Read Nyishi BEGGAR 2 Bible Online

BEGGAR 2 - Nyishi bible

BEGGAR 2

¹Ho swcw-nyodongam, hoo doonyi-pool takar-tasar hog mwlwngam pwiyum kunum.

²‍Hoo aal kvnho Pwnbov mwwg bonam nyinam hoqgv nyiyum kunum, hoo mwwg bonam nyiknam mwlw hoqgv aal kvn deenho mwv nyikmab doonu kunum.

³‍Ho Pwnbov kvn deen aalam xinam gob mvnum hoo ham dvrwq gob mvnum, hoggab hoq aalho Pwnbov mwv swcw-nyodongam bvl pwnam hoqgv mwwg bon mwlwngam nyikmab doonunum.

⁴Hwdlo swcw-nyodongam bvl pwxo yik hoqgv, Pwnbo At Sw swcw-nyodongam bvl pwxo yik aal jaq hoqgv, soq hosiq tulu si lengknum.

⁵‍Hwdlo gvda so nwmw-nwsinv hoo svvn teriv beggar maata yikho—Pwnbo At Sw gvda so nyodo hom dvb mvma tayikho, hoo nyia kov ked aoso bonam nyima tayikho,

⁶‍hoo gvda hoqgv haapamv aob juucanum hoo ked mwlwngam iss jinum—

⁷‍ho Pwnbo At Sw nyiam diimwr hoqgv pwnum hoo swwg dooiyam mwwg nyupum lo miqlwqnum, hoo nyia kov swwnbo svdin gob nyiknum.

⁸‍Hoo Pwnbo At Sw dou-caga ho Iden boolu ak mvpnum, hoo mwwg pwnum nyiam mwv hoqho doomnum.

⁹‍Hoo Pwnbo At Sw ked hoqgv luucw-deedy svvnam kangam dvb la dvs gob nyim dvb pwnum. Boolu lvpa ra ho swwgwg svvnam daqmnum, hoo alboam la almanam cengn bo svvnam daqmnum.

¹⁰‍Pobu ak tolinl Iden boolungam iss jinum, hoo hoqhv pobu hopy gob topin kunum.

¹¹‍Otuq pobu hoqg eminv Pison. Hoqhv hun dook nyook Habila gvdab tol wiyiqnum.

¹²‍Hoo hoq gvda hoqgv hunv aljaqnum; hoqho sungam bov la onex xinam wlwngv kam doonum.

¹³‍Pobu honyi deen hoqg eminv Gihon. Hoqhv Kus gvdab tol wiyiqnum.

¹⁴‍Hoo pobu houm deen hoqg eminv Taigwris, hoqhv Assiriyag dou-cagab tol wnum. Hoo pobu hopy deen hoqg eminv Iupratas.

¹⁵‍Pwnbo At Sw nyiam naalayil mwam Iden boolungam rongo nyil hoo kaaya mvdwb apnum.

¹⁶‍Hoo Pwnbo At Sw nyiam gaml jil begamv, “Jvqtw jaqb no boolug svvn aaxy mwlwngam dvla tayin,

¹⁷‍hvbmabde alboam la almanam cengn bo svvn aaxiam no dvmabv, hoggab hwdlo aalam no hoq aaxiam dvk baloqkam no hoggub nyijaqkam sitayin.”

¹⁸‍Ho Pwnbo At Sw benum, “Nyi si vp-cwkwb doonam si alma; ngo mwam jubdub svka bo ajin lo ak pwjtayin.”

¹⁹‍Ho Pwnbo At Sw diimwr hoqgv hog mwlwngam naarabl pwnam nyorog gunggo-nyiiyongam, hoo doag pvta mwlwngam nyi dookho bulam boatvl hoo nyi hv bulam kaal-kaal mwv emin mingnum. Hoo nyi hv swwnbo svdinam hog bvxeq goqnum, hoqhv bulug eminb nyiknum.

²⁰‍Nyi hv tuun-meengam hoo doag pvtangam hoo nyorog svdin mwlwngam emin mingknum. Hvbmabde Adam gab mwam jubdub svka bo kaapa maanum.

²¹‍Ho Pwnbo At Sw nyiam yubngaql geqp dvb mvnum, hoo mwv yubdu yikho mwwg oxub soogwn naalinum hoo hoqg naarongam aiyaq lvgab koqtumnum.

²²‍Hoo Pwnbo At Sw nyi hoqgv oxub naalinam ham mwv nyem ak gob pwnum hoo mwnwn nyi dook ho boa jiknum.

²³‍Ho nyi hv benum, “Vjaqsu bo si ngoqg alog alongv; ngoqg aiyaqg aiyaqkv; mwnwn Nyemv hvl eminum, hoggab mwnwn Nyi hoqgv naalinum.”

²⁴‍Hoqgab nyegangv mwwg abam la mwwg annam apaq peel mwwg nywxw lvgab vnyiq-hang pwkin gob swwbam tayin, hoo bulug soodinv akin gob nyitayin.

²⁵‍Hoo nyegangv la mwwg nywxwngv vnyi-vnyiv talonum hoo bulv hvnyw maanum.