Read Nyishi BEGGAR 25 Bible Online

BEGGAR 25 - Nyishi bible

BEGGAR 25

¹Abraham nywxw akta naanum, hog eminv Ketura.

²‍Mwn mwam ko bwwjnum Jimran, Joksan, Medan, Midian, Isbak, hoo Sua

³‍Joksan Seba gvla Dedan abv. Dedan ko tuupv Assurim, Letusim, hoo Leummin.

⁴‍Midian ko tuupv Epa, Eper, Hanok, Abida, hoo Eldaa. Soq tulu si Keturag ko tulungv.

⁵‍Abraham hog mwlwngam Aisaknvn jiknum.

⁶‍Hvbmabde mwwg xwwbaq nywxw ko tuup tulungam gumnam pengtwl Abraham mwwg swwl dooi yikho bulam Aisak hoqgv dou-caga daiya gvdab wpaq mvnum.

⁷‍Abraham vnyw 175 gob swwnum.

⁸‍Abraham dumpo-xiima nyekam pvg dvb dootwr peekul, hoo mwwg nyiilungam goqkum tvl mwv svqriq kunum.

⁹‍Mwwg ko tuup Aisak la Ismaiyel bunyiv mwam dou-caga Mamreg, Hittait nyi Johar ko tuup Epronwg, rongo Makpela lwwpwqho svma liinum,

¹⁰‍Hoqhv Abraham Hittait nyi tulu hoqgv rongo rvnamv. Hoqho Abrahamnvn mwwg nywxw Sara lvgab liiknum.

¹¹‍Abraham sixo kokw so Pwnbov mwwg ko tuup Aisaknvn lvqcnum. Hoo Aisak Beer-lahai-roi ho nvmcw dooknum.

¹²‍Soq tulu si Abraham gv ko tuup Ismaiyelg hotamv, hiyam Sarag Ijipt hoqg paqn Hagarg Abrahamnvn ko bwwjnum.

¹³‍Soq tulu si Ismaiyelg ko tuup tulug eminam xitw kwlwl xinam eminv: Nebaiot, Ismaiyelg tuup vbw cociq; hoo Kedar, Adbeel, Mibsam,

¹⁴‍Misma, Duma, Massa,

¹⁵‍Hadad, Tema, Jetur, Napis, hoo Kedema.

¹⁶‍Soq tulu si Ismaiyelg ko tuupv hoo bulug eminv, bulug nampam dook hoqg eminv hoo bulug doogw go gvda hoqg eminv hoo bulug nyob hoqgv lvpw atv camleq vnyi go eminum.

¹⁷(Ismaiyel vnyw 137 gob swwnum. Mwwg nyiilungam goqkumnv mwv svqriql hoo siknum.)

¹⁸‍Bulv Habila hoqgv Sur namgub nvmcw doonum, hoqhv Ijipt taqcgon daiyag Assiriyab lamta wkv. Mwv mwwg imiq dvpar hoqgv asaq loodab nvmcw doonum.

¹⁹‍Soq tulu si Abraham gv ko tuup Aisakwg hotamv: Abraham Aisakwg abv,

²⁰‍hoo Aisak vnyw campy gob axa yukho mwv Rebekanvn mwwg nywxwb naanum, Paddan-aram ho doonbo Aramean Betuel gv ko nyemv, Aramean Labanwg bwrmv.

²¹‍Hoo Aisak At Swn mwwg nywxw gab swgwnum, hoggab mwn twrngumnum. Hoo At Sw mwwg swgwnam mam loorwqnum, hoo mwwg nywxw Rebeka ko gvnum.

²²‍Ko vnyiv mwnwg kepo ho vs-axaq gob nyidu basnum, hoo mwn benum, “Soq si hvb nyid nyiloqkam, hoggab soq si ngam nyidwn?” Ho mwn wnv At Swn toxnum.

²³‍Hoo At Sw mwnwn benum, “Nyob nyiilu vnyi go noqg mamb hv doodwn, hoo noqg kepo ura hoqgv nyiilu jeqnyi go mvpin-mvra tayin; akwn hv akwn ham ator yaatayin, vbw akv boram bon nyijtayin.”

²⁴‍Hwdlo mwn ko bwwd aalv hvvnwq yukho, kaato mwnwg mamb ho kongv vnyi go doonum.

²⁵‍Otuq akv mwwg gvngv vm-rvsab lwwcw tvl lengnum, ho bulv mwam Esu hvl eminum.

²⁶‍Kokw so mwwg bor akv Esug ludam gvbw tvl lengnum, ho mwwg eminam Jakub hvl eminum. Hwdlo mwn bulam ko bwwi yikho Aisak vnyw camx gob nyiknum.

²⁷‍Hwdlo ko tulungv akam duku, Esu tumr-xiram palaq jaqnum, mwv nyoro nyiib nyinum, hvbmabde Jakub yanbo nyiib nyinum, hoo tombu uraho doodu keetwqnum.

²⁸‍Aisak Esunvn abynum hoggab mwwg tumr-xiram panam mam lwxiam mwv dvnum, hvbmabde Rebeka Jakubnvn abynum.

²⁹‍Lok Jakub vdin-oo xwwdu dvkho, Esu nyoro hoqgv haanum, hoo mwv vcjaqb kanol nyelinum.

³⁰‍Hoo Esu Jakubnvn benum, “Noqg vdin-oo xwwdu gvdwn hoqgv ngam meeg dvdwb jila bv, hoggab ngo vcjaqb kanol nyelin do!” (Hoqgab mwwg eminam Idom hvl eminum.)

³¹‍Jakub benum, “Nam ko bwwtaqnam gumnam ngam puqto?”

³²‍Esu benum, “Ngo siriq sv doodo; ngam ko bwwtaqnam gumnam hoggv mvn tayin?”

³³‍Jakub benum, “Sija no ngam puqtayin hvl dingr to.” Ho mwv dingr kunv hoo mwwg ko bwwtaqnam gumnam Jakubnvn puqnum.

³⁴‍Ho Jakub Esunvn wtw hoqla vdin-oongv jinum, hoo mwv dvpe-twwpe kul gorabl mwwg lamtab wknum. Soq sib Esu mwam ko bwwtaqnam gumnam puqknum.