum, “Haato, kuj ngulv hita mvtwl hoo ham xaakam tuj.” Hoo bulv wlw kwlib hitangam mvnum, hoo simit kwlib takinam hiqnum.

⁴‍Ho bulv benum, “Haato, kuj ngulv ngul atgab bopamlo ak mvtuj hoo hoqg sojangam doa tol cvvc dvb mvtuj, hoo ngulug eminam doom dvb mvptuj, hvbmab nyiloqkam ngulv swcw nvg aoso cwrsaq gob nyitayin.”

⁵‍Hoo At Sw nyia ko tulug bopam mam la soja mvnam mam kaatab ipoqnum.

⁶‍Hoo At Sw benum, “Kaato, bulv nyiilu akinv, hoo bul mwlwngv agam luukinam goodo, hoo kokwngam nyitanam mam soq sib bulv nyirab robdu do. Hoo bulv hoggv nyidwb mwwdwn hv bul gab hog vs-axaq gob dooram.

⁷‍Haato, kuj ngulv ipoq gvdwl hoo bulug agam goangam tadar mins maadwb mvtaj, ho bulv akwn akwg agam goonam mam tacin mins kuram.”

⁸‍Ho At Sw bulam swcw nvg aoso cwrsaq twqb mvknum, hoo bulv bopam mam mvngo tvl apaq kunum.

⁹‍Hoqgab hoqg eminam Bebel hvl goqnum, hoggab At Sw gvda gvtwg agam goangam luusaq-luusaq dvb mvknum. Hoo hoq hoqgv At Sw bulam swcw nvg aoso cwrsaq twqb mvknum.

¹⁰‍Soq tulu si Semwg hotamv. Hwdlo vnyw 100 gob axa yukho, sa-hindu hengxo vnyw nywnyig kokw so mwv Arpaksadwg abwb nyiknum.

¹¹‍Hoo Sem Arpaksadwg abwb nyixo kokw so vnyw 500 gob doonum hoo hvraqb asaq nyega kov la nyem kov doonum.

¹²‍Hwdlo Arpaksad vnyw 35 gob swwi yikho, mwv Selag abwb nyiknum.

¹³‍Hoo Arpaksad Selag abwb nyixo kokw so mwv vnyw 403 gob doonum hoo hvraqb asaq nyega kov la nyem kov doonum.

¹⁴‍Hwdlo Sela vnyw 30 gob swwi yikho, mwv Eberwg abwb nyiknum.

¹⁵‍Hoo Sela Eberwg abwb nyixo kokw so mwv vnyw 403 gob doonum hoo hvraqb asaq nyega kov la nyem kov doonum.

¹⁶‍Hwdlo Eber vnyw 34 gob swwi yikho, mwv Peleg abwb nyiknum.

¹⁷‍Hoo Eber Peleg abwb nyixo kokw so mwv vnyw 430 gob doonum hoo hvraqb asaq nyega kov la nyem kov doonum.

¹⁸‍Hwdlo Peleg vnyw 30 gob swwi yikho, mwv Riyug abwb nyiknum.

¹⁹‍Hoo Peleg Riyug abwb nyixo kokw so mwv vnyw 209 gob doonum hoo hvraqb asaq nyega kov la nyem kov doonum.

²⁰‍Hwdlo Riyu vnyw 32 gob swwi yikho, mwv Serug abwb nyiknum.

²¹‍Hoo Riyu Serug abwb nyixo kokw so mwv vnyw 207 gob doonum hoo hvraqb asaq nyega kov la nyem kov doonum.

²²‍Hwdlo Serug vnyw 30 gob swwi yikho, mwv Nahorg abwb nyiknum.

²³‍Hoo Serug Nahorg abwb nyixo kokw so mwv vnyw 200 gob doonum hoo hvraqb asaq nyega kov la nyem kov doonum.

²⁴‍Hwdlo Nahor vnyw 29 gob swwi yikho, mwv Terag abwb nyiknum.

²⁵‍Hoo Nahor Terag abwb nyixo kokw so mwv vnyw 119 gob doonum hoo hvraqb asaq nyega kov la nyem kov doonum.

²⁶‍Hwdlo Tera vnyw 70 gob swwi yikho, mwv Abram, Nahor, hoo Haranwg abwb nyiknum.

²⁷‍Soq tulu si Terag hotamv. Tera Abram, Nahor, hoo Haranwg abwb nyiknum, hoo Haran Lotwg abwb nyiknum.

²⁸‍Kaldiya nyi tulug Urho, Haran mwwg ab Tera doodu dvb mwwg vbw-bor tulu gvdaho siknum.

²⁹‍Hoo Abram la Nahor nywxw naaknum. Abram gv nywxw eminv Sarai, hoo Nahorg nywxw eminv Milka, Haran nyem kov, Milka la Iskag abv.

³⁰‍Sarai twrngumnum; mwn ko doomanum.

³¹‍Tera mwwg ko tuupam la Haran ko tuup Lot nvla mwwg ko siqdangam, hoo Sarai mwwg nyeexwngam mwwg ko tuup Abram nywxwngam boolayil, hoo bulv lvkin gob Kaldiya gvda Ur hoqgv Kanaan gvdab wnum, hvbmabde hwdlo bulv Haran dook ho hvvc yukho, bulv hoqho nvmcw dooknum.

³²‍Terag vnywngv 205 gob nyiknum, hoo Tera Haranho siknum.