Read Nyishi BEGGAR 26 Bible Online

BEGGAR 26 - Nyishi bible

BEGGAR 26

¹Abraham gv moodho dwr wnam mam apaqtvl, hoq gvdaho hvraqb dwr akta wnum. Hoo Aisak Palistanwg lvpw at Abimelek dook Gerarho wnum.

²‍Hoo At Sw mwam daqlin banv hoo benum, “Ijipt imabv; gvda doody koam ngo nam betam tayin.

³‍Soq doodu ko gvda so dooto, hoo ngo noqg lvgab dooba tayin hoo nam lvqc citayin, hoggab nam la noqg hosiqkam ngo soq gvda mwlw sam jitayin, hoo noqg ab Abrahamnvn ngoqg dingr kunam mam ngo nyitayin.

⁴‍Ngo noqg hosiqkam doa aog takar tvvb dumtwq-miilyw mvtayin hoo noqg hosiqkam so gvda mwlw sam jitayin. Hoo noqg hosiq hoqgv swcw soqg nyob mwlwngam lvqc citayin,

⁵‍hoggab Abraham ngoqg agam mam tanum hoo ngoqg nyitwk hvnam mam nyinum, ngoqg gamlam, ngoqg mwwnam mam, hoo ngoqg pvvbam pvvnum.”

⁶‍Ho Aisak Gerarho nvmcw doonum.

⁷‍Hwdlo hoq gvdaho doonbo nyi tulungv mwwg nywxwg pagoqkam toxyin, mwv benum, “Mwn ngoqg bwrmv,” hoggab, “Ngoqg nywxwngv hvdwb,” mwv bosnum, mwwgamv, “Lokam gvda hoqg nyiingv Rebeka pagoq gab mwam mengtwqto mwwnum, hoggab mwn vcjaqb kaaby dvb nyinum.

⁸‍Hwdlo mwam hoq gvdaho oyu go dooi kukam, Palistanwg lvpw at Abimelek pupum hoqgv kaacoql kaanamv Aisak mwwg nywxw Rebeka lvgab nyirl-sool doonam mam kaapanum.

⁹‍Ho Abimelek Aisaknvn goqanum hoo benum, “Kaato, mwn noqg nywxw go. Hoggub no bela dvn, ‘Mwn noqg bwrmv hvl’?” Aisak mwam benum, “Hoggab ngo mwwnum, ‘Mwnwg pagoq gab ngo sinw maanum.’”

¹⁰‍Abimelek benum, “No hoggab ngulam soq sib nyipa kun? Nyiilu hoq akwn hv noqg nywxw lvgab yubnam-yubcal yubnyiloqkam, no ngulug aoso gorgiam baqm tapa ku.”

¹¹‍Ho Abimelek nyiilu mwlwngam beo-belaml begamv, “Hiyv lajaqkam soq nyi sam la mwwg nywxw sam idaq boam hoggub nyijaqkam mengpaq tayin.”

¹²‍Hoo Aisak hoq gvdaho rongo mvnum hoo hoq vnyw ho naleqgo vly naanum. At Sw mwam lvqc cinum,

¹³‍hoo nyi ak hv nyet kunum, hoo vi-vi yaiya go nyet tvknv mwv vc loodab nyet tvpurnum.

¹⁴‍Mwv sviya pvtwngv hoo sibin-svvngv hoo naleqgo nyera-paqnv doog kunum, ho Palistan nyi tulungv mwam kaaneqnum.

¹⁵(Palistan nyi tulungv mwwg ab Abraham gv nyera tulug sokum hwwkoqnam tulungam hobtuml ked lvgab yoqtumnum.)

¹⁶‍Hoo Abimelek Aisaknvn benum, “Ngulug gvda soqg wtku, hoggab no ngulam ator yaadku.”

¹⁷‍Ho Aisak hoqgv wla yukul Gerarag lywpa ho svmcw mvl hoo nvmcw doonum.

¹⁸‍Hoo Aisak lokta mwwg ab Abraham gv moodho sokum dukoqnam tulungam dukoq kunum, hogloq ham Abraham gv sixo kokw so Palistan nyi tulungv mutum kunum. Hoo mwwg abwg emin mingnam hvb mwv hoq tulu ham eminum.

¹⁹‍Hvbmabde hwdlo Aisakwg nyera tulungv lywpa ho iss buqlin bo sokum mam dukoql dupa yin,

²⁰‍Gerarag sibin-svv kaanbo nyi tuluhv Aisakwg sibin-svv kaanbo nyi tulug lvgab yolu dul, begamv, “Iss si ngulgv.” Ho mwv hoqg sokum hoqg eminam Esek hvl eminum, hoggab bulv mwwg lvgab yolu dunum.

²¹‍Ho bulv asaq ak dukoqnum, hoo bulv hamkam hvraqb yolu dunum, ho mwv hoqham Sitna hvl eminum.

²²‍Hoo mwv hoqgv wggin layil sokum asaq ak dukoqnum, hoo bulv hoq aoho yolu duk maanum. Ho mwv hoqg eminam Rehobot hvl goqnum, “Hoggab sija At Sw ngul gab dook ak mwj paku, hoo ngulv gvda so mipar-gooiyiql swwta yukun.”

²³‍Hoqgv mwv Beersebab caanum.

²⁴‍Hoo At Sw mwam hoq ai daraho daqlinl hoo benum, “Ngo noqg ab Abraham gv Pwnbov. Bos maabv, hoggab ngo noqg lvgab dooba dvn hoo nam lvqc cityain hoo ngoqg nyera Abraham gv emin gab noqg hosiqkam dumtwq-miilyw mvtayin.”

²⁵‍Ho mwv hoqho yugw ak mvtwl hoo At Swg eminam goql xumnum hoo mwwg tombungam hoqho rwwnum. Hoo hoqho Aisakwg nyera tulungv sokum ak dukoqnum.

²⁶‍Hwdlo Abimelek Ahujjat mwam tomswrbo la mwwg sipai tulungam gaml jil yvgbo Pikol lvgab Gerar hoqgv mwwg dookub wikam,

²⁷‍Aisak bulam benum, “Hoggab nulv ngoqg dookub haai yin, nulv ngam oyuml nulug gvda hoqgv ngam roopaqnam cengma yv?”

²⁸‍Bulv benum, “Pwbw jaqb kaapa ku At Sw noqg lvgab dooba tuk banyi. Hoqgab ngulv benum, ngulug pengko so dingr minsnam loq ak mvtju, noqg gvla ngulug pengko so, hoo ngulv noqg lvgab pvvb birnam loq ak mwnw do,

²⁹‍ho no ngulam sig-dorg dvb mvma bvka, ngulv nam hog akkam idaq jimanum hoo nam hog akkam nyimur maanum hvbmabde nam swrso aljaqb wwm kunum. Hoqgab no sija At Swg lvqc cinam goknyi.”

³⁰‍Ho mwv bulam durum dvgnum, hoo bulv dvk-twwknum.

³¹‍Ar komc bulv gorab layil pvvb mwrwl dingko-dingpeq minsnum. Hoo Aisak bulam bulug lamtab wwm kunum, hoo bulv mwwg hoqgv swrsob wknum.

³²‍Hoq aal lookin ho Aisakwg nyera tulungv mwam haal betamnum bulug sokum dukoql iss kaapanam mam, “Ngulv issam kaapa paku.”

³³‍Mwv hoqham Siba hvl eminum; hoqgab soolo namgub bopam hoqg eminv Beerseba hvdwn.

³⁴‍Hwdlo Esu vnyw campy gob axa yukho, mwv Hittait nyi Beerig nyem ko Judit, nvla Hittait nyi Elon nyem ko Basematnvn mwwg nywxw naaknum,

³⁵‍hoo bulv henc-henya dvb Aisak la Rebekag swwnam mam mvnum.