Read Nyishi BEGGAR 31 Bible Online

BEGGAR 31 - Nyishi bible

BEGGAR 31

¹Sija Jakub Labanwg ko tuup tulug benam mam tapanum, begamv, “Jakub ngulug abwg hog mwlwngam naapa ku, hoo ngulug abwg hoqgv mwv soq hog mwlwngam naalayil nyet swwpa ku.”

²‍Hoo Laban mwam otuqg mwwswnam hvb xik-paqk maanum, Jakub kaapa kunum.

³‍Ho At Sw Jakubnvn benum, “Noqg ab gvla noqg imiq nyi tulug dookub wkur tuku, hoo ngo nam dooba tayin.”

⁴‍Ho Jakub nyi kanam tvl Rakel nvla Liyanvn mwwg sviya kaal yvk nyoro ho goqa mvnum

⁵‍hoo bulam benum, “Ngo kaapa do nulug ab ngam otuqho hoggub mwwswnum hvb sija xik-paqk ma. Hvbmabde ngoqg abwg Pwnbov ngam doobanum.

⁶‍Nulug abam ngoqg ator torl bon nyijkunam mam nulv cengdo,

⁷‍hvbsujaqkam nulug abv ngam vm mvvpa ku hoo lwwyw go ngoqg nyijongam kwly likub-lexeqnum. Hvbmabde Pwnbov ngam un-tar mvg mvdwb mwam ator jima.

⁸‍Mwv hvl benum, ‘Potaq-pomaq bov noqg nyijob nyitayin,’ ho sviya pvtw mwlwngv potaq-pomaqbo ko bwwnum; hoo mwv hvl benum, ‘Yaboq-yasoq bov noqg nyijob nyitayin,’ ho sviya pvtw mwlwngv yaboq-yasoqbo ko bwwnum.

⁹‍Hoqgab Pwnbov noqg abwg sviya pvtwngam naapaq paku hoo bulam ngam jipa ku.

¹⁰‍Sviya-sibin tulungv meemin suiyik moodho ngoqg vnyiqkam ngo piorabnum hoo yuma ak maal kaanum sibin meemin sunbo tuluhv yaboq-yasoq, potaq-pomaql hoo poory-pooganum.

¹¹‍Ho Pwnbog gumtwngv ngam yuma ho benum, ‘Jakub hvl goqnum,’ hoo ngo benum, ‘Ngo si doodwn!’

¹²‍Hoo mwv benum, “Noqg vnyiqkv piorab gvdwl hoo kaato, sviya pvtwngam meenbo sibin mwlwhv yaboq-yasoq dvn, potaq-pomaq dvn hoo poory-pooga dvn, hoggab nam Labanwg hog mwlw nyidunam mam ngo kaapa paku.

¹³‍Ngo Betelwg Pwnbov, hogloq ho no wlw swwrw ak diil pwr jil hoo ngam dingrnum. Sija gorabto, soq gvda soqgv leng dukul hoo noqg imiq nyi tulug dook gvdab wkur tuku.’”

¹⁴‍Ho Rakel la Liya bunyiv birwql hoo mwam benum, “Ngulug abwg nam alo ngulv hog otu maalo gumn naas go doon nvi yv?

¹⁵‍Mwv ngulam nyoodo nyi gob bek-nyik maan mvi yv? Hoggab mwv ngulam puqpaq paku, hoo mwv jvqtw jaqb ngulug twngkam dvxin paku.

¹⁶‍Pwnbov ngulug ab hoqgv hog mwlw gumn naapaq kunamhv ngul gvku hoo ngulug ko tulungv. Ho sija, Pwnbov hoggv xeq nam bepa kun, ham nyito.”

¹⁷‍Ho Jakub gorab kunv mwwg ko tuup tulungam hoo mwwg nywxw tulungam svjin tulug aoho doom kunum.

¹⁸‍Mwv mwwg tuun-mee mwlwngam rool wgnum, ho mwv hoq nyookho door-wj naaknam mam hoo mwwg gumn-ranam, ho Paddan-aramho mwwg tuun-meengam gumn soknam mwlwngam baqla yukul mwwg ab Aisak dook Kanaan gvdab wdwb nyiknum.

¹⁹‍Laban mwwg sviya vm reqtab wro yukho, hoo Rakel mwnwg abwg nam hoqg xumnam murty tulungam dvconum.

²⁰‍Hoo Jakub Aramean Labannvn mwwg keleq tanam mam betam maab mwv vm mvvpaqnum.

²¹‍Mwwg hog mwlw doog kunam mam mwv baqla yukul wknv Iupratas pobungam rabknum, hoo mwv Gilead diisw nyook daiyab wdul dooknum.

²²‍Hwdlo aal loum yikho Labannvn Jakub kenkubak hvl betamnum,

²³‍mwwg nyi tulungam mwwg lvgab naalayil hoo aal kvn gob mwam mwv ruqmin gvnum hoo mwam Gilead diisw gvdaho ruqtin taknum.

²⁴‍Hvbmabde Pwnbov Aramean Labannvn ai yumaho mwam benum, “Mwwgabto Jakubnvn al ge ho kor ge hog akkam agam goomabv.”

²⁵‍Hoo Laban Jakubnvn ruqtin kunum. Jakub diisw gvdaho mwwg tombungam rwwtwl doonum, hoo Laban la mwwg nyi tulungv Gilead diisw gvdaho bulv kam bulug tombungam rwwtwl doonum.

²⁶‍Hoo Laban Jakubnvn benum, “Hoggv no ngam nyipa kun, no ngam vm mvvpaq peel hoo ngoqg nyem ko tulungam nyob palayil nyumwb boonam hvb bool wg pakun?

²⁷‍Hoggub no kvsil ngam vm mvvpaq peel, ngam betam maab keleqnam, no ngam betam nyiloqkam ngo nam dumdum-taal hoo rwwxw-gungga mvl bemin lvgab kanaml wm banpv

²⁸‍Hoo hoggub no ngam ngoqg ko tuup tulungam moopupl hoo ngoqg nyem ko tulungam alwb wnku hvl bilwq mvmanum? No paca loodab nyipa ku.

²⁹‍Nam ngo hog bvkam mvla dvb atorv doodwn. Hvbmabde noqg abwg Pwnbov ngam soi yumaho begamv, ‘Mwwgabto Jakubnvn al ge ho kor ge hog akkam agam goomabv hvnum.’

³⁰‍Hoo noqg abwg nammam vigo mwung ko-gab no wpa ku-wpa ku, hvbmabde no hog nyitwl ngoqg nammwg xumnam murty tulungam dvconum?”

³¹‍Jakub Labannvn birwqnum, “Ho ngo mwwgamv no noqg nyem ko tulungam ngoqg hoqgv xutinl naareq tai mwwnum, hoggab ngo bosnum.

³²‍Noqg xumnam murtiv hiyv lvgab dootayin hv swwl dooram. Noqg nyi tulug kaagaho ngoqg doognam soqgv, noqgv dood nyiloqkam ham naalin to.” Rakel hoq pwnbo tulu ham dvcol wgnam mam Jakub cengmanum.

³³‍Ho Laban Jakubg tombu urab haanum hoo Liyag tombu urab haanum hoo paqn vnyig tombu urab haanum, hvbmabde mwv bulam kaapa maanum. Hoo mwv Liyag tombu hoqgv lenglayil hoo Rakelg tombu urab haanum.

³⁴‍Rakel nammwg xumnam murty tulungam naanum hoo hoq tulu ham svjinwg dootamnan uraho aptvl dootamnum. Laban tombungam miiyiq-meexeqnum, hvbmabde bulam meepa maanum.

³⁵‍Hoo mwn mwnwg abam benum, “Ngoqg ata no haaxaq maabv ngo noqg agaho daqrab nyoma, ngo namc doodu dvn.” Ho mwv meegaqnum hvbmabde nam xumnam murty tulungam meepa maanum.

³⁶‍Ho Jakub Labannvn hang lengnum. Jakub Labannvn benum, “Hoggv ngo nyixiaq pa? Hoggv ngo nyic nyitwl, no ngam dwq-dwq jaqb ruqmin gvnum?

³⁷‍No ngoqg hog mwlw doognam mam meeg nukba; hoggv noqg nam hog dupum-dvrab go no kaapa pa? Hoq tulu ham noqg nyi tulu gvla ngoqg nyi tulug aga so naalinto, ho bulv ngunyig pengko so pvvb mwbwq tayin.

³⁸‍Vnyw camnyi go ngo noqg lvgab doonum. Noqg sviyangam la noqg sibin bin tulungv dorkin gokam jaqpaq maanum, hoo noqg yaap tvmwr tulungam ngo dorg kam dvka maanum.

³⁹‍Hoggv dwr-peengv dvnum ham ngo noqg dookub baqa maanum. Hoq tulu kwlib ngo nam jinum. Hoggab ngoqg alaq so doon boam, aalam jaqkam ho aiyam jaqkam dvco kunam mam no pw-hwwl kwly naanum.

⁴⁰‍Aalam oggv xaanyiaq dvb hoo aiyam swkwrv cwwnyiaq dvb, hoo ngoqg yuma karmab doonum.

⁴¹‍Ho vnyw camnyi gob ngo noqg namho doonum. Noqg nyem ko vnyi gab ngo vnyw camleq nywpy gob nam bon nyijnum, hoo vnyw nywx go noqg tuun-meengam kaanum, hoo no ngoqg nyijongam lwwyw go kwly likub-lexeqnum.

⁴²‍Ngoqg abwg Pwnbov, Abraham gv Pwnbov hoo Aisaknvn bosnam ngoqg lvgab dooma nyiloqkam jvqtw jaqb soq mood so no ngam alaq asarb kanaml wpaq mvpkun pv. Pwnbov ngoqg hentwr henam mam hoo ngoqg alaqg bon nyinam mam kaapanum hoo soi nam yolu ruqnum.”

⁴³‍Ho Laban Jakubnvn birwqnum, “Nyem ko tulu si ngoqg nyem kov su, ko hury tulu si ngoqg ko huriv su, tuun-mee tulu si ngoqg gv su, hoo noqg kaanam hog mwlw si ngoqg gv su. Hvbmabde soolo ngoqg nyem ko tulu sam ho bulug ko bwwnam ko huriam ngo hoggv mvtayin?

⁴⁴‍Kujo sija haato, ngulv pvvb birnam ak no la ngo mvbam tuj. Hoqham noqg la ngoqg pengko so hvvky akwb doomto.”

⁴⁵‍Ho Jakub wlw pwg naalayil hoo ham swwrw akwb diidaqnum.

⁴⁶‍Hoo Jakub mwwg imiq nyi tulungam benum, “Wlw loq nookum to.” Hoo bulv nookumnv ham lwwpum pumcal apnum, hoo bulv lwwpum ho dvs-twws dvknum.

⁴⁷‍Laban ham Jegar-sahaduta hvl goqnum, hvbmabde Jakub ham Galeed hvl goqnum.

⁴⁸‍Laban benum, “Soolo galoqkv so lwwpum si noqg la ngoqg pengko so hvvky akwb dootayin.” Hoqgab mwv ham Galeed hvl eminum,

⁴⁹‍hoo Mijpa gab mwv benum, “Hwdlo ngulv akwn-akwn kaapa mins kuma yin, At Sw noqg la ngoqg pengko lo rvkil doogdvn.

⁵⁰‍No ngoqg ko nyem mam mvnyi-mviya baloqkam, ho ngoqg nyem koam nywxw naaxin baloqkam, ngulug lvgab hiyv kam dook maajaqkam, kaato, Pwnbov noqg la ngoqg pengko lo hvvkib kaatayin.”

⁵¹‍Ho Laban Jakubnvn benum, “Kaato, soq wlw swwrw lwwpum sam ngo noqgab la ngoqgab diip pakun.

⁵²‍Soq lwwpum si hvvky akwb dootayin hoo wlw swwrw si hvvky akwb nyitayin, ho soq lwwpum soqgv ngo noqg dookub wbo kuram, hoo soq wlw swwrw la lwwpum soqgv no kam ngam mengta-puqtab wbo nyoram.

⁵³‍Abraham gv Pwnbov, hoo Nahorg Pwnbov, bulug abwg Pwnbov ngunyig pengko so hvvky doomto.” Ho Jakub mwwg ab Aisaknvn bos banv dingr kunum,

⁵⁴‍hoo Jakub diisw gvdaho pwr jil aky keenum hoo mwwg nyi tulungam wtw dvtwk hvl goqnum. Bulv wtwngam dvkul hoq aiho diisw gvdaho doonum.

⁵⁵‍Ar komc Laban gorab kunv mwwg ko hosiq ko hury tulungam la mwwg nyem ko tulungam moopupnum hoo bulam lvqc cinum. Ho Laban hoqgv mwwg nammwb wkurl wknum.