Read Nyishi BEGGAR 14 Bible Online

BEGGAR 14 - Nyishi bible

BEGGAR 14

¹Hoq moodho Sinarg lvpw at Amrapel, Ellasarwg lvpw at Ariok, Elamg lvpw at Kedorlaomer, hoo Goiimg lvpw at Tidal soq tulu si,

²‍Sodomg lvpw at Bera, Gomorrag lvpw at Birsa, Admag lvpw at Sinab, Jeboiimg lvpw at Semeber, hoo Belag lvpw at (hoqhv Joar), soq lvpw at tulu lvgab nyob panum.

³‍Hoo soq mwlwg sipai tulungv Siddim Lywpa ho lvkin gob hookumnum (hoqhv Al Sa-svlo ho).

⁴‍Vnyw camleq nywnyi gob Kedorlaomer uraho bon nyinum, hvbmabde vnyw camleq nywum deenho bulv mwam ceekonum.

⁵‍Vnyw camleq nywpy yikho Kedorlaomer la mwwg lvgab dooba lvpw at tulungv Asterot-karnaimho Repaim mam, Ham ho Jujim mam, Sabe-kiriataimho Emim mam haal nyob paiyanum,

⁶‍hoo Horit nyi tulungam bulug Seir diisw gvda namgub ho El-paran vrrwg deexa-rara nyook namgub nyob panum.

⁷‍Ho bulv wkur kunv En-mispatho (hoqhv Kedesho) haanum hoo Hajajon-tamarho doodu bo Amalek nyi tulungam la Amor nyi tulug gvda mwlwngam nyob paiyanum.

⁸‍Ho Sodomg lvpw atv, Gomorrag lvpw atv, Admag lvpw atv, Jeboiimg lvpw atv hoo Belag lvpw atv (hoqhv Joarho) wnum, hoo bulv lvkin gob Siddim Lywpa ho nyob panum

⁹‍Elamg lvpw at Kedorlaomer lvgab, Goiimg lvpw at Tidal, Sinarg lvpw at Amrapel, hoo Ellasarwg lvpw at Ariok lvpw at vpiv ang lvgab ceekonum.

¹⁰‍Siddimg Lywpa ho taking (katra) ungngv naleqgo doonum, hoo Sodom gvla Gomorrag lvpw at tulungv kenum, ho bulv tuugin ungho yoqlwqnum, hoo yoqngo tuugin diisw gvdab kenum.

¹¹‍Ho nyemaqkv Sodom gvla Gomorrag gumn-ran hog mwlwngam naaknum, hoo bulug dvs mwlwngam naala yukul bulug lamtab wknum.

¹²‍Bulv Sodomho doonbo Abram bor hoq ko Lot nvkam, hoo mwwg gumn-ran tulungam naala yukul bulug lamtab wknum.

¹³‍Ho hiyv Amor tulug Mamre kora svvn nwwtaqho doon boam, kelinbo nyi akv Juhudi Abramnvn haabnv betamnum. Mamre la mwwg bor Eskol la Aner bulv Abram gv ajin gob nyinum.

¹⁴‍Hwdlo Abram mwwg imiq nyiingam nyumwb boog nvba hvl tapa tvl, mwwg namho ko bwwtwl honynam nyi 318 gob mwv bulam boolayil wgnum, hoo bulam Dan namgub ruqmin gvnum.

¹⁵‍Hoo mwwg sipai tulungam bulam ceeko mvdwb mwv la mwwg nyera tulungam ai mvpin-mvranum, hoo bulam mviyanum hoo bulam nyoodum daiya Damaskaswg Hoba namgub ruqmin gvnum.

¹⁶‍Ho mwv gumn-ran mwlwngam boqkur kunum, hoo mwwg imiq nyi Lotnvn la mwwg gumn-ran tulungam, hoo nyem mam la nyiilungam kam bookur kunum.

¹⁷‍Kedorlaomer nvla mwwg lvgab nyiba bo lvpw at tulungam mwv mviya peekul wkur yukho, Sodomg lvpw atv mwam Sabeg Lywpa ho kvvrwqtab lengnum (hoqhv Lvpw at tulug Lywpangv).

¹⁸‍Hoo Salemg lvpw at Melkijedek dvs-twwsv baqlinl jinum. (Mwv Mwlwngam Koi yaanbo Pwnbog nyubwb nyinum.)

¹⁹‍Hoo mwv mwam lvqc cil hoo benum, “Mwlwngam Koi yaanbo Pwnbov Abramnvn lvqc cignvka, Doangam la swcwngam doogbo atv;

²⁰hoo Mwlwngam Koi yaanbo Pwnbov xinam jaqkv, noqg ceebio tulungam noqg alaqho jilwq paku!” Hoo Abram mwam hog mwlw wyw hoqgv ak jibwqnum.

²¹‍Hoo Sodomg lvpw atv Abramnvn benum, “Nyi tulungam ngam jipe bv, hvbmabde dupum-dvrab tulungam noqgab naagwn.”

²²‍Hvbmabde Abram Sodomg lvpw atam benum, “Mwlwngam Koi yaanbo Pwnbo At Swn, ho Doangam la swcwngam doogbo atam, ngoqg alaqkam ngo irabl dingr pakun,

²³‍ngo tan soogkam ho samtaqnan oso gokam ho noqg dupum-dvrab hoolu luug jaqkam naaram, hvb mabnyiloqkam no betayi, ‘Ngo Abramnvn nyet dvb mvpa kun.’

²⁴‍Ngoqg yaapa tulug dvnam hoqgv la ngoqg lvgab wba bo nyiam jinam lvvg hoqgv ngo hog akjijaqkam naaram. Aner, Eskol, hoo Mamrenvn bulug naady sanam mam naam to.”