Read Nyishi BEGGAR 12 Bible Online

BEGGAR 12 - Nyishi bible

BEGGAR 12

¹Kokw so At Sw Abramnvn benum, “Noqg nyookam hoo noqg nyiin-orum mam hoo noqg abwg nam dook gvdangam apaq peel ngoqg nam kaakin tanam gvdab wto.

²‍Hoo ngo nam koibo nyob hoolu ak gob mvtayin, hoo ngo nam lvqc tayin hoo noqg eminam koi dvb mvtayin, hoggab no lvqc cisiqbo nyi gob nyitayin.

³‍Nam xinboam ngo lvqc citayin, hoo nam xima boam ngo beetayin, hoo noqg hoqgv swcw soqg imiq dvpar mwlwngam lvqc cidwb nyitayin.”

⁴‍Ho At Swg mwam bekjaqb, Abram wnum, hoo Lot mwam wmin gvnum. Hwdlo Abram Haran hoqgv lengyikho vnyw camkvn leq nywng gob nyiknum.

⁵‍Hoo Abram mwwg nywxw Sarai nvla mwwg bor ko tuup Lotwn, hoo bulug gumn-ran nookum kunam mam, hoo Haranho bulug nyiilu rvnam mam boola yukul, hoo bulv Kanaan gvdab wrab kunum. Bulv Kanaan gvdaho wc dvb,

⁶‍Abram Sekem gvdag kora svvn dook Moreb wpeqnum. Hoq moodho Kanaan nyi tulungv gvdaho doonum.

⁷‍Ho At Sw Abramnvn daqlin banv benum, “Noqg hotam mam ngo soq gvda sam jitayin.” Ho hiyv mwam daqlinl kaakin boam, At Swn mwv hoqho yugw ak mwjnum.

⁸‍Hoqgv mwv Betelwg dou-caga diisw daiyab wnum hoo mwwg tombungam dou-haaga daiyag Betel gvla dou-caga daiyag Ai pengko ho mvnum. Hoo mwv hoqho At Sw gab yugw ak mvnum hoo At Swg eminam goqnum.

⁹‍Hoo Abram hvraqb Negeb daiyab nyiody boodul doonum.

¹⁰‍Hoq gvdaho dwr wnum. Ho Abram Ijipt gvdab nyiogy gilnum, hoggab gvdaho vc loodab dwr wnum.

¹¹‍Hwdlo mwv Ijiptho haasv twqb nyiyikho, mwv mwwg nywxw Sarainvn benum, “Ngo cengdo no kangam jaqn bo nyem akv,

¹²‍hoo hwdlo Ijipt nyi tulungv nam kaapayin, bulv betayin, ‘Soq si mwwg nywxw go.’ Ho bulv ngam mengtai, hvbmabde bulv nam swwm tai.

¹³‍No ngoqg bwrmv hvl beto, ho no ngoqg bwrmv hvl bebnyiloqkam ngo altai, ho noqg emin gab ngoqg swwgv altayin.”

¹⁴‍Hwdlo Abram Ijiptho haanum, Ijipt nyi tulungv kangam bo nyem akam kaanum.

¹⁵‍Hoo hwdlo Parog lvpw atwg ko tuup tulungv mwnwn kaapel, bulv mwnwn Parog agaho paqnum. Hoo nyem akam Parog nammwb bool wgkunum.

¹⁶‍Hoo mwnwg emin gab Abramnvn aljaqb cin-hoonum; hoo mwv sviyangv, svv hvvbv, svdam dampv, nyerangv, paqnv, svdam damnv, hoo svjin tulungam doog kunum.

¹⁷‍Hvbmabde At Sw Abram nywxw Sarai pagoq gab Paro nvla mwwg imiq dvparam koi jaqb swcin-taiyaqkv haamnum.

¹⁸‍Ho Paro Abramnvn goqnv hoo benum, “Soq sib no ngam hoggub nyipa kun? Hog nyitwl mwn noqg nywxwngv hvl no ngam betam maanum?

¹⁹‍Hoggab no benum, ‘Mwn ngoqg bwrmv hvl,’ hoqgab ngo mwnwn ngoqg nywxwb naanum? Soq si noqg nywxwngv; mwnwn naag nuku, hoo wnku.”

²⁰‍Hoo Paro mwwg pagoq gab nyi tulungam gaml jinum, hoo bulv mwam mwwg nywxw lvgab la mwwg gumn doog kunam lvgab kanaml wpaq mvknum.