Read Nyishi BEGGAR 22 Bible Online

BEGGAR 22 - Nyishi bible

BEGGAR 22

¹Soq tulu si nyixo kokw so Pwnbov Abrahamnvn pookanum hoo mwam benum, “Abraham!” Hoo mwv benum, “Ngo si doodwn.”

²‍Mwv benum, “Noqg koam naato, noqg ko tuup akin ciqnyi Aisaknvn, hiyam no vcjaqb aby dvn, hoo Moriya gvdab wto, hoo ngo nam betayin mwam puutu ak golo tolo boyuqnam pwr akib jito.”

³‍Ho ar komc Abraham gorab layil mwwg svdam ho nyin-mvn sanam mam rublwqnum, hoo mwwg lvgab mwwg nyi yaapa vnyi gola mwwg ko tuup Aisaknvn bool wgnum. Hoo mwv boyuqnam pwr aky parn dvb wsw panum hoo gorabl hogloq nyookub Pwnbov mwam betamnum hoqb wnum.

⁴‍Aal loum deenho Abraham mwwg vnyiqkv piorabnv nyookam kootul kaapanum.

⁵‍Ho Abraham mwwg nyi yaapangam benum, “Svdam lvgab so dooiya to; ngo la ko si tolo wgdvl xumpekul hoo nulug dook so lokta hookur tayin.”

⁶‍Hoo Abraham boyuql pwr aky parnan wswngam mwwg ko Aisaknvn joobaq jinum. Hoo mwwg alaqho mwv wm mam la lyoqciq kam bwwnum. Ho bunyiv lvkin gob wba sunum.

⁷‍Hoo Aisak mwwg ab Abrahamnvn benum, “Ngoqg ab!” Hoo mwv benum, “Ngoqg ko, ngo si doodwn, mwv benum, “Kaato, wmv la wswngv doodo, hvbmabde boyuql pwr aky jidynam sviya akv hoglo?”

⁸‍Abraham benum, “Ngoqg ko, Pwnbov boyuql pwr aky jidy sanam sviya koam mwv atv jitayin.” Hoqgab bunyiv lvkin gob wba sunum.

⁹‍Hwdlo mwam Pwnbog betam ko nyookho bulv hvvc yukam, Abraham hoqho yugw ak mvnum hoo wswngam pvvtw kwlwl paapnum hoo mwwg ko Aisaknvn raqtwl yugwg wsw aoho joopnum.

¹⁰‍Ho mwwg koam mengn dwb Abraham mwwg alaqkv yoqciqkam naarabnum.

¹¹‍Hvbmabde At Swg gumtwngv aotoloqkv mwam goqbnv hoo benum, “Abraham, Abraham!” Hoo mwv benum, “Ngo si doodwn.”

¹²‍Mwv benum, “Noqg alaqkv ko aoho laqdaq maabv ho mwam hog akkam nyimabv, hoggab sija ngo cengpa ku no Pwnboam bosdo, ho kaanamv noqg koam, noqg ko tuup akin ciqnyingam mwam ngoqg pagoq gab parl ap kumanyi.”

¹³‍Hoo Abraham mwwg vnyiqkv piorab kaanum, hoo kaanamv, mwwg langk ho yaap tvmwr dorg mwwg vrrw tulungam teriv liitu tvl daqnum. Hoo Abraham wnv yaap tvmwram naalayil hoo ham boyuqnam pwr akib mwwg ko Aisakwg kwlib pwr aky jinum.

¹⁴‍Ho Abraham hoq nyook hoqg eminam goqnum, “At Sw jitayin”; hoqham soolo namgub bedwn, “At Swg puutuho hoqham jidwb nyitayin.”

¹⁵‍Hoo At Swg gumtwngv ao toloqkv lwnyi dvb Abrahamnvn goqnum

¹⁶‍hoo benum, “Noqg koam, noqg ko tuup akin ciqnyingam mwam ngoqg pagoq gab parl ap kuma, hoggab no soq sam nyigam gab, ngo atv atam dingrwl, At Sw ngo bibwqdvn,

¹⁷‍Jvqtw jaqb ngo nam lvqc citayin, hoo jvqtw jaqb ngo noqg hosiqkam doag takar tulu tvvb hoo sa-svlo sugurg xuqx tulu hvb dumtwq-miilyw mvtayin. Hoo noqg hosiqkv mwwg ceebio tulug toggoqkam gumn bwwtayin,

¹⁸‍hoo noqg hosiq hoqgv swcw soqg nyob mwlwngam lvqc citayin, hoggab ngoqg benam yalam no tvjw paku.”

¹⁹‍Ho Abraham mwwg nyi yaapa dookub wkur kunv, hoo bulv lvkin gob Beersebab wnum. Hoo Abraham Beersebaho doonum.

²⁰‍Soq tulu si nyixo kokw so Abrahamnvn betamnum, “Kaato, Milka nvkam noqg bor Nahor gab dwrbuqpa ku:

²¹‍Uj mwwg tuup vbwngv, Buj mwwg borv, Kemuyel Aramwg abv,

²²‍Kesed, Hajo, Pildas, Jidlap, hoo Betuel.”

²³(Betuel Rebekag abv). Abraham gv bor gab, soq ko piin sam Milka Nahor gab dwrbuqjnum.

²⁴‍Hoq aoho, mwwg xwwbaq nywxw, hiyvg eminv Reuma, mwn Teba, Gaham, Tahas, hoo Maakanvn dwrbuqnum.