Read Nyishi BEGGAR 23 Bible Online

BEGGAR 23 - Nyishi bible

BEGGAR 23

¹Sara vnyw 127 gob swwnum; Soq vnyw tulu si Sarag swwl doonamv.

²‍Hoo Sara Kiriat-arba (hoqhv Hebron) Kanaanwg gvdaho siknum, hoo Abraham Sara gab nyix-riiknv mwn gab xabnum.

³‍Hoo Abraham mwwg sima taab wnv Hittait nyi tulungam benum,

⁴“Nulug pengko ho ngo nyiogy haanbo nyoodo nyiingv; nulug pengko hoqgv ngam svma liik nyook loq ak gumnwb jitbv, ho ngoqg kvvciqho ngoqg svma sam ngam liim tvbv.”

⁵‍Hittait nyi tulungv Abrahamnvn birwqnum,

⁶“Ngoqg bir at, ngulam tato; no ngulug pengko so Pwnbog lvpw ko tuup akv. Noqg svmangam ngulug nyubu tulu hoqgv noqg kvvlwqnam uraho liito. Ngulug soqgv noqg svmangam akjijaqkam mwwg nyubuho nam liim ram hvl parl apbo dooma.”

⁷‍Abraham gorab banv Hittait gvdag nyiilungam paql xumnum.

⁸‍Hoo mwv bulam benum, “Ngoqg svma sam ngoqg kvvciq hoqgv ngam liim dvb nulv mwwd nyiloqkam, ngam tatbv hoo Johar gv ko tuup Epronnvn kotbv,

⁹‍ho mwv ngam Makpela lwwpwq kam jikam yin pv, hogloq ham mwv doogdvn; hoqhv mwwg rongo vtwrho doodwn. Hoqg koram ngam nulug agaho bumpwb mwam jim dvb betbv, ho ham ngo svma liikum ko nyook gumn gob pvvtayin.

¹⁰‍Sija Epron Hittai nyi tulug pengko ho doodunam, hoo Hittait nyi Epron Abrahamnvn Hittait nyi tulug tapa dvb, mwwg bopamg toggoqho haanbo mwlwngv tapa dvb birwqnum,

¹¹“Hvbma, ngoq bir at, ngam tato: Ngo rongongam nam jigyin, hoo hoqho doonbo lwwpwqkam nam jitayin. Ngoqg nyiilug ko tuup tulug kaaga so ngo ham nam jigyin. Noqg svmangam liito.”

¹²‍Ho Abraham gvdag nyiilug agaho paql xumnum.

¹³‍Hoo mwv Epronnvn gvdag nyiilungv tapa dvb benum, “Hvbmabde no mwwd nyiloqkam, ngam tato: Ngo rongog koram jigyin. Sam ngoqg soqgv loorwq tvb, ho ngoqg svmangam tolo ngo liitan.”

¹⁴‍Epron Abrahamnvn birwqnum,

¹⁵“Ngoqg bir at, ngam tato: gvda soqg korv rup sikil lwwpy gob nyidwn, Noqg la ngoqg pengko so hog bes dooma? Noqg svmangam liito.”

¹⁶‍Abraham Epronwg benam mam tanum, hoo Abraham Epronnvn Hittait nyi tulug tapa dvb korv rup sikil lwwpy gob nyidwn hvnam mam xilin jinum. Hoq apo ho kwm-kor mvnbo pengko lo xinam jaq hvb xilin jinum.

¹⁷‍Ho Makpelaho doonbo Epronwg rongongv, dou-cagag Mamre ho doonum. Rongo lvgab lwwpwq doon boam hoo rongo ho svvn daqnbo mwlwngam, ho hoq gvda dwaqkam

¹⁸‍Abrahamnvn gumn doog mvdkub Hittait nyi tulug, ho mwwg bopamg toggoqb haanbo mwlwg kaagaho gvqlwq jiknum.

¹⁹‍Soq kokw so, Makpelag rongog lwwpwq dou-cagag Mamre (hoqhv Hebron) Kanaanwg gvdaho, Abraham mwwg nywxw Saranvn svma liiknum.

²⁰‍Hoqho doonbo rongongam la lwwpwqkam Hittait nyi tulungv Abrahamnvn svma liikum ko nyook gumn gob jiknum.