Read Nyishi BEGGAR 3 Bible Online

BEGGAR 3 - Nyishi bible

BEGGAR 3

¹Pwnbo At Sw pwnum pengko hoqgv tvb si mwlwg nyoro svdinam sur rubin yaanum. Mwv nyem mam benum, “Nulam boolug svvn gotwq bolo aaxiam dvma bvk hvl, ‘Pwnbov agam goon mviyv’?”

²‍Hoo nyemhv tvbam benum, “Ngulv boolug svvn aaxiam dvla tayin,

³‍hvbmabde Pwnbov benum, ‘Nulv boolug lvpa raag svvnwg aaxiam dvmabv, hoqham idaq kamabv, hvb nyibaloqkam nulv sitayin.’”

⁴‍Hvbmabde tvb hv nyem mam benum, “Nulv hoggub nyijaqkam siram.

⁵‍Hoggab Pwnbov cengdo hwdlo nulv ham dvbnyiloqkam nulug vnyiqkv kaalaq tayin, hoo nulv Pwnbo hvb nyitayin, ho alboam la almanam cengtayin.”

⁶‍Ho hwdlo svvn ham dvs albo gob nyemhv kaaikam, hoo hoqham mwnwg vnyiqkv kaaby kunum, hoo mwn cenglaq nwnw layil svvn aaxiam dwnwnum, mwn hoqg aaxiam naal hoo dvknum, hoo hiyv mwnwg lvgab doobanum mwnwg nyolam mwnwg aaxy tuugin jiknum hoo mwv dvknum.

⁷‍Ho vnyi-vnyig vnyiqkv kaalaq kunum, hoo bulv talo paku hvl bulv cengknum. Hoo bulv taoq okam lvkin gob hvmsiq tvl bul atgab ako eb koodwb mvnum.

⁸‍Hoo swkwr moodho Pwnbo At Sw boolu ho wl yvnam yalam bulv tapanum, hoo nyegangv la mwwg nywxwngv bulv atv atam boolug svvn tulug pengko ho Pwnbo At Swg kaaga hoqgv kvsil yvnum.

⁹‍Hvbmabde Pwnbo At Sw Adamnvn goql mwam benum, “No hogloq ho doodwn?”

¹⁰‍Hoo mwv benum, “Ngo boolu uraho noqg yalam tapanum, hoo ngo bosnum, hoggab ngo talonum, hoo ngo atv atam kvsnum.”

¹¹‍Mwv benum, “No talo dvk hvl hiyv nam betamnum? Ngoqg nam dvma bvk hvl gaml jinum svvn aaxiam no dvt kun i?”

¹²‍Nyegangv benum, “Ngoqg lvgab doomin gvm dvb noqg ngam jinum nyem akhv, mwn ngam svvn aaxiam jinum, hoo ngo dvtkun.”

¹³‍Ho Pwnbo At Sw nyem mam benum, “Hoggub no soq sib nyitkun?” Nyemhv benum, “Tvbv ngam sup tukul, hoo ngo dvtkun.”

¹⁴‍Pwnbo At Sw tvbam benum, “No soq sib nyigam gab, tuun-mee mwlwg pengko hoqgv hoo nyorog svdin mwlwg pengko hoqgv noqg aoho beenamv doon ka; noqg kepo lvgab no xwwl wtayin, hoo noqg swwnam bumpw ho diimwram no dvtayin.

¹⁵Ngo noqg gvla nyemwg pengko ho hoo noqg hosiq gvla mwnwg hosiq pengko ho ceebiongam vlwq tayin; mwv noqg dumpongam caajab tayin, hoo no mwwg lvpia ludam cetayin.”

¹⁶‍Ho mwv nyem ham benum, “Jvqtw jaqb noqg ko bwwta taiyam ngo cinc cim tayin; no cinc cil kongam bwwlin tayin. Noqg mwwbynamv noqg nyol gab dootayin, hoo mwv noqg aoho pvvb bwwl doog tayin.”

¹⁷Hoo mwv Adamnvn benum, “Noqg nywxw benam mam tagam gab hoo svvn aaxiam dvgam gab hogloq ham no dvma bvk hvl ‘Ngo nam gaml jinum ham no nyipa ku,’ hoqgab gvdangam noqg nyigo gab beeg yukun; noqg swwnam bumpw ho no hentwrb nyil dvsam dvtayin;

¹⁸nwmwngam la taa-ngam noqgab swwlin mvtayin; hoo no nyorog nwmw-nwsinam dvtayin.

¹⁹No kedib hookur namgub noqg tuqt hoqgv haaxor lengl no dvsam dvtayin, hoggab ked hoqgv nam naalinl pwnum; hoggab no diimwrv, hoo no diimwrb nyikur taikun.”

²⁰‍Nyega akv mwwg nywxw eminam Ib hvl goqknum, hoggab mwn mwlwg swwnbo hoqg ann gob nyiknum.

²¹‍Hoo Pwnbo At Sw Adam gab la mwwg nywxw gab svdin tulug vpin hoqgv vj mvtwl hoo bulam koomnum.

²²‍Ho Pwnbo At Sw benum, “Kaato, nyia kov ngulug hvb alboam la almanam cengpaku. Sija, mwv lokam mwwg alaqkv ilin banv swwg svvn aaxiam pul dvtwl, hoo nwrba xaqb swwl dookam twqto—”

²³‍hoqgab Pwnbo At Sw mwam Iden boolu hoqgv mwam naalin ko kedam rongo nyil dvm dukub lvvgwb roolin kunum.

²⁴‍Mwv nyia koam ruqlin tukul, Iden boolug dou-caga ho mwv cerubim mam ap kunum hoo wm moily bioql doonbo lyoqr orioqkam swwl doonbo svvnam taqg-loosaqb bioqyiql rvky mvdwb apnum.