Read Nyishi BEGGAR 32 Bible Online

BEGGAR 32 - Nyishi bible

BEGGAR 32

¹Jakub mwwg lamtab wknum, hoo Pwnbog gumtw tulungv mwam wrwqnum.

²‍Hoo hwdlo Jakub bulam kaapa yin mwv benum, “Soq si Pwnbog svmcw go.” Ho mwv nyook hoq eminam Mahanaim hvl goqnum.

³‍Hoo Idom gvdag, Seir nyookho doonbo mwwg vbw Esu dookub Jakub mwwg otuqb hvvky tulungam kanam coonum,

⁴‍bulam hingky jaqb tomswrl bilwqnum, “Soq sib ngoqg at Esunvn nulv betayin: Soq sib noqg nyera Jakub beden, ‘Ngo Laban lvgab nyoodo nyiib nyinv sija godab doomin gvdwn.

⁵‍Ngo svv hvvbv, svdam tulungv, sviya-sibinv, nyerangv, hoo paqnv doog dukun. Ho ngo noqg kaagaho mwwsw dvb kaapa kudwb, ngoqg atam ngo agam bilwq gviyin hvl beta.

⁶‍Hoo pui baqnbo hvvky tulungv Jakub dookub hookur kunv begamv, “Ngulv noqg vbw Esu dookho haanum, hoo mwv nam kvvrwqtab hoodu de, hoo nyiingv lwwpy gob mwwg lvgab yvba deen.”

⁷‍Ho Jakub vcjaqb bosnum hoo mwwdwqnum. Mwwg lvgab doonbo nyiilungam, hoo sviya-sibin tulungam hoo svv tulungam hoo svjin tulungam svmcw vnyi gob mwv mvpinum,

⁸‍mwwgamv, “Esu svmcw akwn ham nyob paiyaq baloqkam, ho akwn hv keleqdvb nyila tayin.”

⁹‍Hoo Jakub benum, “Ngoqg ab Abraham gv Pwnboa hoo ngoqg ab Aisakwg Pwnboa, ho ngam hvl benbo At Swa, ‘Noqg atwg gvda bvla noqg imiq nyi tulug dookub wkur tuku, ho ngo nam alboam nyij tan,’

¹⁰‍Ngo nyiloqkam noqg tumab aby dvb hog mwlw bon nyijnum taqp maasu hoo noqg nyerangam noqg dengkynam mam kaakin dvb singp maasu, hoggab ngo soq Jordon sam ngoqg beqnyia aro lvgab rabnum, hvbmabde sija ngo svmcw vnyi go doog dukun.

¹¹‍Anya mwwpa gvdwl ngam ngoqg vbw Esug alaq hoqgv naalin tvb, hoggab mwam ngo bosdo, mwv ngam la ann tulungam la ko hury tulungam haal mvkam nvvs yv.

¹²‍Hvbmabde no benum, ‘Ngo jvqtw jaqb nam alboam nyitayin hvnum, hoo noqg hosiqkam sa-svlog xuqx hvb mvtayin, hiyvkam ham xila maadwn.’”

¹³‍Ho mwv hoq aiho ho doonum, hoo hoggv mwwg lvgab doonum ham naalayil mwwg vbw Esunvn aky jinum,

¹⁴‍sibin bin lwwnyi go hoo bimpv camnyi go, sviya nyemv lwwnyi go hoo yaap tvmwrv camnyi go,

¹⁵‍gwwi twwdu bo svjin joobaq cammum go, hvvn campy go hoo hvvb doryw go, svdam damn camnyi go hoo svdam damp doryw go jinum.

¹⁶‍Soq tulu sam mwwg nyera tulug alaqho gvqlwqnum, vx-cwram nyera ak-kwb rool wg mvnum, hoo mwwg nyerangam mwv benum, “Ngoqg otuq soq tulu sam rool wgto hoo aado-aado dvb tom-tomwb rool wgto.”

¹⁷‍Mwv otuq ak ham tomswrl bilwqnum, “Hwdlo ngoqg vbw Esu nam kaapal hoo nam soq sib tox yinyi loqkam, ‘No hiyvg nyiingv? No hogloqb wdeen? Hoo noqg soq bool wgnam tulu si hiyv gv?’

¹⁸‍ho no hvl betayin, ‘Soq tulu si noqg nyera Jakub gv. Soq tulu sam ngoqg at Esunvn akib jilwqnamv. Hoo mwv ngulug kokw vv hoodu dvn.’”

¹⁹‍Hoqhvb kalam mwv tomnyi deen ham la tommum deen ham hoo dvpar-dvparam rool wgbo mwlwngam aiyin lvkin dvb tomswrl bilwqnum, “Hwdlo nulv Esunvn kaapa yin benam akin ham betayin,

²⁰‍hoo nulv betayin, ‘Noqg nyera Jakub, ngulug kokw vv hoodu dvn.’” Hoggab mwv mwwnum, “Ngoqg otuqb tuun-mee wmnam tuluhv ngo mwam jinyioq tayin, hoo kokwngam ngo mwwg nyuqm mam kaapa tayin. Ho mwv ngam loorwq kamyi nvpv.”

²¹‍Ho mwwg otuqb aky jidynam tulungam wwm coonum, hoo mwv atv ai yubg svmcw ho doonyunum.

²²‍Hoq ai yubkin ho mwv gorab layil hoo mwwg nywxw vnyiam, paqn nyi vnyiam hoo mwwg camleq akin ko tulungam boolayil, hoo Jabbok pobug iss bocar koob rabknum.

²³‍Mwv bulam boolayil hoo mwwg doognam hog mwlwngam bulam pobungam rapeq mvdkub kanam kunum.

²⁴‍Hoo Jakub vp-cwkwb dookurl doonyunum. Hoo nyi ak mwam ar huto maady deedib gwbw tubnum.

²⁵‍Hwdlo nyi akv Jakubnvn gwbw tubya nyoma yin mwv Jakubg xvrnyiq pwpam tubdaqnum, hoo mwv mwam gwbw tumin sui yikho Jakubg xvrnyiq pwpam tubtwrnum.

²⁶‍Ho mwv benum, “Ngam wwm tukub, hoggab huto yuku.” Hvbmabde Jakub benum, “No ngam lvqc cima deedib nam ngo wram.”

²⁷‍Hoo mwv mwam benum, “Noqg eminv hoggv?” Hoo mwv benum, “Jakub.”

²⁸‍Ho mwv benum, “Noqg eminam Jakub hvl goqk ram, hvbmabde Israel, hoggab no Pwnbog lvg bvla nyi tulug lvgab gwbw tubl hoo tubya paku.”

²⁹‍Ho Jakub mwam toxnum, “Anya mwwpa gvdwl noqg eminam ngam betam tvb.” Hvbmabde mwv benum, “Hoggub no ngoqg eminam tox dvn?” Hoo mwam mwv lvqc ciknum.

³⁰‍Ho Jakub hoq nyookwg eminam Peniel hvl beknv, begamv, “Ngo Pwnbo nyuqm mam kaatv tukun, hvbsujaqkam ngam sig hoqgv ywwlin pakun.”

³¹‍Mwwg xvrnyiq pwpam tubtwr ko-gab mwv lvja jaal Penuel hoqgv, lingdu yukho doonyiv caada lwlw kunum.

³²‍Hoqgab soolo namgub Israel nyiilungv axar xarpog xvrnyiq pwpam dvma dvn, hoggab mwv Jakubg axar xarpog xvrnyiq pwpam tubdaql tubtwrnum.