Read Nyishi BEGGAR 15 Bible Online

BEGGAR 15 - Nyishi bible

BEGGAR 15

¹Soq nyixo kokw so nyiqry kaanam gob At Swg gomcwrv Abramnvn haanum: “Bos maabv, Abram, ngo noqg svtamv; noqg lvqcv koijaq tayin.”

²‍Hvbmabde Abram benum, “Pwnbo At Swa, hoggv no ngam jitayin, hoggab ngo ko doomab hvraq doodu dvn, hoo Damaskaswg Eliejarv twq ngoqg nammwg gumn otungv?”

³‍Hoo Abram benum, “Kaato, no ngam ko hosiq jikma, hoo ngoqg nam hoqg nyi akgon ngoqg otub nyitayin.”

⁴‍Hoo kaato, At Swg gomcwrv ngam haanum: “Soq nyi si noqg hosiq otub nyiram; noqg atwg ko tuupv noqg hosiq otub nyitayin.”

⁵‍Hoo mwam lvvgwb boolin layil mwv benum, “Doab koodu to, takar tulungam xika to, no bulam xikal xila yid yv.” Ho Abramnvn mwv benum, “Hoqhvb noqg ko hosiqkv nyitayin.”

⁶‍Hoo mwv At Swn mwwjwnum, hoo mwam lootw bo akgob mwv xitaq kunum.

⁷‍Hoo mwam mwv benum, “Ngo At Sw, hiyv nam Kaldiya nyi tulug gvdag Ur hoqgv boolin layil nam soq gvda sam gumn bwwm dvb jipa kun.”

⁸‍Hvbmabde mwv benum, “Pwnbo At Swa, soq sam ngo gumn bwwtayin hvl, hoggub ngo cengtayin?”

⁹‍Mwv mwam benum, “Vnyw nywum akam kunbo svv loq dorg, vnyw nywum akam kunbo sibin bin loq dorg, vnyw nywum akam kunbo yaap tvmwr loq dorg, pukum loq dorg la pukum ko loq dorg ngam bwa tvb.”

¹⁰‍Hoo mwv soq mwlw sam mwwg gab bwa jinum, hoq tulu ham tuunyi gogaqb potunum, hoo akwn aoho akwn paacal apnum. Hvbmabde mwv pvta tulu ham tuunyi gob potu maanum.

¹¹‍Hoo hwdlo pvta tulungv svma tulu ham dvtab jarayin, hoq tulu ham Abram aadob ruqpaqnum.

¹²‍Hwdlo doonyiv hoodul dooyikho, Abramnvn yumiv meetab-miimiqnum. Hoo kaato, bos jaqdvb la kan twdwqkv mwwg aoho haanum.

¹³‍Ho At Sw Abramnvn benum, “Jvqtw jaqb cengto noqg ko hosiqkv bulug gvda maasu hvbmab nyoodo gvda golo nyiogy gil dootab wtayin hoo hoqho nyerab swwl dootayin, hoo bulv vnyw lwwpy gob hentwr henl dootayin.

¹⁴‍Hvbmabde bulam nyera bool doogbo hoolu ham ngo pw-hwwtayin, hoo kokwngam bulv vc loodab gumn baqlayil lengtayin.

¹⁵‍No atv, noqg ab tulug dookub swrsob wta yukun; no aljaqb swwtar peel siyi kun nam svma liitayin.

¹⁶‍Hoo bulv hotam vpy deenam lokta so haatayin, hoggab Amor nyi tulug nyimurnamv nyiyum maata.”

¹⁷‍Hwdlo doonyiv haaikukam hoo hoqho kan kunum, kaato, wm gudunam pwcw cwwg la moily gudu bo mur ak soq pvmwql apnum svma pengkob wpeqnum.

¹⁸‍Hoq aalho At Sw Abram lvgab pvvb birwl begamv, “Ijipt pobu hoqgv naalayil koibo pobu, Iupratas namgub, noqg ko hosiqkam ngo soq gvda sam jitayin,

¹⁹‍Kenait nyi tulug gvdaho, Kenijj nyi tulungv, Kadmon nyi tulungv,

²⁰‍Hittait nyi tulug, Perijj nyi tulug, Repaim nyi tulug,

²¹‍Amor nyi tulug, Kanaan nyi tulug, Girgas nyi tulug hoo Jebus nyi tulug gvdangam jitayin.”