Read Nyishi BEGGAR 30 Bible Online

BEGGAR 30 - Nyishi bible

BEGGAR 30

¹Hwdlo Rakel Jakubnvn ko dooj maaikam, mwn mwnwg anyam kaaneqnum. Mwn Jakubnvn benum, “Ngam ko doom tvb, hvbmab nyiloqkam ngo sitayin!”

²‍Jakub Rakelg aoho vcjaqb hang lengnum, hoo mwv benum, “Ngo Pwnbov yv, hiyv nam ko bwwm mvmab parl apnum?”

³‍Ho mwn benum, “Si ngoqg paqn Bilha; mwnwn doogto, ho mwn ngoqg ko bwwdwb ko bwwtayin, ho mwnwg hoqgv ngoqgab ko tulungam doom tayin.”

⁴‍Ho mwn mwam mwnwg paqn Bilhanvn nywxwb boomnum, hoo Jakub mwnwn doognum.

⁵‍Hoo Bilha ko gvknv hoo Jakubnvn nyega ko ak bwwjnum.

⁶‍Ho Rakel benum, “Pwnbov ngam hvvky swwpa ku, hoo ngoqg yalamkam tapa paku hoo ngam nyega ko ak jipa ku.” Hoqgab mwn hoqg eminam Dan hvl goqnum.

⁷‍Rakelg paqn Bilha lokta ko gvnv hoo Jakubnvn nyega ko vnyi dvb bwwjnum.

⁸‍Ho Rakel benum, “Ngoqg any lvgab ngo vc loodab mviyaq minsnum hoo mwnwn mviya kunum.” Ho mwn hoqg eminam Naptali hvl goqnum.

⁹‍Hwdlo Liya mwnwg ko bwwgo tvl doonam mam cengpa tvl, mwn mwnwg paqn Jilpanvn Jakubnvn nywxw boomnum.

¹⁰‍Ho Liyag paqn Jilpa nyega ko ak bwwnum.

¹¹‍Hoo Liya benum, “Nvtaqnamv haapa ku!” Ho mwn mwwg eminam Gad hvl goqnum.

¹²‍Liyag paqn Jilpa nyega ko vnyi dvb Jakubnvn bwwjnum.

¹³‍Hoo Liya benum, “Ngo vijaqg hemp dvn! Hoggab nyem tulungv ngam hemp bov hvl goqdwn.” Ho mwn mwwg eminam Aser hvl goqnum.

¹⁴‍Wtw am vly nvvd moodho Reuben rongob wnv mandrak svvn ata kaapanum hoo ham mwwg ann Liyanvn bwa jinum. Ho Rakel Liyanvn benum, “Anya mwwpa gvdwl noqg ko mandrak bwanam hoqgv ngam meeg jitwb.”

¹⁵‍Hvbmabde mwn mwnwn benum, “No ngoqg nyolam naareqnam si anyo bo bvrwqkv i? Ngoqg ko mandrak svvn tulungam kam naareq i?” Rakel benum, “Hvnyiloqkam noqg ko tuupwg mandrak kwly gab mwam soi no yubg ta.”

¹⁶‍Hwdlo Jakub ariyum rongo hoqgv hoodu yukho, Liya mwam wrwq banv benum, “No hoggub nyijaqkam ngoqg lvgab haato, hoggab nam ngo soi yubg dvb ngoqg koog mandrakam cwwrwq peekun.” Ho mwv mwnwg lvgab hoq aiho yumin gvnum.

¹⁷‍Hoo Pwnbov Liyanvn tapanum, hoo mwn ko gvnum hoo Jakubnvn ko tuup ang dvb bwwjnum.

¹⁸‍Liya benum, “Pwnbov ngoqg nyijongam jipa ku hoggab ngo ngoqg paqnam ngoqg nyolam jinum.” Ho mwn mwwg eminam Issakar hvl goqnum.

¹⁹‍Hoo Liya lokta ko gvnum, hoo Jakubnvn ko tuup ax dvb bwwjnum.

²⁰‍Ho Liya benum, “Pwnbov ngam albo akiam jil paku; sija ngoqg nyolv ngam xitayin, hoggab ngo mwam ax dvb ko nyega bwwj pakun.” Ho mwn mwwg eminam Jebulun hvl goqnum.

²¹‍Kokw so mwn nyem ko ak bwwnum hoo ham Dina hvl emin goqnum.

²²‍Ho Pwnbov Rakelnvn mwwpanum, hoo mwnwn Pwnbov tapanum hoo mwnwg mambam mvkonum.

²³‍Mwn ko gvnum hoo nyega ko ak bwwnum hoo benum, “Pwnbov ngoqg hvnyw-haram naapaq paku.”

²⁴‍Hoo mwn mwwg eminam Josap hvl goqnum, hoo begamv, At Sw ngam nyega ko loq akta vbw tvbka!”

²⁵‍Rakel Josapnvn ko bwwda kalam, Jakub Labannvn benum, “Ngam kanam tukub, ngo ngoqg atwg nam bvla gvdab wta yukun.

²⁶‍Ngoqg nywxwngam la ngoqg ko tulungam ngam jitkubv hoggab no cengdo, nam ngo bon nyij tukun, ho ngo wdwb nyipa ku.”

²⁷‍Hvbmabde Laban mwam benum, “Ngo noqg vnyiq kvvlwq kob mwwsw dvb nyipa nyiloqkam, ngo nyioky kil kaakanamv, noqg doogam gab At Sw ngam lvqc cipa ku.

²⁸‍Noqg nyijongam beka tvna, hoo ham ngo jitayin.”

²⁹‍Jakub mwam benum, “Ngoqg nam bon nyijnam mam no atv cengdo, hoo ngoqg doogam gab noqg tuun-meengv naleqgo swwnum.

³⁰‍Ngoqg haama taab, no atv cengdo noqg lvgab anyo go doonum, hoo hoqhv sija naleqgo swwpa ku, hoo ngo hoggv xeq nyiknum At Sw nam lvqc cipa kun. Hvbmabde sija ngo hwdlo atwg imiq dvpar gab bon nyita yuku?”

³¹‍Mwv benum, “Hoggv ngo nam jitayin?” Jakub benum, “No ngam hog gojaqkam jimabv. No ngam soq sam ngoqgab nyib nyiloqkam, ngo hvraqb noqg sibin-svvngam kaal hoo pvvya jitayin:

³²‍ngam soolo noqg sibin bintw gvla sviya pvtw dookub wpeq mvtbv, ho sviya potaq-pomaq boam, kaaya boam hoo sibin potaq-pomaq boam vpwb rooxub, mvdwb jitbv, hoo hoq tuluhv ngoqg bon nyijo gob nyitayin.

³³‍Ho hwdlo noqg hoqgv ngoqg nyijonam mam no haal kaaikukam, ngoqg jvqtwnamv ngam kokwngam betam tayin. Sibin dorxy cwrwg pengko ho potaq-pomaq maanbo hoo sviya pengko ho kaaya maanbo ngoqg lvgab kaapa kubnyiloqkam, hoq tulu ham dvco namgob xiya ku.”

³⁴‍Laban benum, “Hv alpa! No hoggub bepakun hvb nyimto.”

³⁵‍Hvbmabde hoq aalho Laban sibin bimp yaboq-yasoq boam la potaq-pomaq boam, hoo sibin bin potaq-pomaqbo dorx cwram xulinum, hoo sviya ko kaiya doon boam kam nooxorl naapaq tvl, hoo hoq tulu ham mwwg ko tuup tulungam kaal yvg mvdwb jinum.

³⁶‍Hoo mwv atv Jakubg hoqgv aal loum wdwb aado golo wgginum hoo Jakub hoqg xuqro tulu Labanwg sviya sibin tulu ham rvkil yvgnum.

³⁷‍Ho Jakub nitbo poplar la almond hoo cinyium svvn beqnyiangam naanum, hoo beqnyiangam poory-pooga dvb vpinam diipaqnum, ho beqnyiag poory-poogal puulunam mam kaapanum.

³⁸‍Mwv beqnyia poory-pooga bo tulu ham sviya-sibin tulug dokam iss twwkumko nyook ho tvl apnum. Hoo bulv iss twwtab haaikam bulv meemin sudwn,

³⁹‍sviya-sibin tulungv beqnyia agaho meemin sunum hoo sviya-sibin tulungv poory-pooga bo hoo potaq-pomaq bov ko bwwlinum.

⁴⁰‍Hoo Jakub sviyangam vpwb nvvbwqnum hoo poory-pooga bo dook daiyab roobwqnum hoo Laban gv kaiya bo rooxongv doonum. Mwv mwwg atgam vpwb roobwqnum hoo Labanwg sviya pvtw lvgab yvm mvmanum.

⁴¹‍Hwdlo lajaqkam ator yaanbo hv meeta yukam ho bulug pengko hoqhv poory-poogal potaq-pomaq boam ko bwwm dvb, Jakub beqnyiangam sviya-sibin tulug vnyiqkv kaal iss twwta ko nyookho apnum,

⁴²‍hvbmabde dornyo laanyi maanbo sviya-sibin agaho mwv ap maanum. Ho dornyo laanyi maanbo hv Laban gv, hoo ator dortbo hv Jakub gv.

⁴³‍Hoqhvb nyiknv nyi akv vc loodab swwknum hoo naleqgo dortbo sviya-sibinv, nyem paqnv hoo nyerangv, hoo svjinv hoo svdamv doonum.