Read Nyishi BEGGAR 17 Bible Online

BEGGAR 17 - Nyishi bible

BEGGAR 17

¹Hwdlo Abram camkiya leq kiya gob axa yukho At Sw Abramnvn daqlin banv hoo mwam benum, “Ngo mwlwngam koi yaanbo Pwnbo At Swv; ngoqg kaaga so wto, hoo timb maadwb swwto,

²‍ho ngoqg pvvb birnam mam ngoqg gvla noqg pengko ho ngo mvkam yin pv, hoo nam naleqgo dumtwq-miilyw dvb mvkam yin pv.”

³‍Ho Abram kedho bumpnum. Hoo Pwnbov mwam benum,

⁴“Kaato, ngoqg pvvb birnamv noqg lvgab doodwn, hoo no dumtwq-miilyw dvb nyob hoolug abwb nyitayin.

⁵‍Noqg eminam Abram hvl lokam goqram, hvbmabde noqg eminam Abraham hvtayin, hoggab ngo nam dumtwq-miilyw dvb nyob hoolug abwb mvpa kun.

⁶‍Ngo nam naleq jaqg mipar-gooiyiq dvb mvtayin, hoo ngo nam nyob hoolu gob mvtayin, hoo noqg hoqgv lvpw at tulungv lengtayin.

⁷‍Hoo ngoqg pvvb birnam mam ngoqg la noqg pengko ho hoo noqg kokwb noqg hosiqg pengko ho bulug hotam-hotam namgub pvvb birnam gob ngo mvptayin. Noqg Pwnbob la noqg kokwb noqg hosiqg Pwnbob nyidy bov.

⁸‍Hoo noqg kokwb noqg hosiqkam noqg nyoodo nyiib nyitwl dook gvda sam, Kanaanwg gvda mwlwngam kuiyum namgub gumn bwwm dvb, ngo nam jitayin, hoo ngo bulug Pwnbob nyitayin.”

⁹‍Hoo Pwnbov Abrahamnvn benum, “No nyiloqkam, no ngoqg pvvb birnam mam pvvtayin, ho no la noqg kokwb noqg hosiqkv bulug hotam-hotam namgub pvvtayin.

¹⁰‍Soq si ngoqg pvvb birnamv no sam pvvtayin, ngoqg la noqg pengko ho hoo noqg kokwb noqg hosiqkv pvvtayin: Nulug pengko hoqg nyega vx-cwram pepaql-mux dvb nyitayin.

¹¹‍Noqg vpin niqtuqkam pepaql-mux mvtayin, hoo hoqhv ngoqg la noqg pengko ho pvvb birnam mam kaacin nanv.

¹²‍Hiyv nulug pengko hoqgv aal piin gob akam yukam bulam pepaql-mux tayin. Noqg hotam-hotam xaqb nyega vx-cwrv, noqg namho bwwnam ge ho noqg hosiq maasu hvbmab noqg twngk lvgab nyoodo nyi rvnam mam kam pepaql-mux dvb nyitayin,

¹³‍hiyam noqg namho ko bwwnam ge hoo noqg twngk lvgab nyi rvnam ge vnyi-vnyiam pepaql-mux dvb nyiky tayin. Ho ngoqg pvvb birnamv noqg soodin uraho kuiyum xaqb pvvb birnam gob dootayin.

¹⁴‍Nyega ko hiyv lajaqkam vpin niqtuqkam pepaql-mux mvma boam mwwg nyiilug dvparho nwd xitaq kuram; hoggab mwv ngoqg pvvb birnam mam mvpia paku.”

¹⁵‍Hoo Pwnbov Abrahamnvn benum, “Noqg nywxw Sarainvn, no mwnwg eminam Sarai goqk maabv, hvbmabde mwnwg eminam Sara hvl goqtayin.

¹⁶‍Ngo mwnwn lvqc citayin, hoo hoq aoho, ngo nam nyega ko loq ak mwnwg hoqgv jitayin. Ngo mwnwn lvqc citayin, hoo mwn nyob hoolu dvpar gob nyitayin; mwnwg hoqgv nyiilug lvpw at tulungv lengtayin.”

¹⁷‍Ho Abraham kedho bumpnum hoo nyirnum hoo mwv atv benum, “Vnyw lwwg kunbo nyi ak hoqgv ko dooiyin do i? Sara, hiyv vnyw camkiya gob axa kunbov ko bwwiyin do i?”

¹⁸‍Hoo Abraham Pwnboam benum, “Oa Ismaiyel noqg agaho swwkam yin pv!”

¹⁹‍Pwnbo benum, “Hvbma, hvbmabde, noqg nywxw Sara nam nyega ko ak bwwj tayin, hoo no mwwg eminam Aisak hvl goqto. Ngoqg pvvb birnam mam mwwg lvgab ngo kuiyum xaqb pvvb birnam gob mwwg kokwb mwwg hosiqkam ngo mvp jitayin.

²⁰‍Ismaiyel gab, noqg benam mam ngo tapa pa; kaato, ngo mwam lvqc cipakun hoo mwam mipar-gooiyiql hoo mwam vcjaqb dumtwq-miilyw mvtayin. Mwv lvpw at ko tuup camleq vnyig abwb nyitayin, hoo ngo mwam vc loodab koibo nyob hoolu gob mvtayin.

²¹‍Hvbmabde ngoqg pvvb birnam mam ngo Aisak lvgab nyitayin, hiyam vnyw nywgwn soq mood so Sara ko bwwtayin.”

²²‍Hwdlo mwwg lvgab mwv agam goonya kalam, Pwnbov Abraham hoqgv aob caaknum.

²³‍Hoo Abraham mwwg ko tuup Ismaiyel nvla mwwg namho ko bwwnam mam la ho mwwg twngk lvgab rvnam nyega tulungam Abraham mwwg nam hoq nyega vx-cwram bool wgnum, hoo mwam Pwnbog bekjaqb, mwv hoq aalho bulug vpin niqtuqkam pepaql-mux mvknum.

²⁴‍Abrahamnvn hwdlo vpin niqtuqkam pepaql-mux mviyikho mwv vnyw camkiya leq kiya gob axa kunum.

²⁵‍Ho hwdlo mwwg ko tuup Ismaiyelnvn vpin niqtuqkam pepaql-mux mviyikho mwv vnyw camleq nywum gob axa kunum.

²⁶‍Hoq aalho Abraham la mwwg ko tuup Ismaiyel bunyiv pepaql-mux mvknum.

²⁷‍Hoo mwwg nam hoqg nyi mwlwngv, namho ko bwwnam ge hoo nyoodo nyiingam twngk lvgab rvnam ge, mwwg lvgab pepaql-mux mvknum.