Read Nyishi BEGGAR 38 Bible Online

BEGGAR 38 - Nyishi bible

BEGGAR 38

¹Hoq moodho Juda mwwg vbw-bor tulu hoqgv wbwq layil Adullam gvdag Hira ngvk hvl eminam lvgab doobanum.

²‍Hoqho Juda Kanaan nyi nyem ko Sua ngvk hvl eminam ak kaapanum. Mwnwn mwv naanum hoo doognum,

³‍hoo mwn ko gvnum hoo nyega ko ak bwwnum, hoo mwwg eminam mwv Er hvl goqnum.

⁴‍Mwn akta ko gvnum hoo nyega ko ak bwwnum, hoo mwwg eminam mwn Onan hvl goqnum.

⁵‍Hvraq lokta mwn ko bwwnum, hoo mwwg eminam mwn Sela hvl goqnum. Hwdlo mwn mwam ko bwwi yikho Juda Kejibho doonum.

⁶‍Hoo Juda mwwg ko tuup vbw cociq gab nywxw ak naanum, hoo mwnwg eminv Tamar.

⁷‍Hvbmabde Er, Judag ko tuup vbw cociqhv At Swg kaagaho nyic-nyia nyinum, hoo At Sw mwam sim dvb mvnum.

⁸‍Ho Juda Onannvn benum, “Noqg vbw nywxw dookub wno hoo lyog nyidy sanam mam mwnwn nyijto, hoo noqg vbwg hosiqkam lingsiq mvto.”

⁹‍Hvbmabde Onan hosiqkv mwwg ram hvl cengnum. Ho hwdlo mwwg vbw nywxw dookub mwv dooba yin mwwg doolangam kedho mwv toopaqnum, mwwg vbwg hosiqkam swsiql swwlin mwnw maanum.

¹⁰‍Hoo mwv hoggv nyinum hv At Swg kaagaho nyic-nyia gob nyinum, hoo mwam kam sim dvb mvnum.

¹¹‍Ho Juda mwwg nyeexwngam benum, “Ngoqg ko tuup Sela akam namxaqb, noqg abwg namho xwwmib dooiya ta”—hoggab mwv bosnum mwwg vbw tulu hvb mwv rub sitwqto mwwnum. Ho Tamar wknv mwnwg ab namho dooiyanum.

¹²‍Meeg mood kokw so Judag nywxw Sua siknum. Judanvn bet-bela kunum, ho mwwg sviya vm reqya bo Timna dookub mwv la mwwg ajin Adullam gvdaho doonbo Hira caaba sunum.

¹³‍Hoo Tamarnvn betamnum, “Noqg atu mwwg sviya vm riqjbo Timna dookub coodu do,”

¹⁴‍mwn mwnwg xwwmy vjam pipaq peel hoo mwn atv nyuqm pulupnan vj lvgab pulup tvl Timna lamta wg gaag Enaim haagaho doonum. Hoggab mwn kaaknum Sela akam kunum, hoo mwnwn nyeexw somdvb mwam jimanum.

¹⁵‍Hwdlo Juda mwnwn kaanum, mwv mwnwn meqjo bo go mwwnum, hoggab mwnwg nyuqm mam mwn putumnum.

¹⁶‍Mwv lamta bviywr mwnwg dookub haabnv hoo benum, “Haato, nam ngo bwwtayin,” hoggab mwnwn mwwg nyeexwngv hvl mwv cengmnum. Mwn benum, “No ngam doog baloqkam, hoggv no ngam jitayin?”

¹⁷‍Mwv birwqnum, “Ngo nam sibin bindo loq ak kanam jitayin.” Hoo mwn benum, “No ham kanam namgub ngam hogloq ak dingrwl pvvpe—”

¹⁸‍Mwv benum, “Hoggv ngo nam dingrwl pvvtayin?” Mwn birwqnum, “Noqg morx lvqc ham la noqg laa ham la noqg alaqho beqnyia ham ap peebv.” Ho mwv hoq tulu ham mwnwn jinum hoo mwnwn doognum, hoo mwn mwwg gab ko gvnum.

¹⁹‍Ho mwn gorabl wleq kunum, hoo mwnwg nyuqm putumnam vjam pipaq tukul xwwmy vjam kooknum.

²⁰‍Hwdlo Juda sibin bindo ham mwwg ajin Adullam hoq doonbo nyi lvgab jilwq tvl mwwg nyem ham dingrwl ap jinam tulu ham nookur mvdkub kanamnum, mwv mwnwn kaapa maanum.

²¹‍Hoo mwv nyook hoq nyi tulungam toxnum, “Enaim lamta bviywrho meqjo bo nyem akv hogloq ho doodwn?” Hoo bulv benum, “Ma, so meqjo bo nyem dooma dvn.”

²²‍Ho mwv Juda dookub hookur kunv hoo benum, “Ngo mwnwn kaapa ma. Nyookwg nyi tulungv kam benum, ‘So meqjo bo nyem dooma dvn.’”

²³‍Hoo Juda birwqnum, “Mwnwn atgab hoq dvrab tulu ham pvvm tuku, ho ngulam nyiingv nyirj tai. No kaato, ngo soq sibin bindo sam mwn gab kanamnum, hoo no mwnwn kaapa ma.”

²⁴‍Pool borum kokw so Judanvn betamnum, “Noqg nyeexw Tamarnvn nyiv bwwpa ku. Hvvtwq ma mwnwg nyisil nyigam gab mwn ko gvdku.” Hoo Juda benum, “Mwnwn boolin to, hoo mwnwn wm rwlwqto.”

²⁵‍Ho mwnwn hvb boolin yikho, mwn agam ak mwnwg atu doram bilwqnum, “Soq dvrab tulug nyi atgab ngo ko gvdwn.” Hoo mwn benum, “Kv soq lvqc si hoo laa si hoo beqnyia si hiyv gv kaacin kaato.”

²⁶‍Ho Juda hoq tulu ham kaacin tukul hoo benum, “Mwn ngam dvrwq lootw goiya kunyi, hoggab ngo mwnwn ngoqg ko tuup Selanvn nywxw bwwm dvb jij maanum.” Hoo mwnwn mwv lokta cengka jik maanum.

²⁷‍Hwdlo mwnwg cinc cil ko bwwd moodho, mwnwg kepo ho ko vnyi go doonum.

²⁸‍Hoo hwdlo mwn cinc cidu yikho ko akwn hv alaqkv laqlinum, hoo ham tan nwlwngv cinc jooiya bo nyem tuluhv hiqlwqnv begamv, “Soq ak si otuq lengco bov.”

²⁹‍Hvbmabde mwwg alaqkam mwv siikur kunum, kaato, mwwg bor akam bwwlin kunum. Hoo mwn benum, “Hoqhvb i no atv lamta mvko dvn!” Hoqgab mwwg eminam Perej hvl goqnum.

³⁰‍Meeg kokw so mwwg vbwngv mwwg alaqho tan nwlwngam gvdwl lengknum, hoo mwwg eminam Jera hvl goqnum.