Read Nyishi BEGGAR 24 Bible Online

BEGGAR 24 - Nyishi bible

BEGGAR 24

¹Sija Abraham vnywngv vigo wknv nyekam kunum. Hoo At Sw Abrahamnvn hog luucw-luutam mwlwngam lvqcnum.

²‍Hoo Abraham mwwg namho mwlwngam axa yaanbo hoo mwwg doognam hog mwlwngam kvvyw-tada yaanbo, mwwg nyerangam benum, “Noqg alaqkam ngoqg xarpo so mabdaqto,

³‍hoo ngoqg doogw ko Kanaan nyi tulug gvdag nyem mam no ngoqg ko tuup gab nywxw nvvjram hvl At Sw, hiyv swcw-nyodongam Pwnbo eminho, ngo nam dingm gviyin,

⁴‍hvbmabde ngoqg gvdab wgdvl hoo ngoqg nyi hoolu hoqgv ngoqg ko tuup Aisak gab nywxw nvvjto.”

⁵‍Nyera akv mwam benum, “Nyem akv ngam soq gvda namgub wmin gvdwb maak hvkam suiyv. Ngo noqg ko tuupam no hogloq gvda hoqgv haanum hoqb ngo wg gvden?”

⁶‍Abraham mwam benum, “No hoggub nyijaqkam ngoqg koam aloqb bool wgmab.

⁷‍Ao lvpwg Pwnbo, At Sw, hiyv ngoqg abwg nam hoqgv la ngoqg imiq dvpar hoqgv ngam boolin layil ngam agam gool hoo dingrnum, ‘Noqg hosiqkam ngo soq gvda sam jitayin,’ mwwg gumtwngam noqg otuqb mwv kanam tayin hoo ngoqg ko tuup gab no aloqkv nywxw ak nvvjtayin.

⁸‍Hvbmabde nyem akv noqg lvgab wmin gvram hvbnyiloqkam ngoqg soq dingrnam si noqg aoho hog nyiram; no hoggub nyijaqkam ngoqg kongam aloqb bool wgmab.”

⁹‍Ho nyera akv mwwg alaqkam mwwg at Abraham gv xarpo ho mamdaqtvl mwam soq pagoq gab dingrnum.

¹⁰‍Ho nyera akv mwwg atwg Svjin tulungam doryw go naalayil hoo albo xinam akiam mwwg atwg hoqgv naalayil wnum; hoo mwv wrab kunv Nahorg bopam Mesopotamiyab wnum.

¹¹‍Hoo hwdlo nyem tulug iss bwwtab lengd moodho mwv bopam lvvgwg sokum ho ariyum svjin tulungam iss twwm dvb buma mvnum.

¹²‍Hoo mwv benum, “Ngoqg nyiit at Abraham gv Pwnbo At Swa, soolo ngam niqtuq nyilin mvtbv hoo ngoqg nyiit at Abrahamnvn tumab abynam mam kaakin tvb.

¹³‍Kaato, ngo iss buqlinko si doqdu dvn, hoo bopam soqg nyi tulug nyem ko tulungv iss bwwtab lingdu do.

¹⁴‍Hiyvg nyem nyijwram ngo betayin, ‘Anya mwwpa gvdwl noqg uppum mam tvpoqto ngo iss twwtayin,’ hoo hiyv twwto hvl betayin, hoo ngo noqg svjin tulungam iss twwm tayin’—hoq akam jaq ham ngoqg nyera Aisak gab no xuqbwq tvbv. Hoq hoqgv ngoqg nyiit atam noqg tumab abynam kaakinam mam ngo cengtayin.”

¹⁵‍Mwv hvb agam goodunam mam goonya maatab, kaato, Rebeka, Milkag ko tuup Betuel, Nahorg nywxw, Abraham gv bor hoqg nyem kov iss uppum mam mwnwg gorbw ho jootwl lvvgwb lengnum.

¹⁶‍Nyem nyijwr akv vcjaqb kvvlwql kaaby dvb nyinum, mwn nyega cengka maata bo mvvngam akv. Mwn iss buqlin koob wnv hoo mwnwg uppumho iss bwwr dvb suqlwq layil caaknum.

¹⁷‍Ho nyera akv xarbnv mwnwn kvvrwq banv benum, “Anya mwwpa gvdwl noqg uppum hoqgv ngam iss loq ak twwm dvb jila bv.”

¹⁸‍Mwn benum, “Ngoqg atv, twwto.” Hoo mwn nyebia jaqb uppum mam tvpoq banv mwam iss twwm dvb jinum.

¹⁹‍Hwdlo mwn mwam iss twwm dvb jixo kokw so, mwn benum, “Noqg svjin tulu gab kam ngo iss loq tuqlin jitayin, bulv mwlwngam hvngwr twwn mvto.”

²⁰‍Ho mwn nyebia jaqb mwnwg uppum iss twwngongam dookam ho tooro pel hoo lokta xarnv sokum hoqgv iss bwwnum, hoo mwn mwwg svjin mwlw gab iss bwwjnum.

²¹‍At Sw mwwg nyiody boonam mam niqtuq lengm tad nvba dwq ma, lengma tamdvn yaaba dwq, nyi ak ham cooikab mwnwn rogabl doonum.

²²‍Hwdlo svjin tulungv issam twwnya yukho, nyi akv xinam jaq hun gagy papo sikil gob mvnam ak naanv mwnwg nyuruho kvrlwq jinum, hoo wyw gob sikil vgw dvb mvnam hun kooj pwnyi go mwnwg alaqho kuqlwq tvl,

²³‍hoo benum, “No hiyvg nyem kongv, ngam anya mwwpa gvdwl betam. Noqg abwg nam alo soi ngul gab dook dooma yv?”

²⁴‍Mwam mwn benum, “Ngo Milkag ko tuup Betuel kongv, hiyam mwn Nahor gab ko bwwjnum.”

²⁵‍Mwn hvraqb benum, “Ngulgv naleqgo tvpy-tapoq am piil svding dvsv doodwn, hoo aiyam yubkv doodwn.”

²⁶‍Nyi akv mwwg dumpongam pvxwl hoo At Swn xumnum

²⁷‍hoo benum, “Ngoqg nyiit at Abraham gv Pwnbo At Swn paqyalinco, hiyv ngoqg nyiit atam mwwg tumab abynam mam la mwwg dengkynam mam apaqma. At Sw ngam ngoqg nyiit atwg imiq dvpar namsi boolwq paku.”

²⁸‍Ho nyijwr akv mwnwg annwg nammwb xarbnv soq hog mwlw sam betamnum.

²⁹‍Rebeka vbw ak doonum mwwg eminv Laban. Laban nyi lvvgwb xarlinv subuq buqlinko ho doqdu bo nyiam kvvrwqnum.

³⁰‍Mwv mwwg bwrm nyuruho gagy gvnam mam hoo mwwg bwrm alaqho kooj gvnam mam kaapanum, hoo mwwg bwrm Rebekag goonam mam tapanum, “Soq sib nyi hv ngam benum,” ho mwv nyi dookub wnum. Hoo kaato, nyi ak hv svjin tulu lvgab iss buqlinko ho doqdunam.

³¹‍Mwv benum, “Kujo urab haato, At Swg lvqcnam ak no. Hoggub no lvvg so daqdwn? Ngo noqgab dook nammam mux-mvaq peen hoo svjin tulu gab daqkv doodwn.”

³²‍Ho nyi hv nammwb haanum hoo svjin tulug baqnam mam joopnum, hoo svjin tulungam tvpy-tapoq kvla am piil dvs jinum, hoo nyi ak ham la mwwg lvgab wba bo nyi tulungam lvpia hurs mvdwb iss jinum.

³³‍Ho dvsam mwwg agaho dvm dvb joopnum. Hvbmabde mwv benum, “Ngo hoggv betab haadwn ham bema deedib hog dvram.” Mwv benum, “Gooka to.”

³⁴‍Ho mwv benum, “Ngo Abraham gv nyerangv.

³⁵‍At Sw ngoqg nyiit atam vc loodab lvqc cipan, hoo mwv vc jaqb koidvn. Mwv mwam sviya pvtwngam hoo sibin-svvngam, rup la hunam, nyerangam la paqnam, svjin tulungam la svdam tulungam jipa kun.

³⁶‍Hoo hwdlo mwn xox yukho ngoqg nyiit atwg nywxw Sara ngoqg nyiit atam ko tuup ak bwwjnum, hoo mwwg doognam hog mwlwngam mwam jipa kun.

³⁷‍Ngoqg nyiit atv ngam dingnam hoo begamv, ‘Mwwg doogw ko Kanaan nyi tulug gvdag nyem mam mwwg ko tuup gab ngam nywxw nvvj mvma dvb benum,

³⁸‍hvbmabde ngoqg abwg nammwb no wgdvl hoo ngoqg nyob hoolu hoqgv ngoqg ko tuup gab nywxw loq ak nvvj taabwqk hvnum.’

³⁹‍Ngoqg nyiit atam ngo benum, ‘Lokam nyemv ngam wmin gvmab yikam suiyv.’

⁴⁰‍Hvbmabde mwv ngam benum, ‘Ngo hiyvg agaho wl yvbanam akv, At Sw, mwwg gumtwngam noqg lvgab kanam tvl hoo noqg lamtangam niqtuq lengm tayin. Ngoqg ko tuup gab ngoqg nyob hoolu maalo ngoqg abwg imiq dvpar hoqgv no nywxw nvvjtayin.

⁴¹‍Ho nam ngoqg dingr mvn hoqgv pw-hwwjram, hwdlo no ngoqg nyob hoolub haai kukam hoo bulv nam mwnwn jima baloqkam, ngoqg nam dingr mvnam hoqgv pw-hwwjram.’

⁴²“Ngo soolo iss buqlinko ho haanum hoo benum, ‘Ngoqg nyiit at Abraham gv Pwnbo At Swa, sija ngoqg lamta wnam mam no niqtuq lengm dvb mwwd nyiloqkam,

⁴³‍kaato, ngo iss buqlinko si doqdu dvn. Iss buqlinko ho iss bwwtab lengn bo mvvngam nyijwram, hiyam ngo betayin, “Anya mwwpa gvdwl noqg uppum hoqgv ngam twwm tvb hvl beikam,”

⁴⁴‍hoo hiyv ngam betayin, “Twwto, hoo noqg svjin tulu gab kam ngo iss bwwj tan hvnbo,” nyem akam At Sw ngoqg nyiit atwg ko tuup gab xuqj pakun.’

⁴⁵“Ngoqg hang uraho hoqhvb goodunamv goonya maatab, kaato, Rebeka mwnwg uppum mam mwnwg gorbw ho joolayil haanum, hoo mwn sokumb haabnv iss suqnum. Ngo mwnwn benum, ‘Anya mwwpa gvdwl ngam iss loq twwm tvb.’

⁴⁶‍Mwn nyebia jaqb mwnwg gorbw hoqgv uppum mam joopoq banv hoo benum, ‘Twwto, hoo noqg svjin tulu gab kam ngo iss bwwjtayin hvnum.’ Ho ngo twwnum, hoo mwn svjin tulungam kam twwdwb jinum.

⁴⁷‍Ho ngo mwnwn toxnum, ‘No hiyvg nyem kongv?’ Mwn benum, ‘Nahorg ko tuup Betuel gvla Milkag nyem kongv hvnum.’ Ho ngo mwnwg nyuruho gagiam kvrlwq jinum hoo mwnwg alaqho koojam kuqlwq jinum.

⁴⁸‍Ho ngoqg dumpongv pvxw banv ngo At Swn xumnum hoo ngoqg nyiit at Abraham gv Pwnbo At Swn paqyalinco paqnum, hiyv ngam kvtaq jaqb wgnv ngoqg nyiit atwg imiq dvpar hoqg nyem koam mwwg ko tuup gab naam tagdo.

⁴⁹‍Ho sija noqg tumab abynam mam la ngoqg nyiit atam no mwwjw swswnam mam no ngam kaakin gvdwl betam to; hoo noqg ma hvnam mamkam ngam betam to, ho ngo lvqbwq bvjaqkam ho laqc bvjaqkam wtayin.”

⁵⁰‍Ho Laban la Betuel birwqnv hoo benum, “Bvrwqsi At Swg hoqgv haapa; ngulv nam al-koram benyi deema.

⁵¹‍Kaato, Rebeka noqg agahv doodo; At Sw agam goop nyiloqkam, mwnwn naal boogwn, hoo mwnwn noqg nyiit atwg ko tuup nywxwb swwm ta.”

⁵²‍Hwdlo Abraham gv nyerangv bulug gomcwram tapa tvl, mwv atv dumpo pvxwl At Swn xumnum.

⁵³‍Hoo nyera akv xinam jaq hun-rupam, hoo vjam naalin banv Rebekanvn jinum. Mwv mwnwg vbwngam la mwnwg annam kam xinam jaq akiam jinum.

⁵⁴‍Hoo mwv la mwwg lvgab wba bo nyi tulungv dvk-twwknum, hoo bulv hoq aiho ho dooknum. Hwdlo bulv ar gorab yukho, mwv benum, “Ngam ngoqg nyiit atwg dookub kanam tukbv.”

⁵⁵‍Mwnwg vbwngv la annv benum, “Aal looyw gob nyem ko sam ngulug lvgab doom tvb; hoq kokwb mwnwn wmtayin.”

⁵⁶‍Hvbmabde mwv bulam benum, “Ngam oyu mvmabv, hoggab ngoqg lamtangam At Sw niqtuq nyilin gvpa ku. Hoqgab, ngam ngoqg nyiit atwg dookub kanam tukub.”

⁵⁷‍Bulv benum, “Honyiloq kuj ngulv nyem koam goqg dvl mwnwn taka tuj.”

⁵⁸‍Hoo bulv Rebekanvn goqnum hoo mwnwn benum, “No soq nyi lvgab wmin gvb yv?” Mwn benum, “Ngo wtayin.”

⁵⁹‍Ho bulug bwrm mam la mwnwg paqnam Abraham gv nyera nyi tulug lvgab bulv kanam nvmlwq kunum.

⁶⁰‍Hoo bulv Rebekanvn oj-amar mvtwl hoo mwnwn benum, “Ngulug bwrma, no lwwyw-lwwyw cam ann gob nyita ka, hoo noqg hosiqkv bulam oyum bo toggoqkam gumn bwwg nvka!”

⁶¹‍Ho Rebeka la mwnwg paqn tulungv gorabnv svjin tulu aoho caol nyi ak ham wmin gvknum. Ho nyerangv Rebekanvn boola yukul mwwg lamtab wknum.

⁶²‍Sija Aisak Beer-lahai-roi hoqgv hookur layil Negeb ho doodunum.

⁶³‍Hoo ariyum daiya Aisak rongo ho kaakar yvnum. Hoo mwwg vnyiqkv piorabnv kaanum, hoo kaanamv, svjin tulungv hoodul doonam.

⁶⁴‍Hoo Rebeka mwnwg vnyiqkv piorabl kaanum, hoo hwdlo mwn Aisaknvn kaapa yin, mwn svjin hoqgv geepoqnum

⁶⁵‍hoo nyerangam benum, “Rongo alo ngulam wrwq taab wdu dvn nyi vv hiyv yu?” Nyerangv benum, “Aloq vv ngoqg nyiit atv.” Ho mwn mwnwg nyuqm putumnanam naanum hoo mwn atam putumnum.

⁶⁶‍Hoo nyerangv Aisaknvn hog mwlw mwam nyiknam mam betamnum.

⁶⁷‍Ho Aisak mwnwn mwwg ann Sarag tombu ho boa kunum, Rebekanvn nyem naaknum hoo mwn mwwg nywxwb nyiknum, hoo mwv mwnwn abynum. Ho Aisak mwwg annwg sixo kokw so haat mvl kunum.