Read Nyishi BEGGAR 21 Bible Online

BEGGAR 21 - Nyishi bible

BEGGAR 21

¹At Sw mwwg benum hvb Sara dookub haanum, hoo At Sw mwv Saranvn dingr kunam mam nyij kunum

²‍Hoo Sara ko gvnum hoo Pwnbov mwam hoggub agam goonum hvb Abraham hwdlo nyekam yukho nyega ko ak bwwjnum.

³‍Abrahamnvn nyega ko ak Sarag ko bwwjnam ham mwv Aisak hvl emin mingknum.

⁴‍Hoo Pwnbog gaml jinam hvb, hwdlo aal piin yikho Abraham mwwg nyega ko Aisaknvn mux mvnum.

⁵‍Hwdlo mwwg nyega ko Aisaknvn ko bwwi yikho, Abraham vnyw lwwg kunam.

⁶‍Hoo Sara benum, “Pwnbov ngam nyirj dvb mvpa ku; tapa bo nyi vx-cwrv ngam nyirj tayin.”

⁷‍Hoo mwn benum, “Hiyv bela tan Abraham gab Sara ko tulungam sorab nyotayin? Hvbsujaqkam mwwg nyekam mood so ngo mwwg gab nyega ko ak bwwnum.”

⁸‍Hoo kongv swwrabnum hoo dvs-twws dvrab kunum. Hoo Abraham koibo durum ak rumnum ho hoq aalho Aisak dvs-twws dvbeql dvrabnum.

⁹‍Hvbmabde Sara kaanamv Ijipt paqn Hagarg nyega kov, hiyam mwn Abraham gab bwwjnam akv nyirj-nyirparnum.

¹⁰‍Hoggab mwn Abrahamnvn benum, “Soq paqn nvsur sam mwnwg nyega ko lvgab ruqtaql ruqpaqto, hoggab soq paqn nvsurg nyega ko si ngoqg nyega ko Aisak lvgab otu nvvsiql bwwbam dvb nyiram.”

¹¹‍Hoo mwwg ko tuup pagoq gab Abraham vcwr gokam hemp maanum.

¹²‍Hvbmabde Pwnbov Abrahamnvn benum, “Soq nyega ko gabla noqg paqn nvsur nyem gab vcwr gokam mwwdwq maabv. Hoggv xeq Sara nam bepan, mwnwg benam hvb no nyito, hoggab Aisak hoqgv noqg hosiqkam xilin tayin.

¹³‍Hoo ngo paqn nvsurg ko tuup hoqgv kam nyob hoolu ak mvtayin, hoggab mwv kam noqg hosiqkv.”

¹⁴‍Ho Abraham ar komc gorab layil wtwngam la vpin yooxaqho iss hwwlwq tvl ham Hagarg gorbwho tolwq jinum, ho ko lvgab mwnwn rootaql roolin kunum. Hoo mwn ruqlin kutwl Beerseba deexa-raraho gaqkar yvnum.

¹⁵‍Hwdlo vpin yooxaqho iss baqnam mam twwiyum yukam, mwn kongam puum niikum golo joopnum.

¹⁶‍Hoo mwn kongam kaatol kaapa dvb taqcgon ho doonum, hoq aadongv uppuq toocnam hwdgo aadonum, hoggab mwn benum, “Ngo ko sinam mam kaanyi kuma.” Hoo mwn mwwg taqcgon ho dootwl, mwn vc loodab kiir nool sogoqnv xabnum.

¹⁷‍Hoo Pwnbov nyega koog xabnam mam tapanum, hoo Pwnbog gumtwngv Hagarnvn ao gvda toloqkv goqbnv mwnwn benum, “Hagar, no hognvk vs-axaqkv doodwn? Bos maabv Pwnbov nyega kov hogloq ho dootwl xabdwn ham tapa paku.

¹⁸‍Nyebiab gorabl! Koam joorab to, hoo mwam noqg alaq hoqgv hingkib sorabto, hoggab ngo mwam koibo nyob hoolu ak gob mvtayin.”

¹⁹‍Hoo Pwnbov mwnwg vnyiqkam nyiqbio mvknum, hoo mwn iss sokum ak kaapanum. Hoo mwn hoqb wbnv vpin yooxaqho issam bwwr dvb hwwlwq layil hoo kongam twwm dvb jinum.

²⁰‍Hoo Pwnbov ko lvgab doobanum, hoo mwv swwrabnum. Mwv deexa-raraho doonum hoo mwv tumr-xiram palaq jaqnum.

²¹‍Mwv Paran deexa-raraho doonum, hoo mwwg annv mwwg gab Ijipt gvda hoqgv nywxw ak nvvjnum.

²²‍Hoq moodho Abimelek la mwwg sipai saab Pikol Abrahamnvn benum, “Pwnbov noqg hog mwlw nyiklo dooba do.

²³‍Sija hoqgab ngam Pwnbo eminlo dingr to, ngam la, ho ngoqg hotam lvgab, ho ngoqg swwnam-geenam lvgab, no vm-xaalyo nyimur nyiram hvl, hvbmabde noqg nyiogy gil dook gvdaho, ngo nam hoggub aya jaqb nyik-wknum, hoqhvb kalam no ngam nyila ka.”

²⁴‍Hoo Abraham benum, “Ngo dingr dvn.”

²⁵‍Hwdlo Abimelek gv nyera tulungv iss sokum mam naareq ko-gab Abraham Abimeleknvn soranum,

²⁶‍Abimelek benum, “Ngo cengma hoqham hiyv nyipan; no ngam betam ma, hoo soolo namgub ngo ham tapa ma.”

²⁷‍Ho Abraham sviyangam la svv hvvbam naalayil hoo hoq tulu ham Abimeleknvn jinum, hoo nyi vnyiv pvvb birnam mam mvnum.

²⁸‍Abraham sviya ko kvn go mwwg sviya pvtw hoqgv nvvbwq lengnum.

²⁹‍Hoo Abimelek Abrahamnvn benum, “Hognvk niqtuqkv soq sviya ko kvn sam no nvvbwql apnam si?”

³⁰‍Mwv benum, “Soq sviya ko kvn sam ngoqg alaq soqgv no naatayin, ho hoqhv ngo soq sokum sam dukoq bov hvl ngoqg hvvkib nyitayin.”

³¹‍Hoqgab hoq nyookam Beerseba hvl goqnum, hoggab hoqho bunyi vnyiv pvvb bwwl dingrnum.

³²‍Ho bulv Beerseba ho pvvb mwrwl apnum. Ho Abimelek la mwwg sipai saab Pikol gorab kunv Palistan gvdab wkur kunum.

³³‍Abraham Beerseba ho tamarisk svvn ak liinum hoo hoqho Pwnbo At Swg eminam Kuiyum xaqb swwn bov hvl goqnum.

³⁴‍Hoo Abraham Palistan gvdaho aal vigo doonum.