Read Nyishi BEGGAR 39 Bible Online

BEGGAR 39 - Nyishi bible

BEGGAR 39

¹Josapnvn Ijiptho bool kunum, hoo Ijiptho Parog saab, rvkybo kepten akv, mwam hoqho bool kunbo Ismaiyel nyi tulu hoqgv, Potipar mwam rvnum.

²‍Josap lvgab At Sw doobanum, hoo mwv niqtuq lengn bo nyiib ak gob nyiknum, hoo mwwg Ijipt nyiit atwg dook namho mwv doonum.

³‍At Swg mwam doomin gvnam mam la At Swg mwwg alaq nyitaq mwlwho mwam niqtuq lengm dvb nyinam mam mwwg nyiit atv kaapanum.

⁴‍Ho Josap mwwg atwg vnyiq kvvlwql mwwsw dvb mwwg nyitaq mwlwho nyinum hoo mwv mwam mwwg nammam kvvyw-tadal kao mvdwb mvnum hoo mwwg doognam mwlwngam mwam kaal yvg mvdwb mvnum.

⁵‍Mwwg nammam mwam kvvyw-tadal doog mvdwb mvda kalam hoo Ijipt nyi akwg nammam Josapg doog ko-gab mwwg hog mwlw doognam mam At Sw lvqc ciknum; At Swg lvqcv mwwg nam hoola rongo ho doognam hog mwlw aoho haaknum.

⁶‍Ho mwwg doognam hog mwlwngam mwv Josapnvn kaam dvb apaq kunum, hoo Josapg doog ko-gab mwv hog akkam mwwdwq doomanum hvbmabde dvnam arongam hengabnum. Kaato sija Josapg gv vpv kangam bvla kaaby dvb nyinum.

⁷‍Hoo meeg apo go mood kokw so mwwg nyiit atwg nywxwg vnyiqkv Josapnvn kaabynum hoo benum, “Ngam karmin gvt.”

⁸‍Hvbmabde mwv tamab maak hvnum hoo mwwg nyiit at hoqg nywxwngam benum, “Kaato, ngoqg nyiit atv ngo doogam gab nammam hog akkam mwwdwq ma, hoo mwwg hog mwlw doognam mam mwv ngam kaam dvb jipa kun.

⁹‍Mwv soq nam so ngam koi yaama dvn, ho nam apaq twqtwl, ngam jimab mwv hog akkam nam so pvvkur ma, hoggab no mwwg nywxwngv. Hoggub ngo soq koibo nyic-nyia nyinam sam nyic nyil Pwnboam ceeko tayin?”

¹⁰‍Hoo mwn Josapnvn aal looxiam mwnwg lvgab doomin-karmin gvt bvk hvl goonum, mwnwg benam mam mwv tamanum.

¹¹‍Hvbmabde aal loog, hwdlo mwwg bonam mwv namho nyitab nam urab haanum hoo namho nyi akkam doomanum,

¹²‍mwn mwam mwwg vjam nootu nv begamv, “Ngam karmin gvt.” Hvbmabde mwwg vjam mwnwg alaqho mwv apaq peel hoo keknv nam lvvgwb kelinum.

¹³‍Hoo mwn hwdlo mwam vjam mwnwg alaqho apaq peel nam lvvgwb kelinam mam kaapa yin,

¹⁴‍mwn mwnwg nam hoqg bon nyinbo nyi tulungam goqnv hoo bulam benum, “Kaato, mwv ngulug pengko so Hibru ak boanum hv ngulam nyirj dvb nyipa ku. Mwv ngam yumin gvtab, ngoqg dookub haanum hoo ngo vcjaqb sogoq kiirnum.

¹⁵‍Hoo hwdlo mwv ngoqg sogoq kiirnam mam tapa yin, mwwg vjam ngoqg bviywrhv mwv apaq peel kenv hoo nam lvvgwb kelinum.”

¹⁶‍Ho mwn mwwg vjam mwwg nyiit at akv namho hookur namgub pvvl apnum,

¹⁷‍hoo mwn mwam benam akinam betaml, begamv, “No ngulug pengko so boanum Hibru nyera akv ngoqg dookub haanum hoo ngam nyirj dvb nyinum.

¹⁸‍Hvbmabde mwv ngoqg sogoq kiirnam mam tapa yin, mwwg vjam ngoqg bviywrhv apaq peel mwv nam lvvgwb kelinum.”

¹⁹‍Mwwg nyiit atwg mwwg nywxwngv mwam gootaml bekinv begamv, “Hoqhvb noqg nyerangv ngam nyinum” ham tapa kalam twqda, mwwg hangv vc loodab lengnum.

²⁰‍Hoo Josapg nyiit at akv mwam boolayil lvpw atwg nyuum tulungam tuml apko ho mwam pvtwq uraho tumlwqnum, hoo mwv pvtwq uraho dooknum.

²¹‍hvbmabde At Sw Josap lvgab doobanum hoo mwam tumanam abiam kaakinum hoo mwam pvtwqngam kaaya bo vnyiq kaagaho kvvlwql mwwsw mvdwb jinum.

²²‍Hoo pvtwq kaaya bo saab akv pvtwq doonbo mwlwg pengko hoqgv Josapnvn kvvyw-tada mvdwb mvknum. Hog xeq pvtwq uraho nyipa kun, mwv ham nyigwl nyinum.

²³‍Pvtwq kaaya bo saab akv Josapnvn hog mwlwngam gvqlwq tvl mwv hog akkam hvvmin kumanum, hoggab At Sw mwwg lvgab doomin gvnum. Hoo hog xeq mwv nyinum, At Sw ham niqtuq lengdwb jinum.