Read Nyishi BEGGAR 35 Bible Online

BEGGAR 35 - Nyishi bible

BEGGAR 35

¹Pwnbov Jakubnvn benum, “Gorabto, Betel wgdvl hoo alo doota. Hwdlo noqg vbw Esu hoqgv no keleq yukho nam wrwqbo Pwnbo gab yugw lo alo ak mvta.”

²‍Ho Jakub mwwg imiq nyiingam la mwwg lvgab dooba mwlwngam benum, “Nulug pengko ho nyoodo pwnbo tulungam hurpaq tuku hoo nulv atv atam darxaqto hoo nulug vj tulungam kwly to.

³‍Ho gorabto ngulv Betelwb wnuj, ho Pwnbo gab yugw loq ak alo mvtaj, ngoqg vs-axaq moodho hiyv ngam svkanum hoo ngoqg hogloq bvxeq wknum ngoqg lvgab wbanum.”

⁴‍Ho bulv Jakubnvn bulug doognam nyoodo pwnbo mwlwngam, hoo bulug nyuruho gagy tulungam jiknum. Jakub hoq tulu ham Sekem ogumg terebin svvn niikumho kvsil apnum.

⁵‍Hoo bulv nyiody boodu yikho Pwnbo hoqgv diis-paapwg bopam tulungam bos looda dvb haanum, hoggab bulv Jakubg ko tulungam ruqmin gvmanum.

⁶‍Hoo Jakub Kanaan gvdag Luj ho haaknum (hoqhv Betel), mwv la mwwg lvgab wba bo nyiilu mwlwngv haaknum,

⁷‍hoo hoqho mwv yugw ak mvnum hoo nyookam El-betel hvl goqnum, hoggab hwdlo mwwg vbw hoqgv mwv keleq yukho, hoqho Pwnbov mwv atv mwam kaakinum.

⁸‍Hoo Rebekanvn bon nyijbo Debora siknum, hoo mwnwn Betelwg kora svvn niikumho svma liiknum. Ho mwv hoqg eminam Allon-bakut hvl goqnum.

⁹‍Hwdlo mwv Paddan-aram hoqgv haai yikho, Pwnbov Jakubnvn lokta kaakinum, hoo mwam lvqcnum.

¹⁰‍Hoo Pwnbov mwam benum, “Noqg eminv Jakub; hvbmabde noqg eminam Jakub hvl goqk ram, hvbmabde noqg eminam Israel hvtayin.” Ho mwwg eminam mwv Israel hvl goqnum.

¹¹‍Hoo Pwnbov mwam benum, “Ngo mwlwngam ator koi yaanbo Pwnbov: mipar-gooiyiql hoo dumtwq-miilyw swwn ka. Nyob ak hoo jaqt bo nyob tulungv noqg hoqgv lengtayin, hoo lvpw at tulungv noqg atwg gv hoqgv lengtayin.

¹²‍Abraham nvla Aisaknvn gvda jinam mam ngo nam jitayin, hoo noqg kokwb noqg hosiqkam ngo gvdangam jitayin.”

¹³‍Ho Pwnbov hogloq nyookho mwwg lvgab mwv agam gooknum mwwg hoqgv wleq kunum.

¹⁴‍Hoo hogloq nyookho Pwnbov mwam agam gooknum, Jakub wlw swwrw ak hoqho diidaql apnum. Mwv hoq aoho twws akiam tooiyaqnum hoo hoqho kutiam tooiyanum.

¹⁵‍Ho hogloq nyookho Pwnbov mwwg lvgab agam gooknum Jakub hoq nyook hoqg eminam Betel hvl goqnum.

¹⁶‍Ho bulv Betel hoqgv nyiody booknum. Hwdlo bulv Iprat hoqgv aado kvtaq go dooyikho, Rakel cinc cirabnum, hoo mwn vc loodab cinc cinum.

¹⁷‍Hoo hwdlo mwnwg cincv vc loodab cigwq yukho, cinc joonbov mwnwn benum, “Bos maabv, hoggab no nyega ko akta doopa ku.”

¹⁸‍Hoo mwn sijo ywwtwl, mwwg eminam mwn Ben-oni hvl goqnum; hvbmabde mwwg abv mwam Benjamin hvl goqnum.

¹⁹‍Ho Rakel siknum, hoo mwnwn Iprat lamtaho svma liiknum (hoqhv Betleham),

²⁰‍hoo Jakub mwnwg nyubuho wlw swwrw ak diidaqnum. Hoqhv Rakelg nyubungv, hv soolo godab doodwn.

²¹‍Israel mwwg nyiodam boodul doonum hoo mwwg tombungam Eder sojag taqcgon ho rwwnum.

²²‍Israel hoq gvdaho doodu yukho, Reuben mwwg abwg xwwbaq nywxw Bilhanvn bwwnum. Hoo Israel ham tapanum. Ho Jakub ko tuupv camleq vnyi kunum.

²³‍Liyag ko tuupv: Reuben (Jakub tuup vbw cociq), Simeon, Lebi, Juda, Issakar, hoo Jebulun.

²⁴‍Rakelg ko tuupv: Josap la Benjamin.

²⁵‍Rakel paqn Bilhag ko tuupv: Dan la Naptali.

²⁶‍Liyag paqn Jilpag ko tuupv: Gad la Aser. Soq tulu si Paddan-aram lo Jakubnvn ko bwwjnum ko tuupv.

²⁷‍Hoo Jakub mwwg ab Aisakwg dook nyook Mamre, Kiriat-arba (hoqhv Hebron) ho hvvc kunum, hoqho Abraham la Aisak doogwnum.

²⁸‍Ho Aisak 180 vnyw gob swwl dooknum.

²⁹‍Hoo Aisak mwv nyekam pvg dvb doope kul, mwwg svqriq taiyikho mwwg nyiilungam mwv goqkumnum hoo mwv svqriq kunum. Hoo mwwg ko tuup Esu la Jakub mwam svma liiknum.