Read Nyishi BEGGAR 37 Bible Online

BEGGAR 37 - Nyishi bible

BEGGAR 37

¹Mwwg abwg dook, Kanaan gvdaho Jakub hvraq doonum.

²‍Soq tulu si Jakubg hotam tulungv. Josap vnyw camleq kvn go akam dukho mwwg vbw tulu lvgab sviya-sibin pvtwngam rool yvmin gvnum. Mwv mwwg abwg nywxw Bilha gvla Jilpag nyega kov. Hoo Josap bulug almab nyinam mam mwwg abam betamnum.

³‍Israel Josapnvn mwwg ko tuup mwlwngam aby bobin yaanum, hoggab mwv mwwg nyekam konguq yukho ko bwwnum. Hoo mwv mwwg gab naleqgo kangam dvb poomo vj rumg mwjnum.

⁴‍Hvbmabde hwdlo mwwg vbw tulungv bulug abv mwam mwlwngam aby bobin yaanam mam cengtwl, bulv mwam oyumnum hoo mwam anyab agam goomanum.

⁵‍Ho Josap yuma ak maanum, hoo hwdlo mwv ham mwwg vbw tulungam betam yukam bulv vi yaiya go mwam oyumnum.

⁶‍Mwv bulam benum, “Taiya to, ngoqg yuma maanam sam:

⁷‍Kaato, ngulv rongo ho am agaq goqdunam, hoo kaato, ngoqg am agaqkv gorab layil dindab daqnum. Hoo kaato, nulug am agaqkv hoq bviywrho hookumnum hoo ngoqg agaqkam pvxwl xumnum.”

⁸‍Mwwg vbw tulungv mwam, “No jvqtw jaqb ngulug aoso lvpw atwb swwtayin i? Ho no jvqtw jaqb ngulug aoso pvvb bwwl doog tayin i?” Ho mwwg yumangam la mwwg gomcwram tatwl bulv mwam vi yaiya go oyumnum.

⁹‍Ho mwv yuma akta yuma maanum hoo ham mwwg vbw tulungam betamnum, “Kaato, ngo yuma akta yuma maanum. Kaato, doonyiv, poolv, hoo camleq akin takarv ngam pvxwl xumnum.”

¹⁰‍Hvbmabde hwdlo hoqham mwwg abam la vbw tulungam betam yin, mwwg abv mwam yolu ruql hoo mwam benum, “Hognvk yumangv no yuma maatnum? Ngo la noqg annv hoo noqg vbw tulungv, ngulv noqg agaho haalayil kedho pvxwl xumtayin yv?”

¹¹‍Hoo mwwg vbw tulungv mwam kaaneqnum, hvbmabde mwwg abv agam goolin maab mwwtwqnum.

¹²‍Mwwg vbw tulungv mwwg abwg sviya-sibin pvtwngam Sekem ogumho roogaql yvgnum.

¹³‍Hoo Israel Josapnvn benum, “Noqg vbw tulungv sviya-sibin pvtwngam Sekem alo rool yvgdo? Soq haat, ngo nam bulug dookub kanam tayin.” Hoo mwv mwam benum, “Ngo si doodwn.”

¹⁴‍Ho mwv mwam benum, “Noqg vbw tulungv la sviya-sibin pvtwngv al dviya bwdwq wgdvl kaapel ngam agam betam to.” Ho mwv mwam Hebron lywpa hoqgv kanamnum, hoo mwv Sekem ho haaknum.

¹⁵‍Hoo nyi ak mwam nyoroho nyogaq gaqkarnam mam kaapanum. Hoo nyi akv mwam toxnum, “Hoggv no meegaq dvn?”

¹⁶“Ngoqg vbw tulungam ngo meegaq dvn hvl mwv benum.” Anya mwwpa gvdwl ngam betam tvb, bulv hogloq ho sviya-sibin pvtwngam rool yvgdo.”

¹⁷‍Hoo nyi akv benum, “Bulv soqgv wn kun, ‘Kuj ngulv Dotanwb wnuj hvl bemin sunam mam ngo tapa tvn.’” Ho Josap mwwg vbw tulug kokwb wmin gvnv bulam Dotanho kaapanum.

¹⁸‍Bulv mwam aado hoqgv kaapanum, hoo bulug ogumb mwv hvvnwq maatab bulv mwam mengdwb hvl hwws kunum.

¹⁹‍Bulv akwn-akwn bemin sunv benum, “Yuma maanbo akv haaiku.

²⁰‍Kuj haato, ngulv mwam mengtwl ung golo joopaq tuj. Ho nyoro svdinv mwam cexnum hvl ngulv betuj, hoo ngulv kaaya tuj mwwg yuma maanamv hoggub nyiyi badwq.”

²¹‍Hvbmabde Reuben ham tapanum, mwam bulug alaq hoqgv ywwlin dvb mwwnv mwv benum, “Mwam ngulv mengma buj.”

²²‍Hoo Reuben bulam benum, “Mwam ui lengdwb mviyoj; mwam soq deexa-rarag ung so joolwql apaqtuj, hvbmabde mwam alaq idaql mengmab”—ho mwam bulug alaq hoqgv mwv naalin layil mwwg abam jikur dukub mwwsnum.

²³‍Ho hwdlo Josap mwwg vbw tulug dook ho hvvc yukho, bulv mwwg kangam alwb naleqgo poory-pooga dvb mvtwl koonam vjam twqbinum.

²⁴‍Hoo bulv mwam boolayil mwam ung ura gol joolwqnum. Unghv asarnum; hoqho iss doomanum.

²⁵‍Ho bulv dvdwb doanum. Hoo bulv nywrabl kaanamv Ismaiyel nyi tulu hoqgv kwm-kor mvnbo nyi dvpar go Gilead hoqgv hoodul doonum, bulv bulug svjin tuluho swwxw, takin, takeq-taiyab nwwnan, hoo mirram baqm tvl, bulv Ijipt baql dvb hvl bulug lamtaho wdunum.

²⁶‍Ho Juda mwwg vbw-bor tulungam benum, “Ngulv ngulug boram mengtwl svmangam kvsnamv hoggv ngulv kaapa tayin?

²⁷‍Haato kuj ngulv mwam Ismaiyel nyi tulungam puqtuj, hoo ngulug alaqkv mwwg aoho idaq yooju, hoggab mwv ngulug borv, ngulug atwg soodin akinv.” Hoo mwwg vbw-bor tulungv mwam loomin gvnum.

²⁸‍Ho Midian nyi tulu pudu ruunbov wpeqnum. Hoo bulv Josapnvn ung hoqgv lvvgwb seelinum, hoo mwam rup sikil camnyi gob puqknum. Bulv Josapnvn Ijipt booknum.

²⁹‍Hwdlo Reuben ungho wkurl kaaknamv Josap ung uraho dook maanum, mwwg vjam mwv puc-puiywl mvsnum

³⁰‍hoo mwwg bor tulug dookub mwv hookurl benum, “Nyega kov dookma, hoo ngo sija, hogloqb wta yukun?”

³¹‍Ho bulv Josapg kamtam naalayil hoo sibin dorg mengnum hoo kamtam uiho swwbamnum.

³²‍Hoo bulv kangam dvb naleqgo poory-pooga bo vjam bulug ab dookho baqa layil benum, “Soq sam ngulv kaapa yin; soq si noqg ko tuup vj goi yv ma vj maai yv kaacin kaato.”

³³‍Hoo mwv ham kaacinl hoo benum, “Si ngoqg ko tuupwg vj go. Nyorog svdinv mwam mengp kude. Sam mwum dvb nyima Josapnvn cimwq-ceiyaql mvkbade.”

³⁴‍Ho Jakub mwwg vjam swrmwq tvl hoo mwwg hwwpo ho tuila vjam kootwl hoo mwwg ko gab aal naleqgo nyix-riil doonum.

³⁵‍Mwwg ko tuup tulungv la mwwg nyem ko mwlwngv mwam bet-bela dvb benum, hvbmabde mwv bet-bela kumanum. Ngam bet-bela maab, ngo Sux-ywlwb ig dvl hvraqb ngoqg ko gab ngo nyix-riidu tayin.” Soq sib mwwg abv mwwg gab xabnum.

³⁶‍Kokw so Midian nyi tulungv mwam Ijiptho Parog sipai saab rvkybo keptenwg, Potiparwg imiqho puqlwqnum.