Read Nyishi BEGGAR 28 Bible Online

BEGGAR 28 - Nyishi bible

BEGGAR 28

¹Ho Aisak Jakubnvn goqbnv hoo mwam lvqc citwl hoo mwam tomswrnum, “No hoggub nyijaqkam Kanaan nyem mam noqg nywxwb naama bvka.

²‍Gorabl noqg annwg ab Betuel nammwb Paddan-aram wno, hoo noqg annwg vbw Labanwg nyem ko akwn noqg nywxw naato.

³‍Mwlwngam ator yaanbo Pwnbov nam lvqc citayin hoo nam mipar-gooiyiql hoo nam dumtwq-miilyw mvtayin, ho no jaqt bo nyiilu gob nyitayin.

⁴‍Mwv Abrahamnvn lvqc cinbov namkam lvqc gvnka hoo noqg hotam mamkam lvqc gvnka, ho noqg doodu ko gvda ham Pwnbov Abrahamnvn jinum, ham no gumn doog gvnka!”

⁵‍Ho Aisak Jakubnvn wwm kunum. Hoo mwv Paddan-aram, Betuel ko tuup Laban, Aramean, Jakub la Esug ann, Rebekag vbw dookub wnum.

⁶‍Aisak Jakubnvn lvqc tvl mwam Paddan-aram wl nywxw ak naam dvb mwam lvqc cil mwv tomswrl soq sib bilwqnum, “No hoggub nyijaqkam Kanaan nyi tulu hoqgv nyem naama jijaqbv,” hvl betwl kanam nvmlwqnam mam Esu kaapanum,

⁷‍hoo Jakub mwwg ab gvla annwg benam mam tanv Paddan-aram wknum.

⁸‍Ho Kanaan nyem tulungv mwwg ab Aisaknvn loomanam mam Esu kaapa tvl,

⁹‍Esu Ismaiyel dookub wnum, hoo mwwg nywxw tulug lvvgho mwv Ismaiyelg nyem ko Mahalat, Abraham gv ko hosiqkv, Nebaiot bwrm mam mwv nywxw akgob naaknum.

¹⁰‍Jakub Beerseba lengk nv hoo Haran daiyab wnum.

¹¹‍Hoo doonyiv haai kukam, mwv nyook golo hvvc kunv hoq aiho ho yubnum. Nyook hoqg wlw pwg naarabnv mwwg dumpo uraho mwv twlwqtvl hoq nyookho yubdwb karranum.

¹²‍Hoo mwv yuma maanum, kaato, sobia ak swcw soqgv biaca tvl doonum hoo hoqg niqtuqkv ao gvdangam bvvcnum. Hoo kaato, Pwnbog gumtw tulungv hoq aoho cao gvi hoo ipoq gvi nyil doonum!

¹³‍Hoo kaato, hoq aoho At Sw daqtwl hoo benum, “Ngo At Sw, noqg ab Abraham gv Pwnbov hoo Aisak Pwnbov. Noqg yubk gvda sam nam la noqg hosiqkam ngo jitayin.

¹⁴‍Noqg hosiqkv swcwg diimwr hvbjaq nyitayin, hoo dou-caga bvkam ho haaga bvkam hoo nyoodum bvkam ho nyooko bvkam noqg nyookv lywtayin, hoo noqg hoola hoo noqg hosiqho swcw soqg imiq dvpar mwlwngam lvqc citayin.

¹⁵‍Kaato, nam ngo dooba dvn hoo noqg wk mwlwho ngo svka tayin, hoo nam ngo lokta soq gvda so bookur tayin. Hoggab ngo nam hoggv dingrnam ham nyima deedib ngo nam wleqram.”

¹⁶‍Ho Jakub yubpel huurab kunv hoo benum, “Jvqtw jaqb At Sw soq nyook si doodo, hvbmab ngo ham cengmanum.”

¹⁷‍Hoo mwv boskunv hoo benum, “Hwdjaqgo soq nyook si bosnam go! Soq si hiyv gvkam namlo ma hvbmabde Pwnbog namlo go, hoo soq si ao gvdag toggoq go.”

¹⁸‍Ho Jakub ar komc gorab layil mwwg dumpo uraho wlw dumtamnam mam naarab kunv swwrwb diidaq tvl hoq aoho kutiam toopupnum.

¹⁹‍Mwv hoq nyook hoqg eminam Betel hvl goqnum, hvbmabde bopam hoqg otuqg eminv Luj hvl goqnum.

²⁰‍Ho Jakub dingrwl begamv, “Pwnbov dooba baloqkam hoo ngoqg lamta wnam sam ngam svka baloqkam, hoo dvsam la vjam koosam ngam jibnyiloqkam,

²¹‍ngo lokta ngoqg abwg nammwb swrsob hookur taikun, ho At Sw ngoqg Pwnbob nyitayin,

²²‍hoo soq wlw sam ngo soq swwrwb diipnam so Pwnbog dvrwq namlob nyitayin. Hoo noqg ngam hog mwlwngam jinam hoqgv ngo nam jibwq sanam mam bwwr dvb jitayin.”