Read Nyishi BEGGAR 20 Bible Online

BEGGAR 20 - Nyishi bible

BEGGAR 20

¹Abraham Negeb gvda daiyab nyiogy wnum hoo Kades gvla Surwg pengko ho doonum; hoo mwv Gerar urab nyiogy wnum.

²‍Hoo Abraham mwwg nywxw Saranvn benum, “Mwn ngoqg bwrmv.” Hoo Gerarag lvpw at Abimelek nyi kanam tvl Saranvn boa mvnum.

³‍Hvbmabde Pwnbov ai Abimeleknvn yumaho mwam benum, “Kaato, hoq nyem mam no naagam gab, no sikbo nyi akv, hoggab mwn nyi akwg nywxwngv.”

⁴‍Abimelek mwnwn doog maatanum. Ho mwv benum, “At Sw, no, hog cengma bo nyiilungam mengta yin yv?

⁵‍Mwv atv ngam bema namyv, ‘Mwn ngoqg bwrmv?’ Hoo mwn atv kam benum, ‘Mwv ngoqg vbwngv.’ Ngoqg lootw hang hoqgv hoo cengma bo alaqkv soq sam ngo nyipa kun.”

⁶‍Ho Pwnbov mwam yumaho benum, “Vv, ngo cengdo noqg hang lootw ko-gab no soq sam nyipa kun, hoo ngam ceekol nyic nyim mvma dvb hoqham ngo sulak nam pvvnum. Hoqgab ngo nam mwnwn issiq mvma dvb mvturnum.

⁷‍Ho sija, nyi akwg nywxw ham jikur tuku, hoggab mwv nyiqry benbo akv, ho mwv noqg gab xumj tayin, hoo no swwl dootayin. Hvbmabde no mwnwn jikur mabnyiloqkam no cengto, no la noqg nyi mwlwngv jvqtw jaqb sitayin.”

⁸‍Ho Abimelek ar komc gorab layil hoo mwwg nyera tulungam mwv goqkum banv hog mwlwngam bulam betamnum. Hoo nyi tulungv vcjaqb bosnum.

⁹‍Ho Abimelek Abrahamnvn goqanv hoo mwam benum, “Hoggub no ngulam soq sib nyit kun? Hoo nam ngoq hoggv ceekol nyic nyij tvl, no ngam la ngoqg lvpw-hatiam soq koibo nyic sam baqa pakun? No ngam nyidy maanam pagoqkam nyipa kun.”

¹⁰‍Hoo Abimelek Abrahamnvn benum, “Hoggv no kaatwl, no soq sib nyipa kun?”

¹¹‍Abraham benum, “Ngo sam nyinam si hvbnyiloqkam ngo mwwnum, soq nyook so Pwnboam bos bo dooma, hoo ngoqg nywxw gab bulv ngam mengtai mwwnum.

¹²‍Jvqtw jaqb bebnyiloqkam mwn ngoqg bwrmv, ngoqg annwg ko maajaqkam, ngoqg abwg kov.

¹³‍Hoo Pwnbov ngam ngoqg abwg nam hoqgv gaqlin mvknum, ngo mwnwn benum, ‘No ngam aya mwwpa gvdwl: ngulug nyook haal dook mwlwho ngam beto, mwv ngoqg vbwngv.’”

¹⁴‍Ho Abimelek sviyangam la svv hvvbv, hoo nyera tulungam hoo paqn tulungam bulam Abrahamnvn jinum, hoo mwwg nywxw Saranvn mwam jikur kunum.

¹⁵‍Hoo Abimelek benum, “Kaato, ngoqg gvdangv noqg kaagaho doodo; hogloq ho no doonw dvn ho dooto.”

¹⁶‍Ho Saranvn mwv benum, “Kaato, noqg vbwngam ngo lwwyw ak rup vjwram jipa kun. Soq si noqg lvgab dooba bo mwlwg vnyiq kaagaho bulv hog cengma bov hvl kaakin dvn, hoo mwlwg kaaga hoqgv nam ywwlin pakun.”

¹⁷‍Ho Abraham Pwnboam xumnum, hoo Abimeleknvn Pwnbov mwpkunum, hoo mwwg nywxwngam la paqn tulungam ko bwwm dukub mwpkunum.

¹⁸‍Hoggab Abraham gv nywxw Sara pagoq gab, At Sw Abimelek gv nombug mamb tulungam mutuml apnum.