Read Nyishi BEGGAR 34 Bible Online

BEGGAR 34 - Nyishi bible

BEGGAR 34

¹Sija Liyag Jakubnvn nyem ko bwwjnum Dina gvdag nyem tulungam kaatab wnum.

²‍Hoo hwdlo Hamorg ko tuup Sekem, Hibit, gvda hoqg lvpw atv mwnwn kaapa yin, mwv mwnwn selayil hoo mwnwn nyij-nyiparnv humlil nyinv doognum.

³‍Hoo mwwg yvjv Jakub ko Dinanvn topaq kumanum. Mwv nyijwr akam abynum hoo mwnwn tangam jaqb dvb agam goonum.

⁴‍Ho Sekem mwwg ab Hamornvn begamv, “Soq nyem ak sam ngoqg nywxwb naatbv.”

⁵‍Jakub mwwg nyem kongam humlil nyinam mam tapanum. Hvbmabde mwwg ko tuup tulungv nyoroho sibin-svv tulungam rool yvg ko-gab, bulv haanam gob Jakub svtwl swrsob doonum.

⁶‍Hoo Sekemg ab Hamor Jakub dookub wnv mwam agam goonum.

⁷‍Jakub ko tuup tulungv nyoro hoqgv haada kalam bulv ham tapanum, hoo bulv vcjaqb mwwdwqnv hoo haaxaqnum, hoggab mwv Jakub nyem koam humlil nyinv, Israel nyi tulu mwlwngam nyinyi-nyiya paku, soq sam nyiyin maatba.

⁸‍Hvbmabde Hamor bulug lvgab agam goonv begamv, “Ngoqg ko tuup Sekemg yvjv noqg nyem kongam mwungul doodo. Anya mwwpa gvdwl mwnwn mwwg nywxwb jitwb.

⁹‍Ngulv nyem jiko-jipeql hoo naako-naapeqtuj. Noqg nyem koam ngulam jitwb, hoo ngulug nyem koam nulv naato.

¹⁰‍Nulv ngulug lvgab dooto, hoo nulv hogloq gvdaho doonw dvn ho dooto. Doogw tvl pudu ruuto, hoo gumn-ranam naato.”

¹¹‍Sekem kam mwnwg abam la mwnwg vbw-bor tulungam benum, “Ngam nulv mwwswl gvdwl nyitbv, nulv ngam hoggv betayin ngo jitayin.

¹²‍Nulv ngam naleqgo sooram la nulug mwwlwqnam akiam kojaqkam hoo nulv ngam hoggv kotayin ngo jitayin. Ngam nyem nyijwram ngoqg nywxwb jitwq tvb.”

¹³‍Jakubg ko tuup tulungv Sekem nvla mwwg ab Hamornvn surjaqb birwqnum, hoggab mwv bulug bwrm Dinanvn kacdvb mvgam gab.

¹⁴‍Bulv bulam benum, “Ngulug bwrm mam pepaql-mux mvma boam nyem jidwb, ngulv sam nyila deema, hoggab hv ngulam xima dvb mvtayin.

¹⁵‍Soq sam nulv nyitwq baloqkam ngulv nulam loorwq tayin—ngulug hvbkalam nulug nyega vcw-atam pepaql-mux mvto.

¹⁶‍Ho ngulug nyem kongam ngulv nulam jitayin, hoo ngulv nulug nyem kongam ngul gab naatayin, hoo ngulv nulug lvgab dootayin hoo ngulv nyiilungv akin gob nyitayin.

¹⁷‍Hvbmabde nulv ngulam tama bvla mux mvma baloqkam, ngulv ngulug nyem koam boota yukun, hoo ngulv wtayin.”

¹⁸‍Bulug gomcwr tulungv Hamor nvla Hamorg ko tuup Sekemnvn tvlwqnum.

¹⁹‍Hoo yaapa nyi akv ham nyidwb oyu maanum, hoggab mwv Jakubg nyem ko ak ham aby jaqnum. Mwwg abwg namho mwlwngam xibin yaadwb mwv nyinum.

²⁰‍Ho Hamor la mwwg ko tuup Sekem bopamg toggoqho haaknum hoo bulug bopam hoq nyi tulungam agam goonv begamv,

²¹“Soq nyi tulu si ngulug lvgab swrsob paku; bulam gvda so doomto hoo hoq hoqgv pudu ruumto, ho kaato, bul gab gvdangv jot do. Bulug nyem ko tulungam ngulug nywxwb naatuj, hoo ngulug nyem koam bulam jituj.

²²‍Soq sam aro ngulv loorwq baloqkam bulv ngulug lvgab dootayi hoo nyiilungv akin gob nyitayin—hwdlo ngulug nyega ko vx-cwrv bulug pepaql-mux mvnam hvbkalam pepaql-mux mvbnyiloqkam loorwqtai.

²³‍Bulug tuun-meengv, bulug gumn-ranv hoo bulug svb-svvngv ngulug ram yv? Ngulv bulam loorwq twqtuj, hoo bulv ngulug lvgab dooba tayin.”

²⁴‍Hoo mwwg bopam toggoqb wnbo mwlwngv Hamor la mwwg ko tuup Sekemg benam mam tanum hoo nyega ko vx-cwrv mux mvnum, mwwg bopam haaga toggoqb wnbo nyega vcw-at mwlwngam mux mvnum.

²⁵‍Ho aal loum deenho, hwdlo bulv un vc cidu yukho, Jakubg ko tuup vnyi gon, Dinag vbw Simeon la Lebi bulug lyoqr orioqkam naalayil hoo bopam mam ceekol haabnv nyega mwlwngam mengnum.

²⁶‍Bulv Hamor nvla mwwg ko tuup Sekemnvn lyoqr orioq lvgab mengnum hoo Dinanvn Sekem nam hoqgv naala yukul wleqnum.

²⁷‍Hoggab bulug bwrm mam bulv humlil nyigam gab, Jakubg ko tuup tulungv mengxo tvl bopam mam hubyiql baql wgnum.

²⁸‍Bulv bulug sviya-sibin pvtwngam hoo bulug svv tulungam, bulug svdam tulungam, hoo bopam ura hoola rongo ho hoggv xeq doonam ham naal wgnum.

²⁹‍Bulug gumn-ran mwlwngam, bulug ko anyongam la nywxw tulungam, hoo nam uraho doonbo hog mwlwngam bulv naareql hoo baql wgnum.

³⁰‍Ho Jakub Simeonnvn la Lebinvn benum, “Gvda soq doonbo Kanaan nyi tulungam la Perijj nyi tulungam nyixal nulv ngoqg aoso vs-axaqkam haam dvb mvpa ku. Ngoqg nyiingv jaqnyo do, hoo bulv lvkin gob ngam ceekol nyob pabnyiloqkam ngam la ngoqg imiq dvparam twryum tayin.”

³¹‍Hvbmabde bulv benum, “Ngulug bwrm mam mwv hoggab meqjo bo ak hvb mvnum?”