Read Nyishi BEGGAR 29 Bible Online

BEGGAR 29 - Nyishi bible

BEGGAR 29

¹Ho Jakub mwwg nyiodam booknv dou-cagag nyiilug gvdaho haanum.

²‍Ho mwv kaanv, mwv gvda kaanv sokum ak rongo ak golo kaapanum, hoo kaato, hoq bviywrho sviya pvtw twum go gel karnum, hoggab sviya pvtwngam hoq iss hoqgv twwmnum. Sokum hoqgv wlw tutumnanv pwt jaqnum,

³‍hoo hwdlo sviya pvtw mwlwngam hoqho rookum yin, sviya rvkybo tulungv sokum ung hoqg wlwngam ngurgin tvl sviya tulungam hingky jaqb iss twwmnum, hoo sokum mam lokta wlwngv ngurtuml apnum.

⁴‍Jakub bulam benum, “Ngoqg vbw-bor tulu nulv hogloqkv haai yin?” Bulv benum, “Ngulv Haran aloqkv.”

⁵‍Mwv bulam benum, “Nulv Nahor ko tuup Labannvn cengd nvi yv?” Bulv benum, “Ngulv mwam cengdwn.”

⁶‍Mwv bulam benum, “Mwv alwb doos dvi yv?” Bulv benum, “Mwv alwb doos do; hoo kaato, mwwg nyem ko Rakel sviya lvgab hoodu do!”

⁷‍Mwv benum, “Kaato, sija aal lvpa xiqdo; sija sibin-svvngam lvkin gob rookum dv mood maata. Sviyangam iss twwm peel hoo bulam wgdvl nwmw dvmto.”

⁸‍Hvbmabde bulv benum, “Ngulv sibin-svv mwlwngam lvkin gob rookum xiqtwl hoo sokum wlwngam ngurkoq tvl; ho ngulv sviya tulungam iss jidwn.”

⁹‍Mwv hvb bulam agam doodu yukho, Rakel mwnwg abwg sviya tulu lvgab haanum, hoggab mwn sviya rvky bo nyemwb nyinum.

¹⁰‍Jakub mwwg annwg vbw Laban nyem Rakelnvn la mwwg annwg vbw Labanwg sviya tulungam kaapa kalam twqda, Jakub sokum gamb ogumb hvvnwq banv wlwngam ngurgin jinum hoo mwwg annwg vbw Labanwg sibin-svv tulungam iss jinum.

¹¹‍Ho Jakub Rakelnvn moopup nv hoo vcjaqb xabnum.

¹²‍Hoo Jakub Rakelnvn mwv mwnwg abwg imiq nyiingv hvl betamnum, hoo mwv Rebekag kongv hvl betamnum, hoo mwn xarbnv mwnwg abam betamnum.

¹³‍Laban mwwg bwrm ko Jakubg puiyam tapa kalam twqda, mwv xarbnv mwam kvvrwqnum hoo mwam cegabl hoo moopupnum hoo mwam mwwg nammwb boanum. Jakub Labannvn hog mwlwngam betam kunum,

¹⁴‍hoo Laban mwam benum, “Jvqtw jaqb no ngoqg soodin soqgv lengn bov!” Hoo mwv pool bargwb mwam doomin gvnum.

¹⁵‍Ho Laban Jakubnvn benum, “No ngoqg imiq nyi sujaqkam no nyijo naamab ngam bon nyij tan yv? Ngam betamto, hoggv no nyijo naatayin?”

¹⁶‍Laban nyem ko vnyi go doonum. Any hoqg eminv Liya, hoo bwrm hoqg eminv Rakel.

¹⁷‍Liyag vnyiqkv kangamnum, hvbmabde Rakel gv dorpwngv kangam altvl koojubnum.

¹⁸‍Jakub Rakelnvn abynum. Hoo mwv benum, “No ngam noqg nyem ko anyo bo Rakelnvn nyem jibnyiloqkam, ngo nam vnyw kvn gob bon nyij tayin.”

¹⁹‍Laban benum, “Nyi asaqkam mwnwn jimmam lingsam nam jinamv vcjaqb alyado; ngoqg lvgab dooto.”

²⁰‍Hoggab Jakub Rakel gab vnyw kvn go bon nyijnum, hoo mwv mwnwn aby ko-gab hoqg vnyw tuluhv mwwg gab anyo ko mood gob nyinum.

²¹‍Ho Jakub Labannvn benum, “Ngoqg nywxwngam ngam jitkubv ngo mwnwg lvgab dooba yidkun, hoggab ngoqg moodv wiyum paku.”

²²‍Ho Laban nyiilu mwlwngam lvkin gob goqkum goqpa banv durum dvgnum.

²³‍Hvbmabde ariyum yukho mwv mwwg nyem ko Liyanvn Jakub dookub boa jinum, hoo mwv mwnwn doog kunum.

²⁴(Laban mwwg paqn Jilpanvn mwwg ko Liyag paqn gob jinum.)

²⁵‍Hoo arho kaaknamv, hoqhv Liya kunyi! Hoo Jakub Labannvn benum, “No ngam si hoggv nyipa kun? Ngo Rakel gab nam ngo bon nyij maan mvi yv? Hoggab no ngam mvvpaq pakun?”

²⁶‍Laban benum, “Ngulug gvda so anyam nyem jima taab bwrm mam nyem jima dvn.

²⁷‍Hapta akwb wnya mvtwl ngulv nam akwn hamrub jitayin, hoggab no ngam hvraqb vnyw kvn gota bon nyij dvb nyitayin.”

²⁸‍Jakub hoqhvb nyinum, hoo hapta ak wiyum yukam ho Laban mwam mwwg nyem ko Rakelnvn mwwg nywxwb jiknum.

²⁹(Laban mwwg paqn Bilhanvn mwwg nyem ko Rakelg paqn gob jinum.)

³⁰‍Ho Jakub Rakelnvn doog kunum, hoo mwv Liyanvn koiyab Rakelnvn abynum, hoo Labannvn vnyw kvn gota bon nyijnum.

³¹‍Hwdlo Liyanvn oyumnam mam At Sw kaapa tvl, mwv mwnwg mambam mvkonum, hvbmabde Rakelnvn twrngum mvnum.

³²‍Hoo Liya ko gvknv hoo nyega ko ak bwwnum, hoo mwn mwwg eminam Reuben hvl goqnum, hoggab mwn benum, “At Sw ngoqg hentwr henam mam kaapa paku; hoggab sija ngoqg nyolv ngam aby yuk nvpv.”

³³‍Mwn lokta ko gvnv hoo nyega ko bwwnum, hoo benum, “At Sw ngam oyumnam mam tapa paku, hoggab mwv ngam soq ko samkam jipa ku.” Hoo mwn mwwg eminam Simeon hvl goqnum.

³⁴‍Lokta mwn ko gvnv hoo nyega ak bwwnum, hoo benum, “Soq mood soqgv ngoqg nyolv ngam lvkin gob doog yuk nvpv, hoggab ngo mwam ko tuup oum go bwwj pakun.” Hoqgab mwwg eminam Lebi hvl goqnum.

³⁵‍Hoo mwn lokta ko gvnv hoo nyega ko ak bwwnum, hoo benum, “Soq mood so ngo At Swn paqtayin.” Hoqgab mwn mwwg eminam Juda hvl goqnum. Ho mwn ko bwwgo tvl doonum.