Read Nyishi BEGGAR 33 Bible Online

BEGGAR 33 - Nyishi bible

BEGGAR 33

¹Hoo Jakub mwwg vnyiqkam piorabl hoo kaanum, hoo kaato, Esu la mwwg nyi lwwpiv hoodul doonum. Ho mwv Liya gvla Rakel hoo paqn vnyig ko tulungam dvpar-dvpar gob mvnum.

²‍Hoo mwv paqn tulungam la bulug ko tulungam otuqb pvvnum, ho Liyanvn mwnwg ko lvgab, Rakel la Josapnvn mwlwg vtwr-anya ho pvvnum.

³‍Mwv atv bulug otuqb wnum, mwwg vbw ogumho mwv hvvc maatab, kedho kvn go pvxwl xumnum.

⁴‍Hvbmabde Esu xarnv mwam kvvrwql hoo mwam cegab tvl mwwg lwwpo ho nywdaq tvl hoo mwam moopupnum, hoo bulv xabnum.

⁵‍Hoo hwdlo Esu mwwg vnyiqkv nywrabl kaanum hoo nyem mam la ko tulungam kaapanum, mwv benum, “Noq lvgab haanbo soq nyi tulu si hiyv?” Jakub benum, “Noqg nyerangam Pwnbog anya mwwpal jinam ko tulungv.”

⁶‍Ho paqn tulungv la hoo bulug ko tulungv haanum hoo dumpo pvxwl xumnum.

⁷‍Liya la mwnwg ko tulungv ogumb hvvnwqnum hoo dumpo pvxwl xumnum. Hoo vtwr-anya ho Josap la Rakel ogumb hvvnwqnum, hoo bulv dumpo pvxwl xumnum.

⁸‍Esu benum, “Otuq alo ngam wrwqbo dvpar tulu vv hoggab no kanamnum?” Jakub birwqnum, “Ngoqg atwg kaagaho ngam mwwswl kaapa kudwb roolwqnum.”

⁹‍Hvbmabde Esu benum, “Ngoqg bor, ngo naleqgo doodwn; no hoggv doogdvn ham noq atgab pvvto.”

¹⁰‍Jakub benum, “Ma, hvb bemab, noqg kaagaho ngo mwwswl kvvlwq dvb nyip nyiloqkam ngoqg alaq soqg aky jinam sam loorwqto. Hoggab noqg nyuqm mam kaanam si hvbnyiloqkam ngo Pwnbo nyuqm mam kaapkun hvb nyidwn, hoo no ngam loorwq paku.

¹¹‍Anya mwwpa gvdwl noqgab baqa jinam aky sam loorwqto, hoggab Pwnbov ngam anya jaqb svka paku, hoo ngo naleqgo doodo.” Hoqgab mwv mwam xaateqnum, hoo mwv ham naanum.

¹²‍Ho Esu benum, “Ngulv atwg lamtab nyiody sam boon kuj, hoo ngo noqg otuqb wco deen.”

¹³‍Hvbmabde Jakub mwam benum, “Ngoqg atv no cengs do ko tulungv wnyi kuma, hoo gwwi twwdu bo tuun-mee tulu ham ngo hengabl hoocuml wg yindo. Bulam aal lookin ho ruqtaq kvlaql wg baloqkam tuun-mee mwlwngv sitayi.

¹⁴‍Ngoqg at noqg nyera otuqb no wco yaato, hoo ngo nyinyiaqb wgtayin, ngoqg atwg dook Seirho hvvc maady deedib, ngoqg otuqb wnbo tuun-mee ngvla ko tulungv hog hwdgo nyebiab wtayin hwdgo ngo nyebiab bulam bool wgtayin.”

¹⁵‍Ho Esu benum, “Ngoqg lvgab wnbo nyiilu tuugin nam apaq jipe nvp.” Hvbmabde mwv benum, “Bulam apaq maajaqkam alv? Ngoqg at ngam mwwswl kvvlwq twqbo lo hv alv.”

¹⁶‍Ho Esu hoq aalho mwwg lamtab Seirwb wkur kunum.

¹⁷‍Hvbmabde Jakub Sukkot nyookub nyiody wnum, hoo mwwg atgab mwv nam mvknum hoo tuun-mee tulu gab taabo pojnum. Hoqgab nyook hoqg eminam Sukkot hvl goqnum.

¹⁸‍Hoo Jakub anya jaqb Sekem bopamho hvvc kunum, mwwg Paddan-aram lamta hoqgv hooduko ho, Kanaan gvdaho doonum, hoo mwv bopam agaho svmcw mvl doonum.

¹⁹‍Hoo Sekem abwg, Hamorg ko tuup tulu hoqgv mwv twngk lwwgwb rvnam gvdaho mwwg tombungam mwv rwwp kunum.

²⁰‍Hoqho mwv yugw ak diirab banv mvtwl hoo ham EL-Elohe-Israel hvl goqnum.