Read Nyishi BEGGAR 16 Bible Online

BEGGAR 16 - Nyishi bible

BEGGAR 16

¹Abram gv nywxw Sarai mwam ko bwwj maanum. Mwn Ijipt paqn ak doognum hoqg eminv Hagar.

²‍Hoo Sarai Abramnvn benum, “Sija kaato, At Sw ngam ko bwwm kuma. Ngoqg paqn dookub wno; ngo lokam mwnwg hoqgv ko ak kaapa dvb nyikam yin pv.” Hoo Abram Sarai benam mam tanum.

³‍Ho Abram Kanaan gvdaho vnyw nywyw go dooxo kokw so, Abram gv nywxw Sarai, mwnwg Ijipt paqn Hagarnvn naalayil mwnwg nyol Abramnvn nywxwb jinum.

⁴‍Hoo mwv Hagarnvn doognum, hoo mwn ko gvnum. Hoo hwdlo mwn ko gvpa kun hvl ceng yikho, mwnwg aiyam mwn xik maab nyinum.

⁵‍Hoo Sarai Abramnvn benum, “Ngam xik maab nyinam sam no gorgy baqto! Ngoqg paqnam ngo nam doog mvdwb jinum, hoo hwdlo mwn ko gvpa kun hvl ceng yikho, mwn ngam xik maab kaanyi-kaayanum. At Swn noqg gvla ngoqg pengko so pw-hwwm to!”

⁶‍Hvbmabde Abram Sarainvn benum, “Kaato, noqg paqnv noqg uraho doodwn; mwnwn no hoggub mwnw dvn mvto.” Ho Sarai mwnwn vc loodab vs-axaq dvb mvnum, hoo mwnwg hoqgv mwn keknum.

⁷‍At Swg gumtwngv mwnwn deexa-rarag iss subuq buqlinko ho kaapanum, hoqhv Sur lamta wga ho doonum.

⁸‍Hoo mwv benum, “Saraig paqn Hagar, no hogloqkv haapan hoo hogloqb wdu dvn?” Mwn benum, “Ngoqg ai Sarai hoqgv ngo kelin yin.”

⁹‍At Swg gumtwngv mwnwn benum, “Noqg ai dookub wkur nuku hoo mwnwg uraho doota.”

¹⁰‍At Swg gumtwngv mwnwn hvlakam benum, “Noqg hosiqkam ngo dumtwq-miilyw mvtayin ho bulug dumtwq-miilywnam mam xila nyokram.”

¹¹‍Hoo At Swg gumtwngv mwnwn benum, “Kaato, no ko gvpa ku hoo nyega ko ak bwwtayin. Mwwg eminam no Ismaiyel hvl goqto, hoggab At Sw noqg hentwr henam mam tapa paku.

¹²Mwv nyoro svdamg nyi ak hvb nyitayin, mwwg alaqkv nyiicwr-cwrxiam ceeko tayin, hoo nyiicwr-cwrxig alaqkv mwam ceeko tayin, hoo mwwg nyiin-orum dook mwlwho mwv ceekol dootayin.”

¹³‍Ho mwnwn agam goonbo At Swg eminam mwn goqnum, “No kaanbo Pwnbo ak nyi,” ho mwn benum, “Jvqtw jaqb ngam kvvyw-tadabo akam, ngo mwam so kaapa paku.”

¹⁴‍Hoqgab sokum mam Beer-lahai-roi hvl eminum; hoqhv Kades gvla Bered pengko ho doodwn.

¹⁵‍Hoo Hagar Abramnvn nyega ko ak bwwjnum, hoo Hagarg ko bwwnam ham Abram Ismaiyel hvl emin goqnum.

¹⁶‍Hwdlo Hagar Ismaiyelnvn Abram gab bwwj yukho, Abram vnyw campiin leq nywx gob axa kunum.