Read Nyishi BEGGAR 13 Bible Online

BEGGAR 13 - Nyishi bible

BEGGAR 13

¹Ho Abram Ijipt hoqgv mwv la mwwg nywxwngv hoo mwwg gumn doog kunam lvgab wknum, hoo Lot mwwg lvgab Negeb namgub haamin gvnum.

²‍Abram tuun-meeho, rupho, hoo hunho vc loodab nyet kunum.

³‍Hoo mwv Negeb hoqgv Betel namgub, hogloq ho mwv otuqjaqb mwwg tombungam Betel gvla Ai pengko ho mvrabko nyookub nyiody booknum,

⁴‍otuq jaqb yugw mvco ko hoqg nyookub wnum. Hoo hoqho Abram At Swg eminam paql xumnum.

⁵‍Hoo Lot, hiyv Abram lvgab wmin gvnbov kam sviyangv hoo sibin-svvngv hoo tombungv doognum,

⁶‍hoqgab bulv lvkin gob dooikam gvdaho dvk-twwkv pwwma tanam; hoggab bulug gumn-ran doognamv vc loodab koi ko-gab bulv lvkin gob doobam nyomanum,

⁷‍hoo Abram gvla Lotwg tuun-meengam kaaya bo nyi tulug pengko ho lwxiam paiyaq minsnum. Hoq moodho Kanaan nyi tulungv la Perijj nyi tulungv gvdaho doodunum.

⁸‍Ho Abram Lotnvn benum, “Noqg la ngoqg pengko so, hoo noqg la ngoqg tuun-mee kaaya bo pengko ho paiyaq mins yooju, hoggab ngulv imiq dvpar akinv.

⁹‍Gvda mwlwngv noqg agaho dooma yv? Ngoqg soqgv no vpwb doobwqto. No laqcam naabnyiloqkam, ho ngo lvqbwqb wtayin, ho no lvqbwqkam naabnyiloqkam, ho ngo laqcib wtayin.”

¹⁰‍Hoo Lot mwwg vnyiqkv piorab banv Jordon Lywpangam kaanum, hogloq hv At Swg boolu hvbjaq, ho Ijipt gvdag Joar dwaq hvb, issiv naleqgo doonum. (Soq si Sodom mam la Gomorrangam At Sw twrma taab otuqho nyinum.)

¹¹‍Ho Lot mwv atv Jordon Lywpa mwlwngam xuqbwq kunum, hoo Lot dou-caga daiyab nyiogy wknum. Hoqgab bulv akwn-akwn hoqgv wbwq mins kunum.

¹²‍Abram Kanaan gvdaho nvmcw dooknum, hvbmabde Lot lywpag bopam tulug pengko ho nvmcw dooknv hoo mwwg tombungam Sodom ogum namgub mval dooknum.

¹³‍Sodomg nyi tulungv nyic-nyia bob nyinum, vc loodab At Swn ceekol nyic nyinbo nyiib nyinum.

¹⁴‍Lot mwwg hoqgv wbwq de kokw so, At Sw Abramnvn benum, “Noqg vnyiqkv piorab gvdwl noqg doodu ko nyook hoqgv nyoodum bvla nyookob hoo dou-caga bvla dou-haagab kaaka to,

¹⁵‍noqg kaanam gvda mwlw ham noqgab la noqg hosiqkam nwrba gob ngo jitayin.

¹⁶‍Noqg hosiqkam ngo swcwg diimwr hvbjaq jaqt dvb mvtayin, ho swcw soqg diimwram xila baloqkam, noqg hosiqkam kam xila tayin.

¹⁷‍Gorabto, gvdag poop-daayarb wto, hoggab hoqham ngo nam jitayin.”

¹⁸‍Ho Abram mwwg tombungam salayil kora svvn dookwg Mamreg Hebronho haal nvmcw dooknum, hoo hoqho mwv At Sw gab yugw ak mvnum.