Read Nyishi BEGGAR 19 Bible Online

BEGGAR 19 - Nyishi bible

BEGGAR 19

¹Gumtw vnyiv ariyum Sodomho haaknum, hoo Lot Sodomg toggoqho doodunam. Hwdlo Lot bulam kaapayin, mwv bulam kvvrwq dvb gorab banv kedho bump tvl pvxwl xumnum

²‍hoo benum, “Ngoqg bir at tulunga, noqg nyera nammwb haat bvka hoo nulv hurs moomiq tvl soi doope bvka. Ho nulv komcib gorab layil hoo nulug wtungam wto.” Bulv benum, “Ma, ngulv soi bopam lamtag toodum cuukiq golo dootayin.”

³‍Hvbmabde mwv bulam vcjaqb nwwteql benum; hoggab bulv mwwg dookub wbnv hoo mwwg nammwb haanum. Hoo mwv bulam durum dvgnum hoo opap kiilwq maanam wtw kvbjnum, hoo bulv dvnum.

⁴‍Hvbmabde bulv yuba maatab, bopamg nyi tulungv, Sodomg nyi tulungv, yaapangv la axangv, vtwr-anya nyi hoqgv naarab layil nyiilu mwlwngv nammam doqyumnum.

⁵‍Hoo bulv Lotwg goqnum, “Soi noqg dookub haan bo nyi tuluhv hoglo? Bulam ngulug agaho so boolin to, ho ngulv bulam cengtayin.”

⁶‍Lot haagag nyi tulu dookub lengnum, ho mwv langk yaab viyap pam ciqkurl ciqtumnum,

⁷‍hoo benum, “Ngo nulam xuml bedwn, ngoqg vbw-bor tulu, nyic-nyia jaqb nyimabv.

⁸‍Kaato, ngo nyem ko mvvngam vnyi go doodwn. Ngo bulam nulam boolin jitayin, hoo bulam nulv hoggv nyinw dvn ham nyito. Soq nyi tulu sam hog akkam nyimabv, hoggab bulv ngoqg namlo nyiinwb haapan.”

⁹‍Hvbmabde bulv benum, “Daqgin to!” Hoo bulv benum, “Soq nyi si nyoodo hoqgv haanum, hoo mwv hvvky gob nyipa ku! Ngulv nam bulam koi yaadwb almab nyitayin.” Ho bulv Lotwn vcjaqb ceekol ceqjab kunum, hoo ogumb hvvnwq kunv viyap pam tuutab daqsv twqb tuuknum.

¹⁰‍Hvbmabde nyi vnyig alaqkv ilin banv Lotwn nam urab bulug lvgab boanum hoo viyap pam ciqtumnum.

¹¹‍Hoo bulv nam haagaho daqn boam anyo koi ximab mwlwngam nyiqcw tvl jwwnum, ho bulv viyap pam meepa kumab atv-atv nyelin kunum.

¹²‍Ho nyi tulungv Lotwn benum, “Noqg imiq nyiv so dood nvi yv? Maqbv, nyega kov, nyem kov, ho bopam uraso asaqkv dood nvi yv, bulam nyook soqgv lvvgwb boolin to.

¹³‍Hoggab ngulv soq nyook sam twryum tadkun, hoggab soq nyiilug sogoq goqnamv vcjaqb At Swg agaho hvvc paku, hoo At Sw ngulam sam twrm dvb kanam pakun.”

¹⁴‍Ho Lot lvvgwb lengb nv mwwg nyem koam nyem naata bo maqb tulungam benum, “Nyebiab gorabto! Soq nyook soqgv lengleqto, hoggab At Sw bopam sam twryum tadku.” Hvbmabde mwam mwwg maqb tulungv sood nago mwwnum.

¹⁵‍Ar dooko koar komar kalam, gumtwngv Lotwn dwqdwq jaqb begamv, “Nyebia jaqb gorabto! Noqg nywxwngam la noqg lvgab doonbo nyem ko vnyiam naato, hvbma baloqkam bopam mam laqm-baqm tanam hoqgv nulam kam mvtaq tayi.”

¹⁶‍Hvbmabde mwv nyikwq-nyimwqnum. Ho nyi vnyiv mwam la mwwg nywxwngam hoo mwwg nyem ko vnyiam alaqkv twqlinum, At Sw mwam aya mwwpanum, hoo bulv mwam lvvgwb boolinum hoo mwam bopam lvvg ho doomnum.

¹⁷‍Hoo bulv bulam lvvgwb boolin yikho, akwn hv benum, “Noqg swwg gab keto. Kookur kamabv ho lywpa ho hoglo kam doqnu maabv. Diisw gvda tulub keto, hvbma baloqkam nam twrtaq tai.”

¹⁸‍Hoo Lot bulam benum, “Oa, ngoqg bir ata, hvb nyimab.

¹⁹‍Kaato, noqg nyerangv noqg kaagaho mwwsw dvb nyip nyiloqkam, hoo no ngam vc loodab aya mwwpanam mam kaakinl ngam ywwlin paku. Hvbmabde ngo diisw yornwb keca nyoma, hvb nyima baloqkam ngam ciqcaq-bviyaqkv mviya tai hoo ngo sitai.

²⁰‍Kaato, soq bopam si keleqdvb aado haajaq ma, hoo hoqhv anyo bo akv. Ngam hoqb keleq mvtbv—soq si anyo ak hvvma yv? —hoo ngoqg swwgam ywwlin tayin!”

²¹‍Mwv mwam benum, “Kaato, ngo soq sam nam mwwswl jigyin, ho noqg agam goonam bopam ham ngo twrram.

²²‍Nyebia jaqb hoqb keto, hoggab no alo wc maady deedib ngo hog akkam nyila ram.” Hoqgab bopam hoqg eminam Joar hvl goqnum.

²³‍Hwdlo Lot Joarho hvvc yukho doonyiv gvda so caalin kunum.

²⁴‍Ho At Sw Sodom la Gomorrag aoho tvlw-mwjwram la wm mam ao toloqkv At Sw nyodob holwq mvnum.

²⁵‍Hoo bopam tulungam, hoo lywpa tulungam, hoo bopam tuluho nyi doonbo mwlwngam, hoo kedho swwnbo mwlwngam mwv twryumnum.

²⁶‍Hvbmabde Lotwg nywxwngv mwwg langk ho wnbov langkwb kookurnum, hoo mwn al swwrwb nyiknum.

²⁷‍Hoo Abraham ar komc hoq nyookub wknv At Sw agaho daqnum.

²⁸‍Hoo mwv Sodom la Gomorra daiyab hoo hoq gvda lywpa daiyab kaababl kaanum, hoo mwv kaanum hoo kaato, gvda hoqg mwkv muqya apob mvram mwk hvb juucanum.

²⁹‍Hwdlo Lotwg doogw ko bopam tulungam mwv twryum yukho, hoqhv hvb nyiknum, hwdlo lywpag bopam tulungam Pwnbov twryikho, Pwnbov Abrahamnvn mwwpanum hoo Lotwn hoq twryum ko pengko hoqgv boolinum.

³⁰‍Lot Joar hoqgv lvvgwb wlayil mwwg nyem ko vnyig lvgab diisw gvdaho doonum, hoggab mwv Joarho doodwb bosnum. Hoqgab mwwg nyem ko vnyig lvgab mwv lwwpwq golo doonum.

³¹‍Hoo any akv bwrm mam benum, “Ngulug abv nyekam yuku, hoo gvda so ngulug dookub nyi haady bo dooma, gvdag nyem wcwngam wdwb.

³²‍Kuj haato, ngulv ngulug abab opo hooyaq tvl, hoo ngulv mwwg lvgab yuba tuj, ho ngulug abwg hosiqkam ngulv swwlin mvtuj.”

³³‍Ho bulug abab hoq aiho bulv opo hooyaqnum. Hoo any akv mwnwg ab lvgab yubanum. Hwdlo mwn yubanum ho hwdlo mwn gorabnum mwv cengmanum.

³⁴‍Aal loogwn so any akv bwrm mam benum, “Kaato, moi ngoqg ab lvgab ngo yubanum. Kuj soikam mwam opo hooyaq tuj. Ho no wgdvl mwwg lvgab yuba ta, ho ngulug abwg hosiqkam ngulv swwlin mvtuj.”

³⁵‍Ho bulv hoq ai hookam bulug abab opo hooyaqnum. Hoo bwrm akv gorab banv mwwg lvgab yubanum, hoo mwn hwdlo yubanum ho mwn hwdlo gorabnum mwv cengmanum.

³⁶‍Hoqgab Lotwg nyem ko vnyi-vnyiv bulug abwg hoqgv ko gvknum.

³⁷‍Any akv nyega ko ak bwwnum hoo mwwg eminam Moab hvl goqnum. Soolo mwv Moab nyi tulug abwb nyidkun.

³⁸‍Bwrm akv kam nyega ko ak bwwnum hoo mwwg eminam Ben-ammi hvl goqnum. Soolo mwv Ammon nyi tulug abwb nyidkun.